Ձեր վստահելի աղբյուրը

«Այո ես ասել եմ «տորիչելյան դատարկություն» և միանշանակ պատասխանատու եմ իմ ասածի համար, քանի որ ես մարդկանց գնահատում եմ ոչ թե նրանց լավ կամ վատ լինելով, այլ գործելաոճով, աշխատանքի արդյունավետությամբ»,- ասուլիսում հայտնեց ադրբեջանագետ Արմինե Ադիբեկյանն՝ անդրադառնալով հերթական անգամ իրեն ոստիկանություն հրավիրելու փաստին:

Նա նկատեց, որ ծանր վիրավորանքի վերաբերյալ Քրեական օրենսգրքի հոդվածը իրականում կանխարգելում է դրանք, բայց «ծանր վիրավորանքի» բացատրությունը ոչ մի տեղ չկա:

«Իմ պատկերացմամբ՝ խոսքը չի գնում պարզապես վիրավորանքի մասին, այլ մարդը պետք է խորը տրավմա ապրի, ընկնի դեպրեսիայի մեջ, վախերը սկսեն նրան հետապնդել»,- բացատրեց Ադիբեկյանը և շեշտեց, որ ինքը ընդամենը գնահատում է հրապարակային գործիչների արտաբերած տեքստերը և նրանց գործողությունները և չի վիրավորում:

Նրա խոսքով՝ այսօրվա իշխանությունն ունի մի շատ հրաշալի առանձնահատկություն, մի բան ասում է, բայց անում է ճիշտ հակառակը և ինքը՝ որպես մասնագետ, իրավունք ունի գնահատական տալ այդ գործիչներին:

Ադիբեկյանը տեղեկացրեց, որ նախորդ օրը ոստիկանությունում քննիչին հարցրել է, թե որտեղ է այդտեղ ծանր վիրավորանքը, քննիչն էլ ասել է՝ իրեն ուղարկել են տեսաերիզը, ինքն էլ հանել է հավանական ծանր վիրավորանքները:

«Ուղղորդված և տրամադրված իմ անձի նկատմամբ, վստահ լինելով, որ ես իշխանությունների հանդեպ ինչ-որ նորմալ բան չեմ կարող ասել, որ իմ ամեն մի խոսքը վիրավորանք է ցանկացած իշխանավորի նկատմամբ, ոչ էլ լսել են իմ խոսքերը, վերցրել են յութուբյան լինկը, ուղարկել են քննիչին, ասել են՝ ուսումնասիրի: Քննիչն էլ ո՛չ հոդվածի մասին գիտի, ո՛չ էլ հասկանում է, թե ինչի մասին է խոսքը և ինչքան փիս բառեր կա հանել է և դրա հիման վրա հրավիրել է զրույցի, որի ընթացքում պարզվեց, որ ոչ թե «Կոնչընի դատարկություն» մասին է խոսքը գնում, այլ «Տորիչելյան դատարկության» և լիկբեզ անցկացրի, թե ով է Տորիչելին և նա ինչ լումա ունի համաշխարհային գիտության մեջ»,- հայտարարեց բանախոսը:

Նա նաև տեղեկացրեց, որ նախորդ օրը ոստիկանությունում, քննիչի հետ զրույցից պարզել է՝ «տգետ» բառը ծանր վիրավորանք է:

«Իմ երկրորդ գործի մեջ այն ընդգրկվել է, որպես ծանր վիրավորանք, բայց «տգիտությունը» դա վիրավորանք չէ, այլ ընդամենը փաստի արձանագրում»,- ասաց Արմինե Ադիբեկյանը: