Ձեր վստահելի աղբյուրը

Մեծ Բրիտանիան Կիևից տարհանում է իր դեսպանատան աշխատակիցներին: Լուրը հայտնել է Sky News-ը։

Քաղաքացիներին խորհուրդ է տրվել ձեռնպահ մնալ Ուկրաինա ցանկացած ճանապարհորդությունից, իսկ այնտեղ գտնվողներին խորհուրդ է տրվել հեռանալ «քանի դեռ կարող են» և «առևտրային միջոցներ կան»։

Գերատեսչությունից հայտնել են, որ «աճող սպառնալիքի հետ կապված», ԱԳՆ-ն որոշում է կայացրել Կիևից դեսպանատան աշխատակիցներին հետագա դուրս բերելու մասին։ Գերատեսչությունում պարզաբանել են, որ Կիևում դեսպանատունը բաց է մնալու, սակայն չի կարող անձնական հյուպատոսական օգնություն ցուցաբերել։

Փետրվարի 11-ին էլ Նորվեգիայի ԱԳՆ-ն է իր քաղաքացիներին կոչ է արել լքել Ուկրաինան «լուրջ ու անկանխատեսելի իրավիճակի պատճառով»։ Հարավային Կորեայի իշխանությունները որոշել են փետրվարի 13-ից արգելել իրենց քաղաքացիներին մեկնել Ուկրաինա, ինչպես նաև կոչ են արել քաղաքացիներին շտապ լքել երկիրը։ Դիվանագետները հիշեցրել են, որ հրամանի խախտումը պատժվում է Հարավային Կորեայի օրենսդրությամբ։ Սեուլի տվյալներով՝ Ուկրաինայում կա Կորեայի Հանրապետության ավելի քան 340 քաղաքացի, այդ թվում՝ դեսպանատան աշխատակիցներ, և կառավարությունը պատրաստ է ապահովել նրանց անվտանգ տարհանումը։

Մինչ այս Իսրայելը սկսել է Կիևից դիվանագետների ընտանիքների տարհանումը, Նիդեռլանդների և Լատվիայի իշխանություններն էլ իրենց քաղաքացիներին խորհուրդ են տվել լքել Ուկրաինան։