Ձեր վստահելի աղբյուրը

Այսօր գրանցված երկրաշարժի պատճառով Գյումրիում մասնակի քարաթափման դեպքեր են գրանցվել վթարային շենքերում, մասնավորապես՝ Անտառավան 26 շենքում։ ԱԻՆ աշխատակիցները տեղում են։ Այս մասին հայտնում է Շիրակի մարզպետ Նազելի Բաղդասարյանը։ 

Նա նաև նշել է, որ շտապ օգնության ծառայությունում գրանցված զանգերը հիմնականում մարդկանց սթրեսային վիճակի ու արյան ճնշման բարձրացման պատճառով են, ինչը բժիշկների հավաստմամբ,  պայմանավորված է վախով։

Գյումրու թաղամասերից 2-ը հոսանքազրկված են, նաև Մարմաշեն  և Հայկավան բնակավայրերը։ Վերականգման աշխատանքները ընթացքի մեջ են։

Մարզպետն ավելի վաղ գրել էր, որ երկրաշարժը Շիրակի մարզում մեծ ուժգնությամբ  զգացվել է  Գյումրիում՝ բնակելի շենքերում, ինչպես նաև Աշոցքի տարածաշրջանում. «Աշոցք համայնքի ղեկավար Կարեն Մանուկյանի փոխանցմամբ` այս պահի դրությամբ արձանագրված փլուզումներ չկան։ Շիրակի մարզային փրկարարական վարչության պետ Ալեքսան Գյոզալյանի փոխանցմամբ` Գյումրիում ևս փլուզման ահազանգեր չեն եղել»։

Հիշեցնենք՝  փետրվարի 13-ին, տեղական ժամանակով ժամը 22:25 -ին գրանցվել է Վրաստան-Հայաստան` Բավրա քաղաքից 16 կմ հյուսիս-արևելք, օջախի 10 կմ խորությամբ, 5.2 մագնիտուդով երկրաշարժ: Էպիկենտրոնային գոտում ստորգետնյա ցնցման ուժգնությունը կազմել է 6-7 բալ: ՀՀ ԱԻ նախարարության հաղորդմամբ, երկրաշարժը զգացվել է Շիրակի, Լոռու, Արագածոտնի մարզերում 4-5 բալ ուժգնությամբ և Երևան քաղաքում 3 բալ ուժգնությամբ:

Լուսանկարներն ու տեսանյութը՝ «Շիրակ կենտրոն» ՀԿ նախագահ Վահան Թումասյանի ֆեյսբուքյան  էջից։