Ձեր վստահելի աղբյուրը

Թեև ԱԺ ընդդիմադիր «Հայաստան» և «Պատիվ ունեմ» խմբակցությունները հայտարարել էին, որ չեն մասնակցելու ԱԺ «Քաղաքացիական պայմանագիր» խմբակցության պատգամավորների նախաձեռնությամբ 2020 թվականի սեպտեմբերի 27-ին սանձազերծված ռազմական գործողությունների հանգամանքների ուսումնասիրման նպատակով ստեղծված քննիչ հանձնաժողովի նիստերին, բայց այսօր երեք պատգամավոր՝ Տիգրան Աբրահամյանը, Գեղամ Մանուկյանն ու Գեղամ Նազարյանը ներկայեցել էին առաջին նիստին։

Նիստից հետո կայացած ասուլիսում «Հայաստան» խմբակցության պատգամավոր Գեղամ Մանուկյանը հայտարարեց, որ թեև իրենց հայտարարությանը, հարկ համարեցին ներկայանալ հանձնաժողովի նիստին ու ներկայացնել իրենց փաստարկները, որոնց հիման վրա  որոշում է  կայացվել չմասնակցել իշխանությունների նախաձեռնած հանձնաժողովին։

Նա նշեց, որ իրենք որպես ԱԺ Պաշտպանության և անվտանգության հարցերի մշտական հանձնաժողովի անդամներ, որպես գաղտնի տեղեկատվությանը ծանոթանալու իրավասություն ունեցող պատգամավորներ, ունեն  վերահսկողական իրավասություններ, վստահեցրեց, որ կգտնեն ձևաչափեր, թե ինչպես կարող են վերահսկել, ծանոթանալ հարցաքննություններին, մասնակիցների տարբեր դիրքորոշումներին։

«Պատիվ ունեմ» խմբակցության պատգամավոր Տիգրան Աբրահամյանն ասաց, որ  իշխանությունը փորձում է տպավորություն ստեղծել, թե քննիչ հանձնաժողովի միջոցով  հնարավոր է լինելու բացահայտել 44-օրյա պատերազմի հանգամանքները, դրանում շահագրգռվածություն  չի ցուցաբերում ընդդիմությունը։

«Նախ սկսենք այն հանգամանքից, եթե իշխանությունը նմանատաիպ կամք և ցանկություն ուներ, ապա դրա համար կային  իրավապահ մարմիններ։

Երկրորդ, կա շատ կարևոր հանգամանք, որը իշխանության տարբեր ներկայացուցիչներ փորձում են սղացնել։ Դա օբյեկտիվության հանգամանքն է. մի կողմից բոլորի համար ակնհայտ է, որ 44-օրյա պատերազմի աղետալի հետևանքների պատասխանատուն և գլխավոր մեղավորն իշխանությունն է,  նույն իշխանությունը նույն իշխանության ներկայացուցիչների գլխավորությամբ ձևավորում է  քննիչ հանձնաժողով և ասում է՝ եկեք  մեր գլխավորությամբ որոշենք մեր պատասխանատվության կամ մեղավորության աստիճանը»,- նշեց Տ.Աբրահամյանը։

Նա ընդգծեց, որ այս պայմաններում այս քննիչ հանձնաժողովն ուղղակի իշխանության համար բեմադրություն է, որի  գլխավոր նպատակն է  փակել 44-օրյա պատերազմի էջը՝ նախապես նշանակելով մեղավորների, պատասխանատուների և փորձելով այս ողջ  գործընթացը քաղաքական  իշխանության և դրա վերին էշելոնում  գտնվողներից վերցնել և տեղափոխել ցածր օղակներ և հիմնականում այն ուղղություններով, որոնք հետպատերազմյան փուլում  հանդես են եկել որպես ընդդիմախոսներ՝ ընդդիմադիր գործիչներ, հասարակական գործիչներ, զինվորականներ։

«Եթե իշխանությունը բոլոր հանգամանքների օբյեկտիվ քննություն տանի, դուրս է գալու իր վրա, դրա համար  իրավական և քաղաքական պատասխանատվության պետք է ենթարկվի»,- ասաց Տիգրան Աբրահամյանը։

«Հայաստան» խմբակցության պատգամավոր Գեղամ Նազարյանն ասաց, որ հանձնաժողովն այս կազմով,  այս ձևերով, այս մեխանիզմով, ամենամեծ  ցանկության դեպքում էլ, հնարավոր չէ հասնի արդյունքի։

«Բայց այնպես չէ, որ մի կողմ ենք քաշվելու, որևէ ձևով մասնակցություն չենք ունենալու։ Ունենք հնարավորություն ծանոթանալու և ձայնագրություններին, և տեսաձայնագրություններին»,- նշեց նա։

Գ. Նազարյանն ասաց, որ զոհված զինծառայողների ծնողների հետ է խոսել, ովքեր սուր դեմ են արտահայտվել այս հանձնաժողովի նիստերին մասնակցելուն, կան ծնողներ, ովքեր խնդրել են միջնորդի որպես փորձագետ, վկա մասնակցեն նիստերին։

«Եթե ծնողները համախմբված պահանջեն, որ ես մասնակցեմ ինչ-որ նիստի ինչ-որ մեկին հարց տալու համար, պարտավոր եմ մասնակցել, բայց այն ձևը, որ ընտրել է  այս  վարչախումը, դա բոլորովին այլ ուղղություն է։ Նրանց նպատակն ակնհայտ է՝ խնդիր են դրել մեղավոր նշանակել և իբր ապացուցել»,- ասաց ընդդիմադիր պատգամավորը, ում որդին՝ Աբգար Նազարյանը, նույնպես զոհվել է 44-օրյա պատերազմի ընթացքում։

Նրա խոսքով, իր, Գեղամ Մանուկյանի, Տիգրան Աբրահամյանի և մյուս բոլոր ընկերների գերագույն գլխավոր նպատակներից մեկը պատերազմական  հանցագործությունների ամբողջական բացահայտումն է և իրենք սկսում են փաստերի հավաքագրում ավելի լայն ծավալով, հիմնական նպատակն է պարզել, թե ինչ է եղել իրականում։