Ձեր վստահելի աղբյուրը

«Սա քրեակատարողական հիմնարկում Նարեկ Մանթաշյանի առողջական վիճակի նկատմամբ բարձիթողի վիճակի հետևանք էր»,- հրավիրված մամուլի ասուլիսում հայտեց փաստաբան Ալեքսանդր Կոչուբաևը՝ բացատրելով, որ կալանավորված Մանթաշյանի շաքարային դիաբետը բարձրացել էր 27, որը կոմային մոտ գտնվող շեմ էր և միայն իր բարձրաձայնելուց հետո են նրան տարել «Արմենիա» ԲԿ, որտեղ կարողացել են այդ ցուցանիշը հասցնել մինչև 10 նիշի:

Փաստաբանը հայտնեց, որ մեծ դժվարությամբ են կարողացել բանտարկյալին բուժհիմնարկ տեղափոխելու ուղեգիր ստանալ, քանի որ քրեակատորաղական հիմնարկի բուժծառայության ղեկավարը տարբեր պատճառներով հետաձգել է ուղեգրի տրամադրումը և ինսուլինային կախվածություն ունեցող Մանթաշյանին նաև ինսուլին չի տրամադրել:

«Մենք իրավական ընթացակարգեր նախաձեռնեցինք՝ խոշտանգման հանցափաստով նույթեր ուղարկեցինք Հակակոռուպցիոն կոմիտե, բայց, ամենայն հավանականությամբ, այն կուղակվի ԱԱԾ»,-հայտնեց  Ալեքսանդր Կոչուբաևը և բացատրեց, որ եթե անձն ունի ինսուլինային կախվածություն ու նրան չի տրամադրվում այդ դեղամիջոցը և ուղեգիր, որպեսզի գոնե անձն իր միջոցներով բուժում ստանա, ապա այն իր մեջ պատժի տարրեր է պարունակում, որը համընկնում է խոշտանգման հանցակազմի հետ:

Փաստաբանի խոսքով՝ առողջական վիճակը Նարեկ Մանթաշյանի դեմ սկսված քաղաքական հետապնդումների մի մասն է միայն:

Նա տեղեկացրեց, որ երբ ԱԱԾ-ն արգելանք է դրել տեսակցությունների և զանգերի վրա, ապա փաստացի արգելել է հանդիպումները նաև փաստաբանների հետ և վերջիններս հեռախոսով կամ հընթացս այցելությունների միջոցով են տեղեկանում պաշտպանյալի վիճակի մասին:

Ալեքսանդր Կոչուբաևը հայտնեց, որ մեկ շաբաթ առաջ է վերահաստատվել Նարեկ Մանթաշյանին  կալանքի տակ պահելու որոշումը և պաշտպանները որոշել են փետրվարի 18-ին առողջական վիճակի վատթարացման հիմքով դիմել դատարան՝ գրավով Մանթաշյանին կալանքից ազատելու միջնորդությամբ:

«Փաստաբանական թիմն արդեն հաշվարկն էլ է կորցրել, թե Նարեկ Մանթաշյանի նկատմամբ քանի գործընթաց կա»,- հայտարարեց Ալեքսանդր Կոչուբաևը: