Ձեր վստահելի աղբյուրը

Երևանի ընդհանուր իրավասության դատարանը, նախագահությամբ դատավոր Տաթևիկ Գրիգորյանի, այսօր պետք է կայանար «10-ի գործով»՝ Արսեն Վարդանյանի, Էմանուել Սինանիի, Նարեկ Վերդյանի, Արշակ Սարգսյանի, Սարգիս Կարապետյանի, Տարոն Մանուկյանի, Մեսրոպ Եղիազարյանի, Աշոտ Հովհաննիսյանի, Բագրատ Եսայանի, Նարեկ Մանթաշյանի գործով դատական նիստը։ Նրանց մեղադրանք է առաջադրվել Քրեական օրենսգրքի 258-րդ հոդվածի 1-ին  մասով (դիտավորությամբ խախտել են հասարակական կարգը,  որն արտահայտվել է հասարակության նկատմամբ բացահայտ անհարգալից վերաբերմունքով):

Ամբաստանյալ Սարգիս Կարապետյանի բացակայության պատճառով դատական նիստը հետաձգվեց։ Հաջորդ նիստը նշանակվեց մարտի 9-ին։ 

Սարգիս Կարապետյանի և այս գործով անցնող ևս 6 անձանց պաշտպան Սերգեյ Հարությունյանն ասաց, որ նա ինսուլտ է ստացել։ Նա հույս հայտնեց, որ շուտով կկազդուրվի, դուրս կգրվի հիվանդանոցից և հաջորդ նիստին ներկա կլինի։

Պաշտպանի գնահատմամբ, այս գործը հերթական քաղաքական հետապնդման փորձն է։

«Մենք արդեն տեսնում ենք, թե ինչ է կատարվում երկրում. եթե նախկինում ակցիաներ էին անում դատարանների դիմաց, հիմա արդեն դատավոր են կալանավորում»,- նշեց նա։

Ս.Հարությունյանի խոսքով,  իր պաշտպանյալները կամ քաղաքական գործիչներ են, կամ նրանց հարազատներ. «Պարզ է, որ բռնաճնշում է, մարդկանց նկատմամբ ազդեցություն գործելու միջոց է, որպեսզի վախի մթնոլորտ լինի։ Նույն խափանման միջոցն էլ լծակ է, որպեսզի մարդկանց վրա ազդեցություն գործեն»։

Նա դատարանից ականկալում է արդարադատություն, քանի որ, նրա գնահատմամբ, շինծու գործ է, փաստական հանգամանքներ, ապացույցներ չկան այս գործով, պարզպաես սարքել են մարդկանց վրա ճնշում գործադրելու համար։

«Խորհրդային տարիներին այլախոհ անձանց նկատմամբ գործեր էին սարքում, ավելի շատ որպես հոգեկան խնդիրներ ունենալու կասկածով  տանում էին հոգեբուժարան։ Այսինքն արժեզրկում էին նրանց անձը։ Հիմա  այս անձանց՝ քաղաքական  ու հասարակական ակտիվ գործիչների, մեղադրում են խուլիգանության հոդվածով, որը նույնպես արժեզրկում է, այսինքն ստացվում է՝  նրանք շարքային խուլիգաններ են, այնինչ իմ պաշտպանյալների մեջ կան անձինք, ովքեր տասնյակ տարիներ քաղաքականության մեջ են, կրթված մարդիկ են, հայրենանվեր անձինք են, ովքեր պայքարում են  տխրահռչական իշխանություններից ազատվելու համար»,- ասաց պաշտպանը։

Նա ընդգծեց, որ սա ընդամենը ճնշում է, մահակ իշխանության ձեռքին։

«Դատավոր  կալանավորելն էլ ցույց տվեց, որ այնպիսի վախի մթնոլորտ են ստեղծում, որ դատավորը դատավճիռ կայացնելուց առաջ մտածի՝ արդյոք ինքը պատրաստ է, արդյոք իրեն էլ չեն կալանավորի»,- ասաց Ս.Հարությունյանը։

Նա նշեց, որ  հաջորդ նիստին իրեղեն ապացույցներն են հետազոտելու։

«Ամպագոռգոռ  է հնչում իրեղեն ապացույց, ընդամենը շշեր են՝ դատարկ կամ կիսով չափ լիքը, լսելու ենք վկաներին՝ ոստիկանության աշխատակիցներին։

Բացի ոստիկանների ցուցումներից, գործում որևէ այլ ցուցմունք առկա չէ։ Ընդամենը մի քանի ոստիկան են ցուցմունք տվել։ Հետաքրքրականն այն է, որ յուրաքանչյուր ոստիկանը տեսել է երկու անձի, այսինքն՝ որևէ մեկը երրորդ անձի չեն կարողացել տեսնել»,- ասաց փաստաբան Սերգեյ Հարությունյանը։