Ձեր վստահելի աղբյուրը

Ռուսական կործանիչի ու հատկապես օդաչուների նկատմամբ թուրքական քայլերը միջազգային հանցագործություն են: Panorama.am-ի հետ զրույցում անդրադառնալով Սիրիայի տարածքում ռուսական ՍՈՒ-24 կործանիչի խոցմանը, նման կարծիք հայտնեց թուրքագետ, ԵՊՀ արևելագիտության ֆակուլտետի փոխդեկան Ռուբեն Մելքոնյանը:

«Վստահ եմ, որ քաղաքական ու ռազմական քայլերից, այս ամենը պետք է տեղ գտնի իրավական որոշակի հարթությունում, չնայած որ միջազգային արդարադատությունը շատ հաճախ է պետություններին հիասթափեցնում իր  կողմանկալ պահվածքով»,-ասաց նա:

Ռ. Մելքոնյանի խոսքով, կործանիչի խոցումը Թուրքիայի բացահայտ քայլերից էր, որով այդ պետությունն ապացուցեց, որ ոչ միայն գաղտնի, այլև բացահայտ կերպով աջակցում է «Իսլամական պետությանը»: Թուրքագետը հիշեցնում է, որ սա առաջին դեպքը չէ, երբ թուրքական օդուժն ինքնաթիռ է խոցում հենց այդ հատվածում. «Եթե հիշում եք, մեկը Քեսաբի դեպքերի ժամանակ էր, երբ խոցվեց սիրիական ինքնաթիռը: Այսինքն, թուրքական օդուժը բացահայտ կերպով սատարում է «Իսլամական պետությանը»»:

Մելքոնյանին զարմացրել է հարևան պետության ղեկավարի հայտարարություններն ու պահվածքը. «Դրանք  ոչ միայն տարակուսանք են առաջացնում, այլև խոր կասկածներ այդ մարդու քաղաքական ու հոգեբանական պատրաստվածության մասին: Նախ նա հայտարարեց, որ թուրքական օդուժն է խոցել ռուսական ռմբակոծիչը, իսկ հետո հայտարարեց, թե իրենք չեն իմացել, որ դա ոռւսական ինքնաթիռ է եղել: Սա ուղղակի ծիծաղ է առաջացնում քաղաքական ու քաղաքագիտական շրջանակներում»:

Ինչ վերաբերում է ռուս-թուրքական հավանական զարգացումներին, ապա Մելքոնյանը կարծիք հայտնեց, որ  ռուսական  կողմի հայտարարություններից դատելով, առնվազն երեք ուղղություններով կլինեն  ադեկվատ քայլեր ու պատժիչ  գործողություններ:

«Առաջինը ռազմականն է, ռուսական կողմը հայտարարեց, որ այդ տարածքում իրականացնելու է պատժիչ գործողություններ, այդ թվում և Թուրքիայի նախագահի ձևակերպմամբ, իրենց ազգականից թուրքմենների դեմ: Երկրորդ ուղղությունն այն է, որ ռուսական կողմն ուժեղացրեց  ու ստրատեգիական մեծ պատրաստվածության բերեց իր ռազմական ներուժը՝ ապահովելով իրեն ոչ միայն ծայրահեղ իսլամիստներից, այլև այն պետություններից, որոնք հայտարարել էին միջազգային ահաբեկչության դեմ  պայքարելու պատրաստակամության մասին: Խոսքը վերաբերում է մասնավորապես Թուրքիային»,-ասաց թուրքագետը:

Մելքոնյանը նկատեց՝ արդեն սկսվել են տնտեսական բնույթի պատժամիջոցները, տնտեսական տարբեր ծրագրերի սառեցում. «Չեմ բացառում դիվանագիտական որոշ դեմարշներ, դեսպանի հետկանչում, կամ դիվանագիտական մակարդակի իջեցում»:

Սրա հետ միասին, ըստ Panorama.am-ի զրուցակցի, Ռուսաստանում հակաթուրքական տրամադրություններն ավելի կխորանան. «Իսկ հասարակության այն հատվածը, որ տոգորված էր ռուս-թուրքական «բարեկամության» կեղծ քարոզներով, կհասկանա, թե իրականում ինչ պետության ու հասարակության  հետ գործ ունեն: Եթե այս երկու օրվա աժեոտաժը մի փոքր հանդարտվի, ապա կարող ենք հստակ նշել, որ այդ պետությունն իր քայլերով ապացուցում է, որ ինքն ահաբեկչական պետություն է: Եթե Թուրքիայի համար 20-րդ դարի սկզբից կար «Ցեղասպան պետություն» ձևակերպումը, ապա 21-րդ դարի սկզբին այդ պետությունը վաստակում է «ահաբեկիչ» ձևակերպումը: Ի դեպ, այդ նույն ձևակեպումը տարածվում է նրա կրտսեր եղբոր՝ Ադրբեջանի վրա»:

Մելքոնյանը ցավալի է համարում փաստը, որ այդ երկու երկրների ոչ միայն ղեկավարությունը, այլև հասարակությունը աջակցում են ծայրահեղ իսլամիստներին, ահաբեկիչներին, դրա մասին վկայող պատմություններ ու դրսևորումներ իրեն պատմում են Թուրքիայում ապրող գործընկերներն ու ուսանողները:

«Նույնիսկ խանութում, փոքր կենցաղային առևտրի պարագայում նրանք բախվում են  թուրքական բացահայտ ծայրահեղականության ու այլատյացության բացահայտ դրսևորումների»,-ասաց նա: