Ձեր վստահելի աղբյուրը

ԱՄՆ Սենատի ղեկավարները համատեղ հայտարարություն են տարածել՝ պատրաստակամություն հայտնելով միասնաբար հանդես գալ ի աջակցություն Ուկրաինայի և ՆԱՏՕ-ի դաշնակիցների, որոնց սպառնում է Ռուսաստանը։ Այս մասին տեղեկացնում է Ամերիկայի ձայնը:

«Այս ծանր ժամանակներում մենք երկկուսակցական համերաշխության և վճռականության ուղերձ ենք ուղարկում Ուկրաինայի ժողովրդին և նույնքան հստակ նախազգուշացում Վլադիմիր Պուտինին և Կրեմլին», - ասված է Դեմոկրատական և Հանրապետական կուսակցությունների 12 բարձրաստիճան սենատորների հայտարարության մեջ:

«Պուտինի հարձակման դեպքում Ռուսաստանը պետք է ծանր գին վճարի»,- գրել են նրանք։

«Մենք պատրաստ ենք լիովին աջակցել Ռուսաստանի դեմ ուժեղ, վստահելի և արդյունավետ պատժամիջոցների անհապաղ կիրառմանը, ինչպես նաև դեպի Ռուսաստան արտահանման խիստ սահմանափակումներին և վերահսկողությանը: Մենք կոչ կանենք Եվրոպայում և ամբողջ աշխարհում մեր դաշնակիցներին ու գործընկերներին միանալ մեզ», - նշվում է հայտարարության մեջ:

Դեմոկրատական մեծամասնության առաջնորդ Չակ Շումերի, հանրապետական փոքրամասնության առաջնորդ Միթչ Մաքքոնելի և Սենատի մի քանի հանձնաժողովներում նախագահող դեմոկրատ և բարձրաստիճան սենատորների հայտարարությունը օրենքի ուժ չունի:

Հավասարապես բաժանված Սենատը չկարողացավ համաձայնության գալ երկկողմանի օրինագծի շուրջ՝ Ռուսաստանի դեմ կոշտ պատժամիջոցներ կիրառելու հարցում, եթե վերջինս ներխուժի հարեւան Ուկրաինա:

Երեքշաբթի օրը Սենատի հանրապետականների մեծ մասը միակողմանի օրինագիծ ներկայացրեց Ուկրաինային աջակցելու և Ռուսաստանի դեմ պատժամիջոցներ սահմանելու մասին: Այս օրինագծի ընդունման հավանականությունը դեռևս պարզ չէ, քանի որ դեմոկրատներն այժմ վերահսկում են Սենատն ու Ներկայացուցիչների պալատը։ Օրինագիծը նախատեսում է «Հյուսիսային հոսք 2» գազատարի նկատմամբ պարտադիր պատժամիջոցների կիրառում։

Հանրապետականները նաև առաջարկում են ագրեսիայի դեպքում պատժամիջոցներ կիրառել ռուսական խոշոր բանկերի նկատմամբ և երկրորդական պատժամիջոցներ՝ օտարերկրյա ֆինանսական հաստատությունների նկատմամբ, որոնք կշարունակեն աշխատել պատժամիջոցների տակ գտնվող ռուսական բանկերի հետ։

Սենատի արտաքին հարաբերությունների հանձնաժողովի նախագահ, դեմոկրատ Բոբ Մենենդեսը քննադատել է հանրապետականների նախաձեռնությունը:

«Հանրապետականների վերջին առաջարկը հիմնականում արտացոլում է այն, ինչ դեմոկրատներն արդեն համաձայնել են ընթացիկ բանակցություններում և հիմնվում է մեր սկզբնական բոլոր պատժամիջոցների «մայր օրինագծի» վրա», - ասված է Մենենդեսի հայտարարության մեջ:

Երկկուսակցական օրինագծի ընդունման երկու հիմնական խոչընդոտներն էին «Հյուսիսային հոսք 2»-ի շուրջ անհամաձայնությունները և բանկերի դեմ երկրորդական պատժամիջոցները:

Երկու կուսակցությունների սենատորներն ասել են, որ ցանկանում են արագորեն օգնել Ուկրաինային՝ պատժամիջոցներ սահմանելով Ռուսաստանի դեմ և Կիևին լրացուցիչ ռազմական օգնություն տրամադրելով, ինչը կլինի երկկուսակցական համագործակցության հազվադեպ դեպք պառակտված Կոնգրեսում:

Հինգ դեմոկրատներից և հինգ հանրապետական սենատորներից բաղկացած խումբը մի քանի շաբաթ շարունակ բանակցել է օրինագիծն ընդունելու համար, սակայն օրենսդիրները, ի վերջո, չեն կարողացել համաձայնության գալ:

50 հանրապետական սենատորներից ավելի քան 30-ը պաշտպանում են NYET ակտը՝ Սենատի արտաքին հարաբերությունների հանձնաժողովի սենատոր Ջիմ Ռիշի գլխավորությամբ, ով ակտիվ էր երկկուսակցական ծրագրի շուրջ բանակցություններում:

Նման օրինագիծ երեքշաբթի օրը հանրապետականների կողմից ներկայացվել է նաև Ներկայացուցիչների պալատ։