Ձեր վստահելի աղբյուրը

«Այսօր բացառիկ հնարավորություն ենք ընձեռնել իշխանությանը, որ համատեղ հայտարարությամբ հանդես գանք մեր պետական, ազգային շահերը պաշտպանելու համար»,- ԱԺ Արտաքին հարաբերությունների մշտական հանձնաժողովի նիստում «Հայաստան» խմբակցության  հեղինակած Ադրբեջանի և Թուրքիայի խորհրդարանների կողմից «Շուշիի հռչակագրի» վավերացման կապակցությամբ հայտարարության նախագծի քննարկմանն ասաց «Հայաստան» խմբակցության պատգամավոր Արմեն Ռուստամյանը։

Նա նշեց, որ այստեղ խոսքը հենց դրա մասին է, բավական է  կարդալ «Շուշիի հռչակագիրը», որն ամբողջությամբ հակահայկական, Հայաստանին ու Արցախին ուղղված փաստաթուղթ է, վեր է հանում ամբողջությամբ այն ռազմավարական նպատակները, որոնք Թուրքիա-Ադրբեջան տանդեմը պետք է համատեղ  իրականացնի և այդ գործընթացն արդեն մեկնարկել է։ 

«Մենք դրա դեմն առնելու հայտարարության տեքստ ենք բերել, որի հետ կապված բազմիցս  քննարկումներ են եղել։ Ես ձեզ ասում եմ՝  համատեղ անենք, մի նախադասություն պահպանեք, որ «Շուշիի հռչակագիրն» իր սադրիչ և  կառուցողական բնույթով անընդունելի է Հայաստանի համար։ Այս մի նախադասությունը եկեք համատեղ ընդունենք, մնացածն  ինչ ուզում եք ավելացրեք, պակասացրեք, իսկ եթե այս նախադասությունը չեք ընդունում, հենց այդպես էլ ասեք։ Դուք դա չեք ընդունում՝ ի՞նչ միասնական քաղաքականության մասին եք խոսում»,- ասաց Ռուստամյանը՝ դիմելով հանձնաժողովի ՔՊ-ական անդամներին, որոնք, ինչպես ասել էր ՔՊ խմբակցության անդամ Գուրգեն Արսենյանը,  չեն միանա «Հայաստան» խմբակցության  հայտարարության նախագծին։

Ըստ Ռուստամյանի, եթե ՀՀ խորհրդարանը չի արձագանքում այդ հռչակագրին,  թողում է մենակ գործադրի վրա, իսկ գործադրից  էլ չի լսել, որ  հստակ հայտարարի՝ անընդունելի է,  ԱԳ նախարարը հայտարարի, որ սա անընդունելի է մեզ համար, հակահայակական փաստաթուղթ է,  ունենք մեր մտահոգությունները, առարկությունները, նման հայտարարություն չի լսել։

«Քանի նման հայտարարություն չի եղել, ոչ միայն ողջամիտ, այլ հիմնավոր կասկած է առաջանում, որ մենք ուղղակի սպասարկում ենք թուրք-ադրբեջանական  շահերը։ Ուրիշ  եզրակացություն ձեր այս քվեարկությունից չի բխելու։ Սթափվեք, եթե այստեղ սխալ քվեարկեցիք ու չմիացանք այդ ձևակերպմանը, առիթ եք տալու, որ ողջ հայությունը գա այն  եզրակացության, որ դուք ուղղակի սպասարկում եք թուրք-ադրեբեջանական տանդեմի շահերը,  ամբողջությամբ իրականացնում եք դրա նախապայմանները, պայմանները, որոնք արձանագրված են այդ հռչակագրով»,- ասաց ընդդիմադիր պատգամավորը։

Մինչդեռ, ըստ նրա, այստեղից ընդհակառակն են ասում՝ «այդ նախապայամաններին ընդառաջ ենք գնում, ասում եք՝ Արցախը տեսական հնարավորություն  չունի Ադրբեջանի կազմից դուրս գա, Հայոց ցեղասպանության ճանաչման լոկոմոտիվը լինի Սփյուռքը,  ասում եք՝ մենք Թուրքիայի հետ սահմանային հարցերի իրավական ճշտման որևէ խնդիր չունենք»։

«Այսքանից հետո ինչի՞ մասին եք խոսում, ի՞նչն է ձեզ համար անընդունելի։ Ուրեմն ձեզ  համար ամեն ինչ ընդունելի է։ Եվ այդպես էլ ասեք, որ ձեզ  համար ընդունելի է «Շուշիի հռչակագիրը», վավերացրեք «Շուշիի հռչակագիրը» վերջանա, գնա»,- ասաց Արմեն Ռուստամյանը։