Ձեր վստահելի աղբյուրը

«Այո, գտնում ենք, որ հարուցված վարույթը թիրախավորված է, կա խտրական մոտեցում hատկապես վերջին հայտարարությունների հետ կապված՝ 40 դատավորների: Այստեղ հարց է առաջանում՝ ես ինչպե՞ս հասկանամ՝ ես այդ 40 դատավորների մեջ մտնո՞ւմ եմ, թե՞ ոչ և նախօրոք այս ամեն ինչը պայմանավորված է եղե՞լ, թե՞ ոչ»,- Բարձրագույն դատական խորհրդում հայտարարեց Վերաքննիչ քրեական դատարանի դատավոր Վազգեն Ռշտունին՝ իրեն կարգապահական պատասխանատվության ենթարկելու միջնորդության քննությանը։

Հիշեցնենք, որ կարգապահական վարույթը վերաբերում է դատավորի կողմից երկարատև արձակուրդ մեկնելու հիմքով քրեական գործերը վերամակագրման հանձնելուն։ ՀՀ արդարադատության նախարարությունը դատավորի նկատմամբ կարգապահական վարույթը հարուցել է՝ սեփական նախաձեռնությամբ՝ առանց որևէ միջնորդության, բողոքի։

Նրա խոսքով, եթե կատարվել է ամփոփ ուսումնասիրություն, ապա կպարզվեր, որ իրենից զատ այլ դատավորներ, մասնավորապես 9 դատավորի կողմից, համապատասխանաբար վերամակագրման է հանձնվել 9, 15, 6, 4, 36, 2,  10, 3, 1 գործեր։ Այս գործերի մեծ մասն իր  նախագահության օրոք են եղել։ 

Ռշտունու ներկայացմամբ,  իր կողմից վերամակագրման են հանձնվել ոչ թե 10, այլ՝ ավելի գործեր և իր արձակուրդում գտնվելու ընթացքում իր վարույթում գտնվող գործերն այլ դատավորին չհանձնելն ինքնին ողջամիտ ժամկետի խախտում կարող էր առաջացնել։

«Ազնավության համար պետք է նշեմ, որ եթե դրանք 15,20, 30 էլ լինեին, համարել եմ դա այն ժամանակահատվածն է, որ այդ ընթացքում վարույթում գործեր  պահելն ինքնին դիտարկվելու էր ողջամիտ ժամկետների խախտում։ Ես այդ կանխավարկածից ելնելով՝ հանձնել եմ այդ գործերը։ Իմ համոզմամբ, գործերը եղել են հանձնման ենթակա, քանի որ իմ բացակայության ժամանակահատվածը երկար էր և դրանք չհանձնելը կդիտվեր որպես ողջամիտ ժամկետների խախտում»,- ասաց դատավորը։

Վազգեն Ռշտունին նաև տեղեկացրեց, որ մինչև արձակուրդ քննել և ավարտել է 68 գործ։