Ձեր վստահելի աղբյուրը

Բարձրագույն դատական խորհուրդն այսօր շարունակում է Վերաքննիչ քրեական դատարանի դատավոր Վազգեն Ռշտունու դեմ հարուցված կարգապահական վարույթի միջնորդության քննությունը։

Նշենք, որ ՀՀ արդարադատության նախարարության կողմից կարգապահական պատասխանատվության ենթարկելու միջնորդության հիմքը Ռշտունու՝ երկարատև արձակուրդ մեկնելու պատճառով քրեական գործերը վերամակագրելն է։ «Փաստինֆո»-ն գրում է, որ ՀՀ արդարադատության նախարարությունը դատավորի նկատմամբ կարգապահական վարույթը հարուցել է՝ սեփական նախաձեռնությամբ՝ առանց որևէ միջնորդության, բողոքի։

Դատավորի ներկայացուցիչները հարցեր են ուղղում նախարարության ներկայացուցիչներն։

Ռշտունին ասաց, որ կան գործեր, որոնք հնարավոր են ավարտել 1 օրում, և  կան գործեր, որոնք կարող են 10 անգամ հետազոտվել. «Հանձնման գործերից մեկով, օրինակ, կայացել են մոտ 6-7 դատական նիստեր, որոնք մյուս դատավորները հնարավորություն չեն ունեցել ավարտելու։ Այսինքն՝ ես գտել եմ, որ 2 ամիս պահելուց այդ դեպքում ողջամիտ ժամկետի խախտում կլինի, քանի որ 2 ամսում ես որևէ գործողություն չէի կատարի։ Ես կմտնեի առաջին նիստին, թե այլ դատավոր, դա հավասար էր, որովհետև դա առաջին դատական նիստն էր լինելու»։

Դատավոր Վազգեն Ռշտունին ասաց, որ նախարարության ներկայացուցիչների հայտարարությունները գնահատողական էին, ապա հավելեց. «Տպավորություն էր՝ քիչ էր մնում ասեին՝ գործերը ցրել ա իր վրայից ու գնացել է։ Այսինքն ասաց, բայց թաքնված»։