Ձեր վստահելի աղբյուրը

«Եվրամիությունը պետք է միանշանակ և նպատակաուղղված քաղաքական գնահատական տա Ադրբեջանի և Թուրքիայի գործողություններին»,- Եվրանեսթ խորհրդարանական վեհաժողովի նիստում ասաց «Հայաստան» խմբակցության պատգամավոր Աննա Գրիգորյանը։

Նրա խոսքով՝ Ադրբեջանը որոշել էր, որ կարող է ուժ կիրառել Արցախի հարցի լուծման համար, ինչը ՄԱԿ-ի եզրափակիչ և Հելսինկյան ակտերի հիմնարար սկզբունքների խախտում է։

«Պատերազմը աղետներ բերեց, բայց խնդիրը չլուծեց, թշնամանքի ու հայատյացության տարածումը խաթարեցին տարածաշրջանում խաղաղության համաձայնագրի ստորագրման հեռանկարները»,-հայտարարեց ընդդիմադիր պատգամավորը։

Աննա Գրիգորյանը տարակուսեց, թե ինչպե՞ս կարելի է քաղաքական երկխոսության մեջ մտնել Ադրբեջանի հետ, երբ դեռ Բաքվի բանտերում են հայ ռազմագերիները և գերեվարված խաղաղ բնակիչները, որոնք ամեն օր ենթարկվում են անմարդկային վերաբերմունքի։

Անդրադառնալով Արցախի բռնազավթած տարածքներում հայկական մշակութային ժառանգության ոչնչացման Ադրբեջանի գործողություններին՝ հայ պատգամավորն ասաց. «Ինչպե՞ս կարելի է խոսել անվտանգության մասին, երբ Ադրբեջանից օրեցօր ուժի կիրառման սպառնալիքներ են հնչում, իրականացվում է լկտի քարոզչություն, հնչում է ռազմատենչ հռետորաբանություն և այլատյացություն։ Ավելին, ներկայումս ադրբեջանցի զինվորականները շարունակում են Հայաստանի ինքնիշխան տարածքի բռնազավթումը Սյունիքի մարզում»:

Նա դիմեց Եվրանեսթի պատվիրակներին՝ շեշտելով, որ Եվրոպայի լռությունն ու անտարբերությունն ավելի են բարդացնում իրավիճակ և կոչ արեց մերժել երկակի ստանդարտներն ու ընտրական մոտեցումները։