Ձեր վստահելի աղբյուրը

«Այն, ինչ բոլորդ կոչում եք պատերազմ, եկեք պայմանավորվենք, որ դա հստակ անվանում ունի՝ ցեղասպանական ագրեսիա է Թուրքիայի և Ադրբեջանի  կողմից՝ հրավիրելով տեռորիստներին»,- Կարեն Դեմիրճյանի անվան մարզահամերգային համալիրի մոտ բողոքի ակցիայի ժամանակ հայտարարեց «Ընդդեմ իրավական կամայականությունների» ՀԿ նախագահ Լարիսա Ալավերդյանը։

Նրա խոսքով, չի եղել պատերազմ, եղել է ագրեսիա ճիշտ այնպես, ինչպես  բնութագրվում է  ՄԱԿ-ի փաստաթղթերում, անգամ եթե պետությունը ճանաչված չէ, դրա վրա զինյալ հարձակումը բնութագրվում է  որպես ագրեսիա։

«Արցախի նկատմամբ տեղի է ունեցել ագրեսիա, որին նպաստել է, ստեղծել է բոլոր պայմաններն այս գործող իշխանությունը և շարունակում է իր ամեն մի քայլով ամեն մի օր սպասարկել թուրք-ադրբեջանական ցեղասպանական քաղաքականությունը»,- ասաց Լ. Ալավերդյանը։

Նա ընդգծեց, որ այս 100 տարիների ընթացքում Թուրքիայի նպատակը չի փոխվել. «Ադրբեջանը, որին Թուրքիան ստեղծել է 1918 թվականին մեկ նպատակով՝ ավարտել ցեղասպանությունն արդեն Արևելյան Հայաստանում, չի փոփոխվել։ Այն իրականացնում էր տարիներ շարունակ տարբեր ձևերով, իսկ հիմա ուղղակի՝ բացեիբաց»։

Լ. Ալավերդյանի խոսքով, ՀՀ գործող իշխանությունը կարող է համարվել Թուրքիայի և Ադրբեջանի նախագահների կողմից ստորագրված խայտառակ «Շուշիի հռչակագրի» երրորդ կողմը, ՔՊ-ական պատգամավորները հրաժարվեցին այդ հռչակագիրը դատապարտող հայտարարությունն ընդունելուց։ 

«Մենք այսօր ունենք այնպիսի մի վիճակ, երբ ոսոխը դրսից, թե ներսից վտանգում է հայությանը, հայկական պետություններին՝ Արցախ Հանրապետությունն ու Հայաստանի Հանրապետությունը։

Առանց դադարի պետք է պայքարենք մեր իսկ հարազատ հայրենիքի համար»,- ասաց «Ընդդեմ իրավական կամայականությունների» ՀԿ նախագահ Լարիսա Ալավերդյանը։

Հիշեցնենք, որ Կարեն Դեմիրճյանի անվան մարզահամերգային համալիրում ընթանում է Եվրանեսթ խորհրդարանական վեհաժողովի նիստը, ներկա են նաև ադրբեջանցի պատգամավորներ։  Դրսում հավաքված են հասարակական, քաղաքական, մշակութային գործիչներ, քաղաքացիներ՝ իրենց բողոքն արտահայտելով ադրբեջանցի պատգամավորների՝ Հայաստանում գտնվելու փաստից։