Ադրբեջանի ցինիզմը հասավ գագաթնակետին, երբ Ալիևն ասաց, թե Արցախի հարցը լուծված է. Արթուր Խաչատրյան

Քաղաքական 13:04 22/02/2022 Հայաստան

Ադրբեջանի ցինիզմը հասավ գագաթնակետին, երբ Ալիևն ասաց, թե Արցախի հարցը լուծված է. Արթուր Խաչատրյան

«2020 թվականին հայկական պետությունների վրա տեղի է ունեցել հարձակում նաև ահաբեկիչների կողմից, որը հանգեցրել է տարածաշրջանում կայունության խաթարմանը»,-Եվրանեսթ խորհրդարանական վեհաժողովի նիստում հայտարարեց «Հայաստան» խմբակցության պատգամավոր Արթուր Խաչատրյանը:

Նա նկատեց, որ չնայած միջազգային ընդունված սկզբունքները պահպանելու ԵԱՀԿ Մինսկի խմբի, ՄԱԿ-ի գլխավոր քարտուղարի բազմաթիվ հայտարարություններին և համաճարակին, Ադրբեջանը շարունակեց զինված ուժեր կիրառել Արցախի դեմ, կանայք ու երեխաները ստիպված էին լքել իրենց տները, քաղաքացիական անձինք դարձան ռազմագերիներ, նրանք ենթարկվում են բռնությունների և, չնայած միջազգային հանրության կոչերին, մինչ օրս մնում են անազատության մեջ:

Արթուր Խաչատյանը շեշտեց, որ Ադրբեջանը ոչ միայն Արցախի այլ նաև Հայաստանի սուվերենության դեմ է գործողություններ կատարել:

«Խոսելով ճանապարհների բացման մասին՝ առաջինն ինչ արեց Ադրբեջանը՝ Հայաստանի և Արցախի միջև ճանապարհի արգելափակումն էր, իսկ դրանից մի քանի շաբաթ անց տեղի ունեցավ Հայաստանի և Իրանի միջև ճանապարհի արգելափակում, արդյունքում՝ Հայաստանի կենսագործունեության համար անհրաժեշտ ուղիներ կտրվել են»,-հայտարարեց հայ պատգամավորը և հավելեց. «Ադրբեջանի ցինիզմը հասավ գագաթնակետին, երբ Ալիևն ասաց, թե Արցախի հարցը լուծված է, դրանից հետո Ադրբեջանը խոչընդոտում է տարածաշրջան ԵԱՀԿ Մինսկի խմբի ներկայացուցիչների այցին և նրա բոլոր նման քայլերը մնում են առանց պատժի՝ խախտելով միաջազգային իրավունքի նորմերը և իրավիճակը տանելով խաղաղության խաթարմանը»:

Արթուր Խաչատրյանը կոչ արեց պաշտպանել ինքնորոշման և սեփական ճակատագիրը տնօրինելու ժողովուրդների իրավունքները:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: