Ձեր վստահելի աղբյուրը

«Յուրաքանչյուր անձ, որ դատական իշխանության մաս է կազմում, դատավոր է և ունի ողջամտություն, պետք է ներկա գտնվեր այսօր։ Ես չեմ կարծում, որ կա մեկ դատավոր, որը գոնե իր մեջ չի հասկանում, թե դատական համակարգի առջև ինչպիսի խնդիրներ կան, այն հնարավոր վտանգները, որոնք տեղի են ունենում դատական համակարգի նկատմամբ»,- լրագրողների հետ զրույցում նշեց Երևանի ընդհանուր իրավասության դատարանի դատավոր Արման Հովհաննիսյանը՝ անդրադառնալով այսօր նախատեսված Դատավորների արտահերթ ընդհանուր ժողովին, որը քվորում չապահովելու պատճառով չկայացավ։

Նրա խոսքով, փորձում են սահմանափակել դատական համակարգի անկախությունը, փորձում են կոտրել դատական համակարգը ու հիմա, եթե որոշ դատավորներ պետք է ղեկավարվեն նեղ անձնական շահերով, ներկա չգտնվեն, չգիտի՝ դրան ինչ գնահատական տալ։

Ա.Հովհաննիսյանը նշեց, որ Դատավորների արտահերթ ժողովը հրավիրվել է հասկանալու, թե ինչպես դատավորները կարող են պաշտպանել իրենք իրենց, խնդիրներին ինչ լուծումներ տալ. «Սա օրհասական է, որ բոլորը պետք է գան ու մասնակցեն այս ժողովին»։

Ա.Հովհաննիսյանը համաձայնեց, որ իսկապես գուցե շատ դատավորներ մտավախություն ունեն, որ այս ժողովին մասնակցելու դեպքում իրենց նկատմամբ նույնպես կարող են լինել կարգապահական վարույթներ, անգամ կալանավորումներ. «Կա այդ մտահոգությունը, բայց այս խնդիրները՝ կարգապահական վարույթներ, քրեական գործեր, իմ կարծիքով, ոչ ոք դրանցից երաշխավորված չէ: Եթե իմ գործընկերներից ինչ-որ մեկը կարծում է, որ ինքը երաշխավորված է կամ ապահովագրված է, չարաչար սխալվում է»։

Նրա խոսքով, դատավորների նկատմամբ կարգապահական վարույթների հարուցումը, իշխանության ներկայացուցիչների կողմից դատական համակարգի վերաբերյալ տարբեր գնահատականներ տալը, դատական համակարգում ինչ որ կլանային համակարգերից խոսելը,  կոռուպցիոն դատավորներից խոսելը միտված է դատական համակարգը հեղինակազրկելուն. «Ճիշտ է, խոսում են 39-40 դատավորի մասին, բայց չտալով որևէ մեկի անունը, դրանով հեղինակազրկում են մոտ 300 դատավորի։ Եթե կան այդպիսի դատավորներ, տվեք անունները, համապատասխան գնահատականները տվեք, եթե չկան, ուրեմն մի հեղինակազրկեք»։

Համակարգում առկա լուծումների տարբերակներից է համարում համախմբումը. «Չպետք է լինի նեղ անձնական շահերով ղեկավարվել, եթե համախմբվածություն եղավ, վստահաբար ասում եմ՝ դատական համակարգին որևէ վտանգ չի սպառնա»։