Ձեր վստահելի աղբյուրը

«Ես Բարձրագույն դատական խորհրդի կողմից դատավորների նկատմամբ ճնշումներին չեմ անդրադառնա, որովհետև նման ստույգ տվյալ չունեմ, բայց դատական համակարգում առկա խնդիրները վերաբերում են բոլորին»,- լրագրողների հետ զրույցում ասաց Երևանի ընդհանուր իրավասության դատարանի դատավոր Զարուհի Նախշքարյանը:

Հիշեցնենք, որ այսօր նախատեսված էր Դատավորների արտահերթ ընդհանուր ժողովը, որը չկայացավ քվորում չլինելու պատճառով: Ներկա էր ընդամենը 89 դատավոր:

«Նախ՝ Դատավորների ընդհանուր ժողովին առանց հարգելի պատճառի չներկայանալը կարգապահական վարույթ հարուցելու հիմք է: Երկրորդ, այն օրակարգով, որով հրավիրված էր ընդհանուր ժողով, ես չեմ կարծում, որ այդ հարցադրումները չեն վերաբերում գոնե որևէ մեկ դատավորի Հայաստանում: Կարող է՝ դատավորների մի մասը կարծում են, որ երբեք իրենց չի առնչվելու այդ կարգապահական վարույթները, քրեական հետապնդումը: Բայց ես, օրինակ, նման վստահություն չունեմ: Այս խնդիրն  անխտիր վերաբերում է բոլորին։

Ես կարծում եմ, որ դատավորներն ավելի ապահովագրված կլինեն, եթե գան ընդհանուր ժողովին, մասնակցեն միության աշխատանքներին: Սա ավելի ապահով ճանապարհ է, քան նստել փակ գրասենյակում կամ դահլիճում, չներկայանալ ժողովի, չմասնակցել քննարկումներին ու կարծել, թե երբեք իրենց նման վտանգ չի սպառնալու»,-ասաց Զ.Նախշքարյանը:

Անդրադառնալով արդարադատության նախարար Կարեն Անդրեասյանի հայտարարությանը կապված 39 կոռումպացված դատավորների հետ, դատավորն ասաց. «Ես կցանկանամ, որ պարոն Անդրեասյանը պատասխանի՝ կոռումպացված 39 դատավորներից մեկը ե՞ս եմ:

Ես դեմ եմ, որ դատական իշխանությանը նման ոճով ու նման ճանապարհով փորձ անեն հեղինակազրկել։ Եթե դու չունես տվյալներ, եթե դու չունես անուններ, եթե դու չունես կոռուպցիայի դեպքեր, ի՞նչն է պատճառը, որ դու քո խոսքն ընդհանրական դատական իշխանությանն ես հասցեագրում: Կամ բարի եղիր, հրապարակիր բոլոր այն դատավորների անուն-ազգանունները, որոնք, քո կարծիքով, կոռումպացված են, նրանց նկատմամբ համապատասխան գործողություններ իրականացրու, կամ մի նսեմացրու դատական իշխանության հեղինակությունը»: