Ձեր վստահելի աղբյուրը

«Կառավարության դիրքորոշումն այս հարցի վերաբերյալ այն է, որ քննիչը քրեադատավարական ընթացակարգով զուտ գործողություն իրականացնելու դեպքում ավելի կարևոր դերակատարում պետք է ունենա, քան ներկայացուցչական մանդատով օժտված պատգամավորը, որը ցանկանում է գնալ և տեսնել, թե կալանավորվածն ինչ իրավիճակում է գտնվում»,- այսօր Պետական-իրավական հարցերի մշտական հանձնաժողովում հայտարարեց «Հայաստան» խմբակցության պատգամավոր Արամ Վարդևանյանը՝ ներկայացնելով «Ձերբակալված և կալանավորված անձանց պահելու մասին» օրենքում փոփոխություններ կատարելու մասին իր հեղինակած օրինագծի վերաբերյալ Կառավարության տված բացասական եզրակացությունը:

Նրա խոսքով՝ պատգամավորը, լինելով ներկայացուցչական մանդատով օժտված պաշտոնյա, ժողովրդի ընտրյալ, պետք է լինի նաև հետադարձ կապ ապահովող անձնավորություն՝ այդ թվում նաև փակ հաստատություններում գտնվող անձանց հետ:

Շեշտելով, որ պատգամավորներն իրավունք ունեն անարգել մուտք ու ելք ունենալ ցանկացած փակ հաստատություն՝ Վարդևանյանը փաստեց, որ դիտարկվող օրենքով «մուտքն ու ելքը» և «անձին տեսնելը» լրիվ այլ հասկացություններ են ձևակերպվել և նշեց, որ օրենսդրական նախաձեռնության նպատակն այն է, որ երբ պատգամավորը մուտք է գործում քրեակատարողական հիմնարկ, ոչ թե բախվի այն իրավիճակին, որ, մտնելով քրեակատարողական հիմնարկի խուց, տեսնի ոչ թե դատարկ պատերը, քանի որ այն անձին, որի մասին ստացել է ահազանգ, հանել են խցից, այլ ՔԿՀ ներկայացուցիչների ներկայությամբ գնա ծանոթանա ահազանգի մասին և ապահովի հետադարձ կապը:

Պատգամավորը հայտնեց, եղել են դեպքեր, որ ինքը այցելել է ՔԿՀ և իրեն ասել են՝ կարող է տեսնել խուցը, բայց ոչ կալանավորվածին, իսկ Երևանի Կենտրոն ՔԿՀ-ում բոլոր կալանավորվածների դեպքում քննիչները տեսակցություններն արգելում են:

«Օրինակ ընտրողը զանգում է պատգամավորին և ասում է, որ իր ամուսինը քրեակատարողական հիմնարկում է և նրան խոշտանգումների են ենթարկել, եղունգներն են քաշել, մատներն են կտրել, կամ շաքարն է բարձրացել և կյանքին վտանգ է սպառնում»,- հիպոթետիկ իրավիճակ նկարագրեց Վարդևանյանը և շեշտեց, որ այդ դեպքում պատգամավորը գնում է ՔԿՀ, իր այցը հիմնավորում այդ ահազանգով, ուզում եմ տեսնել այդ կալանավորված անձի մատները տեղն են, թե ոչ, իսկ ՔԿՀ-ն արգելում է, քանի որ քննիչը մերժել է տեսակցությունն այդ կալանավորված անձի հետ:

Ըստ Վարդևանյանի՝ այդ դեպքը տեսակցություն չէ կալանավորվածի հետ, այլ ուզում են պարզել, թե նրան խոշտանգել են, թե ոչ, մատները կոտրված են, թե ոչ, կենդանի է, թե մահացած:

Նկատելով, որ արհեստական խոչընդոտ է ստեղծվում այդ երաշխիքի ստեղծման ճանապարհին՝ ընդդիմադիր պատգամավորն ասաց. «Ես կարծում եմ, որ այն աբսուրդ է, ԱԺ պատգամավորի կիրառական իրավունքների կոպիտ սահմանափակում, որը պետք է վերացվի:

Վարդևանյանն անընդունելի համարեց նաև գործադիրի մերժման այն հիմնավորումը, թե նման հանդիպման ժամանակ պատգամավորը կարող է քննությանը միջամտել՝ փաստելով, որ այն քրեորեն պատժելի է և դրա կանխարգելման մեխանիզմերն օրենքով կան:

Ագնեսա Խամոյանն էլ ընթերցեց 2016 թվականի ԱԺ նիստում ՀԱԿ պատգամավոր Նիկոլ Փաշինյանի հայտարարությունը, որով նա իր հեղինակած օրինագիծը ներկայացնելիս քննադատում էր քննչականի և ԱԱԾ-ի կողմից կալանավորվածներին տեսակցելու արգելքի որոշումը:

«Բայց հանձնաժողովի նիստից հասարակության մոտ կմնա մեկ նախադասություն՝ ԱԺ ՔՊ պատգամավորները դեմ քվեարկեցին մի օրինագծի, որը ժամանակին Նիկոլ Փաշինյանն էր հեղինակել»,- հայտարարեց Խամոյանը:

Հանձնաժողովի նախագահ, ՔՊ պատգամավոր Վլադիմիր Վարդանյանն առաջարկեց դեմ քվեարկել ընդդիմադիր պատգամավորի նախաձեռնությանը: