Ձեր վստահելի աղբյուրը

«Հենակետ» վերլուծական կենտրոնն ամփոփել ու հրապարակել է համառոտ տեղեկություններ անցած շաբաթվա ընթացքում Արցախում և Արցախի շուրջ տեղի ունեցած իրադարձությունների վերաբերյալ.

«Ընդհանուր բնույթի տեղեկություններ

Ընթացիկ շաբաթ Արցախում ամենաքննարկվող թեման մամուլում և համացանցում տարածված տեսանյութն էր, որտեղ երևում է, թե ինչպես են ադրբեջանցիները Ասկերանի շրջանի Խրամորթի բնակիչներին պահանջներ ներկայացնում։

Մասնավորապես, ադրբեջանցիները հայերեն լեզվով տեղի բնակիչներին բարձրախոսով հորդորել են լքել գյուղը, դադարեցնել հողագործական աշխատանքները, ենթարկվել Ադրբեջանի օրենքներին։
ԱՀ  ՆԳ նախարարի մամուլի խոսնակը  նշել է, որ Խրամորթում խուճապային տրամադրություն չկա, ոչ ոք գյուղը լքել չի պատրաստվում, հակառակը` տեղաբնակների կողքին ապրում են նաև այլ բնակավայրերից տեղահանված ևս 12 ընտանիք։

Թեմայի հետ կապված ԱՀ ՄԻՊ Գեղամ Ստեփանյանը հայտարարել է, որ  ադրբեջանցիների կողմից բարձրախոսներով հայ բնակչությանն ուղղված «կոչերն ու հորդորները» բնակչությանն ահաբեկելու ուղիղ դիտավորություն ունեն:  Ստեփանյանը նշել է,  որ հավաքագրված փաստերը վկայում են, որ գյուղի բնակչությանն ահաբեկելու ադրբեջանական հերթական գործողությունները իրականացվում են հատուկ պլանավորված և ադրբեջանական ղեկավարության ուղիղ համակարգմամբ։

Անդրադառնալով միջադեպին ԱՀ դատախազությունից տեղեկացրել են, որ գլխավոր դատախազն  այցելել է Ասկերանի շրջանի Խրամորթ համայնք և շրջանի վարչակազմի ղեկավարի ու այլ պաշտոնատար անձանց հետ միասին հանդիպել համայնքի բնակիչների հետ։

Թեմային է անդրադարձել ՀՀ ԱԺ ընդդիմադիր պատգամավոր Տիգրան Աբրահամյանը, նշելով,  որ Հայաստանի այս իշխանությունը ՀՀ-ին ու Արցախին ուղղվող լուրջ մարտահրավերներին դիմակայելու շանս ուղղակի չունի։

Թեմայի վերաբերյալ փորձագետները նշել են, որ Խրամորթ գյուղի բնակչության նկատմամբ վերջին օրերին ադրբեջանական կողմից կիրառվող սադրանքը հոգեբանական պատերազմի դասական օրինակ է, որն ակնհայտորեն նախապատրաստվել է Բաքվում: 

Փորձագետները նկատել են նաև, որ ադրբեջանական կողմը այդ սադրանքները իրականացրել է ոչ թե սովորական բարձրախոսով, այլ գործի են դրվել զինված ուժերի հատուկ տեխնիկա, ինչը նշանակում է, որ Ադրբեջանի իրականցրած այս օպերացիան ունի հեռահար նպատակներ։

ՌԴ խաղաղապահների մասին

Մարտակերտ քաղաքի մշակույթի և երիտասարդության կենտրոնում ռուսական խաղաղապահ զորախմբի զինծառայողները ինտերակտիվ «Խաղաղության դաս» են անցկացրել դպրոցականների հետ։ Դասընթացների ընթացքում ռուս խաղաղապահները երեխաներին պատմել են  խաղաղապահ ուժերի ստեղծման պատմության և խաղաղապահների հիմնական խնդիրների մասին։ Նաև երեխաներին ցույց է տրվել, թե ինչպես պետք է ցուցաբերել առաջին բուժօգնություն։

Պաշտոնական լրահոս

ԱՀ  ԱԺ «Ազատ հայրենիք- ՔՄԴ» և «Միասնական հայրենիք» խմբակցությունները ողջունել են ՌԴ նախագահի կողմից Դոնբասի զույգ հանրապետությունների ճանաչումը:

ԱՀ  ԱԱԽ  քարտուղար Վիտալի Բալասանյանը շնորհավորական ուղերձ է հղել Հայրենիքի պաշտպանի օրվա առիթով: Բալասանյանը նշել է, որ Արցախի համապատասխան պետական կառույցների և խաղաղապահ  զորակազմի փոխգործակցության բարձր մակարդակը վստահություն է հաղորդում առաջացող խնդիրներին արագ ու արդյունավետ լուծումներ տալու ուղղությամբ։
Արցախի պաշտպանական գերատեսչությունից տեղեկացրել են, որ փետրվարի 23-ին հակառակրոդը կրակ է  բացել Արցախի  հարավ-արևելյան ուղղությամբ տեղակայված  դիրքերի ուղղությամբ: Հայկական կողմը կորուստներ չի կրել։

Փետրվարի 25-ին, տեղի է ունեցել ԱՀ ՆԳ նախարարության ոստիկանության կոլեգիայի նիստ, որի ընթացքում ամփոփվել են ոստիկանության ծառայությունների և տարածքային ստորաբաժանումների 2021 թվականի օպերատիվ-ծառայողական գործունեության արդյունքները:

ԱՀ տարածքային կառավարման և ենթակառուցվածքների նախարարությունից տեղեկացրել են, որ մարտի 1-ից կավարտվի բնակիչ-բաժանորդների համար բնական գազի և չգազաֆիկացված բնակավայրերի բնակիչ-բաժանորդների համար էլեկտրաէներգիայի սպառման գծով Արցախի Հանրապետության Կառավարության կողմից փոխհատուցման աջակցության տրամադրումը։

«Հայաստան» հիմնադրամից տեղեկացրել  են, որ Ստեփանակերտի Աջափնյակ թաղամասում շարունակվում են 244 ընտանիքի համար նախատեսված 15 բազմաբնակարան շենքերի շինարարական աշխատանքները:

ԼՂ հակամարտության մասին

Փետրվարի 21-ին հեռախոսազրույց է տեղի ունեցել ՀՀ  վարչապետ Նիկոլ Փաշինյանի և ՌԴ նախագահ Վլադիմիր Պուտինի միջև: Երկու երկրների ղեկավարները քննարկել են 2020 թվականի նոյեմբերի 9-ի, 2021 թվականի հունվարի 11-ի և նոյեմբերի 16-ի եռակողմ հայտարարություններով ձեռք բերված պայմանավորվածությունների կատարման ընթացքը:

ՀՀ ԱԳ նախարար Արարատ Միրզոյանը փետրվարի 23-ին ընդունել է ՀՀ-ԵՄ խորհրդարանական գործընկերության կոմիտեի համանախագահ Մարինա Կալյուրանդին և ՀՀ-ԵՄ խորհրդարանական գործընկերության կոմիտեի անդամ Մարկետա Գրեգորովային: Մարինա Կալյուրանդն ընդգծել է, որ ԼՂ հակամարտությունը պետք է կարգավորվի խաղաղ բանակցությունների միջոցով՝ ԵԱՀԿ Մինսկի խմբի համանախագահության մանդատի ներքո»։