Ձեր վստահելի աղբյուրը

Ազգային ժողովում քննարկվում է Հաշվեքննիչ պալատի նախագահի ընտրության հարցը։ ԱԺ Ֆինանսավարկային և բյուջետային հարցերի մշտական հանձնաժողովը, «Ազգային ժողովի կանոնակարգ» սահմանադրական օրենքի 145-րդ հոդվածի համաձայն, Հաշվեքննիչ պալատի նախագահի պաշտոնի համար Ազգային ժողովին է առաջարկել «Քաղաքացիական պայմանագիր» խմբակցության կողմից ներկայացված Ատոմ Ջանջուղազյանի թեկնածությունը:

«Հայաստան» խմբակցության պատգամավոր Արմեն Գևորգյանը հարցի քննարկման ժամանակ ասաց, որ պարոն  Ջանջուղազյանը մինչև վերջերս զբաղեցնում էր ֆինանսների նախարարի պաշտոնը, ապա հարցրեց. «Արդյո՞ք չկա շահերի բախում այն հանգամանքում, որ, ստանձնելով այս քննարկվող պաշտոնը, ինքը, ըստ էության, ինչ-որ  տեղ պետք է աուդիտ անցկացնի այն բյուջեի կամ այն համակարգի նկատմամբ, որը վերջին երեք տարիներին անձամբ ղեկավարել է»։

Հիմնական զեկուցող ԱԺ ֆինանսավարկային և բյուջետային հարցերի մշտական հանձնաժողովի նախագահ Գևորգ Պապոյանն արձագանքելով՝ ասաց, որ հարցն ունի երկու կողմ. «Առաջինը, ենթադրում եմ,  դա մասնագիտական էթիկայի դաշտում է, ընդհանրապես անաչառության դաշտում է։

Ինչ վերաբերում մյուս հատվածին, նշեմ հետևյալը. ըստ էության, պարոն Ջանջուղազյանը գրեթե մեկ տարի է այդ պաշտոնին չէ, հետևաբար այդ առումով նաև որոշակի  ժամանակահատված է անցել, այսինքն այնպես չէ, որ մենք այդ պաշտոնից անձին տեղափոխում ենք մեկ այլ պաշտոն»։

ՔՊ-ական պատգամավորի խոսքով, Հաշվեքննիչ  պալատը միայն  ֆինանսների նախարարության հաշվեքննությունը չի իրականացնում, այլ բոլոր նախարարությունների բոլոր բյուջետային ծրագրերի,  բոլոր ծախսերի ուղղությամբ. «Եթե ձեր հարցին զուգահեռ դնենք այն օգուտները, որոնք հնարավոր է, այսինքն Հաշվեքննիչ  պալատը  գնում է մարդ, ով փաստացի երկար տարիներ բյուջեն կազմողներից մեկն է եղել, կարծում եմ՝ այդ գիտելիքներն ավելի ծանր են, քան այն տեսական ռիսկերը, որոնք տեսնում եք դուք»։

Արմեն Գևորգյանն ասաց, որ իրականում կասկածի տակ չդնելով Ա. Ջանջուղազյանի գիտելիքներն ու ունակությունները, պարզապես Հաշվեքննիչ  կառույցում գործառույթն է լրիվ ուրիշ, ինքը պետք է սխալներ բացահայտի, խնդիրներ տեսնի այն  աշխատանքում, որը նաև ինքն է ժամանակին կատարել։

«Դուք նշեցիք, որ մենակ ֆինանսների նախարարությունը չէ, բայց, ըստ էության,  պետական բյուջեի պլանավորումն ու իրականացումն ամբողջությամբ ֆինանսների նախարարության տիրույթում է եղել, ուրիշ բան, որ տարբեր նախարարություններ կատարողականներ են  անում, ծրագրեր իրականացնում։ Այսինքն ես այս տեսակից կփորձեի հարցին նայել»,- ասաց «Հայաստան» խմբակցության պատգամավորը։

Գ.Պապոյանը համաձայնեց Ա. Գևորգյանի արտահայտած վերջին մտքի հետ, ապա հավելեց, որ այդտեղ էլ ռիսկեր չի տեսնում։

«Կուզեի ինչ-որ տեղ վստահեինք ինստիտուտներին, այսինքն անձանցով, նաև նախագահով չպայմանավորենք ողջ ինստիտուտը»,- նշեց ՔՊ-ական պատգամավորը։

«Հայաստան» խմբակցության մեկ այլ պատգամավոր՝ Ագնեսա Խամոյանը հիշեցրեց, որ Ատոմ Ջանջուղազյանը  1999 թվականին դեռ եղել է գլխավոր գանձապետը, այնուհետև տարբեր պաշտոններ է զբաղեցրել՝ նախարարի տեղակալ, նախարար, ապա հարցրերց՝ արդյո՞ք պարոն Ջանջուղազյանը նախկին է, թե՞ ներկա։

Գ. Պապոյանն արձագանքեց. «Նախկին է, ներկա, փաստորեն և ապագա»։

Նրա խոսքով, պետական կառավարման համակարգում, այդ թվում ԱԺ-ում, քիչ են մարդիկ, ովքեր 2018 թվականից հետո են եկել համակարգ, հիմնականում տասնամյակների փորձառության մարդիկ են աշխատում։