Ձեր վստահելի աղբյուրը

«Վստահաբար տեղյակ եք, թե հավկիթի շուկայում ինչ է տեղի ունենում։  «Շիրակ» թռնչաֆաբրիկան, իհարկե, արտաքուստ շատ լավ բան է արել, ձվի գինը իջեցրել է ու վաճառվում է 30-35 դրամով, բայց դրա արդյունքում տուժում են փոքր ընկերությունները»,- ԱԺ-ում ասաց «Պատիվ ունեմ» խմբակցության պատգամավոր Թագուհի Թովմասյանը։

Նա նաև հայտնեց՝ իրեն քիչ առաջ տեղեկացրեցին, որ «Լուսակերտ» թռչնաֆաբրիկան Նոր Գեղի համայնքում այսօր բաժանելու է իր 8 հազար հավն ու փակվելու է, 88 աշխատող մնում է անգործ:

«Արդյոք սա ազատ, արդար ու թափանցիկ մրցակցության դրսևորում է, երբ ավելի խոշոր ընկերությունը դեմպինգ է անում և փոքր ընկերությունները դրանից խեղճանում են», - հայտարարեց Թովմասյանը՝ դիմելով Մրցակցության պաշտպանության հանձնաժողովի նախագահ Գեղամ Գևորգյանին։

Նա նաև ասաց, որ «Աշտարակ» ընկերությունն այս հարցով դիմել է Մրցակցության պաշտպանության հանձնաժողովի, որպեսզի վերաբերմունք արտահայտի, բայց հանձնաժողովը շարունակ ուսումնասիրում է:

«Ու մինչև դուք ուսումասիրում եք խնդիրը, այդ ընթացքում ընկերություն է փակվում։ Այսքան օրենսդրական փոփոխություններն արդյո՞ք չեն նպաստում, որ դուք ավելի օպերատիվ աշխատեք ու խնդիրներին ավելի օպերատիվ արձագանքեք», - ասաց պատգամավորը:

Գեղամ Գևորգյանը պատասխանեց, թե «Շիրակ» թռչնաֆաբրիկայի շեմը 10 տոկոսին էլ մոտ չէ ու չի կարող դեմպինգ իրականացնել:

«Եթե շուկան չկայացավ, այս խնդիրները լինելու են, շղթա է գործում՝ մի սուպերմարկետում գինն իջնում է, մյուս տնտեսվարողները ևս սկսում են գինը իջեցնել: Չի կարող շուկայում 4 կամ 5 տոկոս ունեցող տնտեսվարող սուբյեկտն իրականացնել դեմպինգ», - ասաց նա: