Ձեր վստահելի աղբյուրը

«Պատերազմի հետևանքներից է այն ծանր իրողությունը, որ Հայաստանում հասարակության շրջանում կա լրջագույն անվստահություն պետական պաշտոնական մարմինների տարածած տեղեկատվության, պաշտոնական խոսքի նկատմամբ»,- այս մասին «Հայկական օրակարգ» պանելային քննարկման ժամանակ նշեց Հայաստանի ժուռնալիստների միության նախագահ Սաթիկ Սեյրանյանը:

Անդրադառնալով հասարակություն-պետություն, հասարակություն-վերնախավ փոխհարաբարություններին՝ նշեց, որ այսօր, ցավոք, հասարակության մի հատված պետությունն ասոցիացնում է իշխանությունների հետ, և 44-օրյա պատերազմից հետո պաշտոնական տեղեկատվության, հետևաբար՝ նաև պետության նկատմամբ վստահությունն ուղղակի լրջագույն նահանջ է գրանցել:

Նրա խոսքով՝ պետությունը, իշխանություններն ամեն օր խաբում էին մարդկանց, և հասարակությունը նոյեմբերի 10-ից հետո արթնացավ բոլորովին այլ իրականությունում։

«Առանձին ներկայացուցիչներ, պաշտոնյաներ սոցիալական ցանցերում կամ այլ հարթակներում խոսում էին Գետաշենը գրավելու մասին, բայց մարդիկ արթնացան ու տեսան, որ Շուշին և Հադրութն են հանձնել»,- ընդգծեց Սաթիկ Սեյրանյանը։

Ըստ նրա՝ իշխանափոխությունից և պատերազմից հետո մի նոր իրողություն էլ ի հայտ եկավ։ Մասնավորապես՝ իշխանությունները շարունակում են թիրախավորել մամուլին՝ ասելով, որ իրենք ամեն ինչ փորձում են անել, բայց մամուլը «չի թողնում աշխատել»։

«Եւ մեծ անջրպետ է առաջացել այդ իմաստով։ Ցավալին այն է, այո, որ հասարակությունն իշխանությունը պրոյեկտում է պետության հետ, և այստեղ անելիքներ ունենք»,- նշեց նա։