Ձեր վստահելի աղբյուրը

«Ուկրաինայի շուրջ ստեղծված ծանր իրադրությունը, աշխարհում արագ տեմպ վերցրած սպառազինութունների մրցավազքը, ահաբեկչական, ծայրահեղական կազմակերպությունների խմբերի ակտիվացումն ու  կենտրոնացումը Եվրասիական տարածաշրջանում,  միջուկային զենքի  հնարավոր կիրառման հարցը միջազգային օրակարգի առաջնային քննարկման առարկա դառնալը  հուշում է, որ պայթյունը միայն Ուկրաինայով չի սահմանափակվելու»,- Ազգային ժողովում հայտարարեց «Պատիվ ունեմ» խմբակցության պատգամավոր Տիգրան Աբրահամյանը։

Ըստ նրա, եթե նկատի առնեն այն հանգամանքը, որ մեր տարածաշրջանում գործող  ավանդական, հիմնական կամ պոտենցիալ դերակատարները ուկրաինական  ճգնաժամով պայմանավորված ագրեսիվ դիմակայության փուլում են, աստիճանաբար տեսանելի է դառնում ՆԱՏՕ, ՀԱՊԿ անուղղակի և չի բացառվում ուղիղ բախումը, ապա առավել  հստակ է դառնում, թե Հայաստանի գլխին ինչ նոր սպառնալիքներ են կախված։

«Տարբեր սցենարային զարգացումների վերլուծությունը ցույց է տալիս, որ Հայաստանի և Արցախի շուրջ ձևավորված հետպատերազմյան  անվտանգային միջավայրն առավել մուգ գույներ է ստանում, շփման գծում իրադրությունը կարող է լուրջ փոփոխությունների ենթարկվել։ Այս փուլում դրանք  կարող են դրսևորվել Հայաստանի և Արցախի սահմանային տարբեր բնույթի սադրանքներով,  մեծամասշտաբ  զորավարժություններով, զորքերի կուտակումներով, մեկ այլ փուլում  բարձր ռիսկ կա, որ դրանք կարող են ունենալ առավել ագրեսիվ, թիրախային, մասշտաբային մակարդակ»,- ասաց Տ.Աբրահամյանը։

Նա նշեց, որ Հարավային Կովկասն այն հիմնական  ճակատներից է, որը կարող է բացվել ՌԴ-Արևմուտք դիմակայության պայմաններում, իսկ ճակատի առաջին շարքերում Թուրքիան և Ադրբեջանն են։

«Ստեղծված բարդ և աննախադեպ  ծանր իրադրությունում անհասկանալի  կեցվածք և  դիրք է ընդունել Հայաստանի իշխանությունի, որը երկիրը համապատասխան սցենարային զարգացումներին նախապատրաստելու փոխարեն Զինված ուժերում, պաշտպանության նախարարությունում զբաղված է ներկուսակցական շահեր սպասարկող  փոփոխություններով, զինվորականների նկատմամբ ճնշումներով, որոնք շատ դեպքերում  շանտաժի և  սպառնալիքների էլեմենտներ են պարունակում»,- ասաց ընդդիմադիր պատգամավորը՝ ընդգծելով, որ Ուկրաինայում լայնամասշտաբ ռազմական գործողությունների ծավալման առաջին իսկ օրը  ՀՀ իշխանությունը գլխավոր շտաբի  պետ, տեղակալ, վարչության պետեր փոխելով՝ Զինված ուժերի  ղեկավարման համակարգում արհեստական ճգնաժամ է ստեղծել, ավելին, մինչև հիմա գլխավոր շտաբի պետի պաշտոնում  նշանակում  չի եղել այն դեպքում, որ ստեղծված  բարդ ռազմաքաղաքական իրադրության պայմաններում ամենից  ծանրաբեռնվածը հենց ԶՈւ գլխավոր շտաբն է  գործում։

«Պարտության խորհրդանիշ դարձած  ուժը խելքը գլուխը հավաքելու, սթափություն դրսևորելու և երկիրը  նոր փորձության չտանելու փոխարեն  զբաղված է դատարկ նախաձեռնություններով, մանր-մունր խորամանկություններով և  խնդիրներից փախուստ կատարելու անփառունակ գործողություններով»,- ասաց Տ. Աբրահամյանը։