Ձեր վստահելի աղբյուրը

ՀՀ ԱԺ ութերորդ գումարման երրորդ նստաշրջանի հերթական նիստին քննարկվում է Հաշվեքննիչ պալատի նախագահի պաշտոնում Ատոմ Ջանջուղազյանի թեկնածությունը։

Վերջինս Հաշվեքննիչ պալատի հետ կապված վերհանված հարցերին այս ձևաչափով նպատակահարմար չգտավ պատասխանել։

«Չեմ անդրադառնում հարցերի բովանդակությանը, բայց վստահեցնում եմ, որ եթե ինձ հնարավորություն տրվի կատարել այս ծառայությունը, ես բոլոր հարցերը, որոնք կապված կլինեն ինչպես պալատի գործունեության, այնպես էլ գործունեությունից բխող այլ կառավարման մարմինների և իրավակարգավորող մարմինների հետ, ամենայն պատասխանատվության քննարկման առարկա կդարձնեմ։

Իմ պատկերացրած ճանապարհը դա է, որ ունենանք լավագույնս ձևակերպված իրավակարգավորումներ, որոնք  թույլ կտան մեզ տեղեկացված լինելու, թե հանրային հարստության պաշարն ինչպես է օգտագործվում և դրա արդյունքում մենք՝ որպես հանրություն, ինչ սպասելիք կարող ենք ունենալ ապագայում»,- ասաց նա։ 

Նրա խոսքով՝ որևէ կատարված աշխատանք գործնականում հնարավորություն չունի բավարար համարվել ճիշտ այնպես, ինչպես հնչած հարցերից ոմանց դեպքում, երբ տրված պատասխանը գնահատվում էր որպես չտրված պատասխան կամ ոչ բավարար։ 

«Ես ձեռնպահ կմնամ անդրադառնալ այդ հարցերի պատասխաններին։ Հարցերի զգալի մասը վերաբերում էր նրան, թե այս կամ այն իրավիճակում ես ինչպես կվերաբերվեի իմ աշխատանքային կենսագրության ընթացքում նախկին ժամանակահատվածում։ Ինչպես որ կվարվեի, ես վարվել եմ և այդ գործելակերպը եղել է հրապարակային»,- ասաց Ջանջուղազյանը։

Նշենք, որ Հաշվեքննիչ պալատի նախագահի ընտրության քվեարկությունը տեղի ունենա վաղը։