Ձեր վստահելի աղբյուրը

Ազգային ժողովում կառավարության հետ հարցուպատասխանի ժամանակ  «Հայաստան» խմբակցության պատգամավոր Հռիփսիմե Ստամբուլյանը  հայտարարեց, որ առաջիկայում գազի թանկացում է լինելու, ապա հարցրեց, թե կառավարությունն ունի՞ գնահատականներ՝  ինչ հետևանքներ է ունենալու տնտեսության վրա,  ի՞նչ քայլեր է անում կառավարությունը մեղմելու դրա հետևանքով առաջացող  սոցիալական խնդիրներ։  Նա նաև նշեց, որ ռուս-ուկրաինական իրադարձություններն էլ անդրադառնալու են Հայաստանի տնտեսության վրա։

«Մասնավորապես, հացահատիկի մասով ի՞նչ քայլեր եք ձեռնարկում։ Ռուսաստանի հանդեպ օր-օրի խստացվում են պատժամիջոցները, եթե հերթը հասնի հացահատիկի խնդրին, բնականաբար, ՌԴ կառավարությունը իր քաղաքացիներին է սպասարկելու։ Քանի որ Արցախի շուրջ 75 տոկոսը հանձնեցիք  թշնամուն, նաև թշնամու դաշտում թողեցիք հացահատիկի պաշարները, ի՞նչ քայլեր եք ձեռնարկում այս մասով, թե նորից ասելու եք՝ դուք համար մեկ պատասխանատուն եք, բայց համար մեկ մեղավորը չեք»,- ասաց ընդդիմադիր պատգամավորը։

Նիկոլ Փաշինյանն արձագանքեց, որ չէր մոտենա ամբիոնին, եթե հարցի մեջ չլիներ հերթական պնդումը, որ իրենք Արցախի 75 տոկոսը թողել են թշնամուն։ 

«Ես հիմա պաշտոնապես «Հայաստան» և «Պատիվ ունեմ» խմբակցություններից պահանջում եմ, որ հրապարակային դիրքորոշում արտահայտեն՝ ի վերջո Սանասա՞ր է, թե՞ Կուբաթլու է, և այդպես շարունակ։ Եթե Սանասար է, ոչ Կուբաթլու, ձեր լիդերներն ինչո՞ւ են 20 տարի բանակցել այդ տարածքներն Ադրբեջանին հանձնելու վերաբերյալ։ Ընդ որում դա արել են հրապարակային։ Ձեր ընդունած Մադրիդյան սկզբունքներում գրվել է՝ 7 շրջանները վերադարձվում են Ադրբեջանին։

Հիմա ասեք այ դավաճաններ՝ այդ հողերը, հայրենիքը ինչու եք դրել սակարկությունների վրա, որ հացահատիկի գործ անե՞ք։

Հերիք է գաք այստեղ,  կոկորդիլոսի  արցունքներ  թափեք…

Կամ Սյունիքի մասին խոսողները։ Հենա՝ գլուխները կախ ընդունեցին իրենց մեղքը, ներում խնդրեցին,  15 միլիարդ էլ վճարեցին պետական բյուջե։ Էդ դո՞ւք եք խոսում Սյունիքի մասին, այ թալանչիներ»։

Արձագանքելով Փաշինյանի գոռգոռոցներին ու մեղադրանքներին՝  Հռիփսիմե Ստամբուլյանն ասաց. «Ես Ձեզ մի անգամ էլ եմ զգուշացրել, երբ գալիս եք այստեղ, նկատի ունեցեք, որ դուք գործադիր եք և իրավունք չունեք մատ թափ տալով ու բղավելով պատասխանել այն հարցերին, որոնք բարձրաձայնվում են։ Ձեր ձայնի տոնայնությունը մի բարձրացրեք, նորից եմ կրկնում, Դուք գործադիր եք »։

Ընդդիմադիր պատգամավորը կրկնեց հարցը՝ ի՞նչ է անելու Հայաստանի կառավարությունը հացահատիկային հնարավոր խնդիրը լուծելու համար։

Նիկոլ Փաշինյանին արձագանքն ավելի բարկացրեց։

«Այն, որ դուք օրենսդիր եք, չի նշանակում, տակից-գլխից կարող եք ամեն ինչ խոսալ։ Ով որ ինձ ասի՝ ես հող եմ հանձնել, ես էդ մարդկանց հետ մատով եմ խոսալու ու մատով եմ խոսացել»,-բղավեց Փաշինյանն ու մատը թափահարեց օդում։

Ի պատասխան «Հայաստան» խմբակցության ղեկավար Սեյրան Օհանյանի՝ տեղից արված դիտողությանը, թե մատ մի թափահարեք, Փաշինյանը հիշեց, որ Օհանյանը նախկին է։

«Տո Ձեր ղեկավարության օրոք ի՞նչ է եղել։ Մադրիդյան սկզբունքներում դուք եք գրել, դուք էլ պաշտպանության նախարար եք եղել։ Ուրեմն ձեր չափը իմացեք։ Հերիք եղավ, բոլ եղավ։ Թափ կտամ մատ, պետք լինի ուրիշ բանն էլ...»,-բարձրախոսից հեռացող Փաշինյանի բառերն այլևս չլսվեցին ուղիղ եթերում։

Հարցի համար Հակոբ Արշակյանը նախազգուշացում հայտարարեց Հռիփսիմե Ստամբուլյանին, տեղից Փաշինյանին արձագանքած Սեյրան Օհանյանին։

Սա մեծ դժգոհություն առաջացրեց։

«Լռություն դահլիճում, լռություն դահլիճում»,-գոռում էր Արշակյանը՝ նախազգուշացում հայտնելով Անդրանիկ Քոչարյանին, ապա Գեղամ Նազարյանին։

Արշակյանը «Հայաստան» խմբակցության պատգամավոր Գեղամ Նազարյանին նախ ձայնի իրավունքից զրկեց, ապա դուրս հրավիրեց, հետո ձայնի իրավունքից զրկեց Արամ Վարդևանյանին։

Ի պատասխան, ընդդիմադիր պատգամավորները լքեցին ԱԺ նիստերի դահլիճը։