Ձեր վստահելի աղբյուրը

Ազգային ժողովում կառավարության հետ հարցուպատասխանի ժամանակ «Պատիվ ունեմ» խմբակցության պատգամավոր Տիգրան Աբրահամյանը  հարցերով դիմեց պաշտպանության նախարար Սուրեն Պապիկյանին, որոնք վերաբերվում են ԶՈւ Գլխավոր շտաբի պետի, տեղակալի, վարչության պետերի ազատմանը. «Արդյո՞ք ձեր նախաձեռնությունն է, ձեր առաջարկն է, արդյո՞ք սա տեղավորվում է  ձեր պատկերացրած ռեֆորմների շրջանակներում, իրականում ի՞նչ  նպատակ է հետապնդում։

Չե՞ք կարծում, որ եվրասիական տարածաշրջանում ստեղծված իրավիճակում Գլխավոր շտաբի պետի և շտաբում այդքան մեծ փոփոխություններն  իրականության մեջ շատ ավելի են մեծացնում այն սպառնալիքները, որոնք  փոխանցվում են նաև մեր տարածաշրջանին, հատկապես որ ԳՇ պետի թեկնածու կամ կոնկրետ այդ պաշտոնում այս պահին զինվորական չկա, 7 օրից ավելի է ունենք միայն պաշտոնակատար»։

Տ. Աբրահամյանն ասաց, որ պետք է հասկանալ՝  այսպիսի խորը ճգնաժամի պայմաններում նման խորը փոփոխություններն ինչո՞վ են պայմանավորված։

«Եթե  ԳՇ պետն ունի մեծ տապալում կամ այնպիսի ծանր հանցանք է թույլ տվել, որ նույնիսկ մեկ ամիս չէիք կարող երկարաձգնել նրա պաշտոնավարումը, ապա որևէ պարզաբանում ներկայացրեք, որովհետև այսպիսի փոփոխություններ այսպիսի անվտանգային  միջավայրի պայմաններում ինձ համար որևէ ձևի հասկանալի չէ»,- նշեց ընդդիմադիր պատգամավորը։

Պաշտպանության նախարար Սուրեն Պապիկյանն ասաց, որ իրականում եթե հետևեն տարածաշրջանում և աշխարհում տեղի ունեցող  իրադարձություններին և փոփոխություններին, միայն առաջնորդվեն ըստ այդմ, հնարավոր է  որևէ փոփոխություն չանեն։

«Վերջին մի քանի տարիներին զարգացումների ընթացքն այնպիսին է, որ մշտապես  տեղի են ունենում իրադարձություններ, որոնք վաղօրոք հնարավոր չէ կանխոշորել, բայց միաժամանակ, դուք էինք նախորդ անգամ նշում, որ բարեփոխումներն անհրաժեշտ են և ուշանում են։

Մենք, բնականաբար, այսօր չենք կարող հապաղել, իրավունք չունենք հապաղելու։

Մենք թևակոխել ենք  շատ կարևոր բարեփոխումների ժամանակաշրջան։ Վստահ եմ՝ վաղուց ժամանակն է, որ պաշտպանական գերատեսչությունում պետք է վստահել, հնարավորություն տալ պատերազմի  բովով անցած մեր բազմաթիվ ունակ ու երիտասարդ կադրերի»,- ասաց Ս. Պապիկյանը։

Նախարարը նշեց, որ չի ուզում սա կապել անձերի հետ, բայց միաժամանակ չի  կարող չասել, որ ամեն ինչ կախված է անձերից։

«Առաջարկությունը  բխում է  պաշտպանությունը նախարարության ղեկավարի  դիրքորոշումից, բայց դա համաձայնեցվում է Հայաստանի ղեկավարի հետ։

Ամեն ինչ տեղի է ունենում ըստ կարգի, ընթացակարգերի, քաղաքական  վերադասության»,- ասաց Ս. Պապիկյանը։

Նրա խոսքով, այսօր բոլոր կադրերն իրենց տեղում են, ժամանակավոր  պաշտոնակատարի ինստիտուտն իրավական բոլոր հիմքերը տալիս է նրան ընդունել որոշումներ, կատարել ցուցումներ և հրամաններ. «Կարծում եմ՝  որևէ խնդիր կամ վտանգ սրանով մենք չենք բերել ու չենք պատրասվում բարել։ Ավելին՝ ամեն ինչ միտված է նրան, որ օր առաջ ունենանք ավելի մոտիվացված հրամկազմ և սա ազդակ է պաշտպանական գերատեսչության ենթակայություն տակ գտնվող բոլոր սպաներին։ Բոլոր արժանավոր սպաները հնարավորություն են ունենալու զբաղեցնել բարձր պաշտոններ անկախ նրանց բարեկամ, ծանոթ և այլ կապերից»։

Տիգրան Աբրահամյանն արձագանքեց, որ պատերազմի հետևանքով կան մեծ թվով վիրավորված սպաներ, որոնք այս պահին էլ շարունակում են մնալ  կադրային ռեզերվում, չնայած կան  հաստիքներ, որտեղ կարելի է  նրանց նշանակել, բայց կամ ուշ են նշանակվում կամ դեռ չեն նշանակվել։

Ինչ վերաբերում է կոնկրետ ԳՇ-ում ստեղծված իրավիճակին, օրինակի համար  պատգամավորը նշեց. «Եթե նույնիսկ լավագույն  զորամասի հրամանատարին պայմանական Տավուշից տեղափոխենք Սյունիք կամ հակառակը, ապա նրան տևական ժամանակ է  անհրաժեշտ լինում իրավիճակի մեջ մտնելու, բանակի զարկերակին, օպերատիվ իրավիճակին տիրապետելու համար։

Իմ հարցն այս  տրամաբանության համատեքստում էր։ Կադրային փոփոխությունները, բնականաբար, ինքնանպատակ չպետք է լինեն, բայց փաստացի 7 օրից ավելի է այդպիսի կարևորագույն պաշտոնում չունենք նշանակված մարդ, իսկ  հնարավոր գործողությունների պայմաններում գլխավոր շտաբն ամեն ինչի կենտրոնում է»։

Սուրեն Պապիկյանն արձագանքեց. «Ձեր մտահոգությունն ընդունված է ի գիտություն, պարոն Աբրահամյան, կունենանք»։

Սպաների հետ կապված նախարարը նշեց, որ բոլոր արժանի մարդիկ կզբաղեցնեն իրենց արժանի տեղը։