Ձեր վստահելի աղբյուրը

«Ազգային ժողովում Հանրապետության նախագահի ընտրության հարցի քննարկմանը մասնակցում է միայն քաղաքական մեծամասնությունը, ըստ երևույթին, ընդդիմությունը բոյկոտում է այն պատճառաբանությամբ, որ չի ուզում լեգիմիություն հաղորդի այս գործընթացին, սակայն  այս գործընթացն ամենևին հավելյալ լեգիտիմության կարիք չունի»,- ԱԺ-ում ասաց «Քաղաքացիական պայմանագիր» խմբակցության պատգամավոր Սոնա Ղազարյանը։

Հիշեցնենք, որ ԱԺ-ում ընթանում է Հանրապետության նախագահի ընտրության հարցի քննարկումը։ Միակ թեկնածուն Վահագն Խաչատուրյանն է, ում թեկնածությունն առաջադրել է «Քաղաքացիական պայմանագիր» խմբակցությունը։ 

Ս.Ղազարյանի խոսքով, այսօր նախագահ է ընտրվելու մի խորհրդարանի կողմից, որը  մի շարք միջազգային կառույցների կողմից գրանցվել է որպես արդար, ազատ, թափանցիկ ընտրությունների արդյունքում ձևավորված խորհրդարան։

«2008 թվականի աղետալի դեպքերից 14 տարի անց, իհարկե, այլ մեխանիզմով ընտրում ենք նախագահի։ Ես ուրախ եմ, որ այդ արհավիրքից 14 տարի անց ունենք այն ժողովրդավարությունը, որի մասին երազել ենք։

Պարոն Խաչատուրյան, դուք մեզանից շուտ, մենք մի փոքր ավելի ուշ, միանալով այդ շարժմանը, վեջապես  ունենք անկախ, ազատ ժողովրդավար հանրապետություն, որի կապակցությամբ շնորհավորում եմ բոլորիս»,- ասաց ՔՊ-ական պատգամավոր Սոնա Ղազարյանը։