Ձեր վստահելի աղբյուրը

Ազգային ժողովն առաջին ընթերցմամբ ընդունեց «Քաղաքացիական պայմանագիր» խմբակցության պատգամավոր Հայկ Սարգսյանի կողմից ներկայացված  «Զինվորական ծառայության և զինծառայողի կարգավիճակի մասին» օրենքում փոփոխություններ և լրացում կատարելու մասին օրենքի նախագիծը։  Ընդդիմադիր խմբակցության պատգամավորները ձեռնպահ քվեարկեցին։ Դեմ քվերակող չկար, իսկ կողմ՝ 69 պատգամավոր։

Նախքան քվեարկությունը «Պատիվ ունեմ» խմբակցության պատգամավոր Տիգրան Աբրահամյանն ասաց, որ արձանագրում են՝ այս ուղղությամբ բավականին մեծ անելիքներ կան, փոփոխության անհրաժեշտություն կա, բայց գլխավոր  նպատակների  հասնելու ճանապարհները իրենց մոտ էականորեն տարբերվում են նախագածի հեղինակի մոտեցումներից։

«Մեր վերջնական  դիրքորոշումը մենք կձավորենք առաջինից երկրորդ ընթերցում ժամանակահատվածում, երբ  փոփոխությունները վերջնական տեսք կստանան։ Այս  պահին մենք նախաձեռնությանը ձեռնպահ ենք քվեարկում»,- հայտարարեց նա։

«Հայաստան» խմբակցության  ղեկավար Սեյրան Օհանյանն ասաց, որ  այս նախաձեռնության շրջանակներում բավականին լուրջ քննարկում են իրականացրել։

«Իրականում,  զինվորական ծառայության հետ կապված նախաձեռնություններին դրական կողմից մոտ լինելով, այնուամենայնիվ, այստեղ մենք խնդիրներ ենք տեսնում՝ ընդհանուր զորահավաքային, անհատական  պատրաստության վերաբերող։ Մենք մեր  առաջարկությունները ներկայացրել ենք, առաջինից երկրորդ ընթերցման հատվածում կքննարկենք։ Մենք էլ ձեռնապահ քվերակենք»,- նշեց նա։

Հիշեցնենք, որ նախագծով առաջարկվում է պարտադիր զինվորական ծառայությանից ազատվելու հնարավորութուն տալ պատերազմի ժամանակ և Հայաստանի Հանրապետության պաշտպանության մարտական գործողությունների ժամանակ զոհված զինծառայողների եղբայրներին և որդիներին։

«Պատիվ ունեմ» խմբակցության պատգամավոր Թագուհի Թովմասյանի կողմից ներկայացված «Զինվորական ծառայության և զինծառայողի կարգավիճակի մասին» օրենքում փոփոխություններ կատարելու մասին օրենքի նախագիծը չընդուվեց։ Իշխող ՔՊ-ականները դեմ քվեարկեցին, կողմ քվեարկեց 22 պատգամավոր, ձեռնպահ՝ 2։

ՔՊ-ական պատգամավոր Անդրանիկ Քոչարյանն ասաց, որ քննարկումների արդյունքում արձանագրվեց՝  ներկայացված օրենսդրական նախաձեռնությունն,  այնուամենայնիվ, չի լուծում խնդիրները, այլ առաջացնում է  նաև իրավական խնդիրներ, ուստի առաջարկեց իրենց խմբակցությանը  դեմ քվերակել։

Թագուհի Թովմասյանի խոսքով, իհարկե, կանխատեսելի էր Անդրանիկ Քոչարյանի դիրքորոշումը։

«Փաստորեն այն, որ նախագիծը հետ է գնում, քննարկվում է պատկան գերատեսչությունների  հետ, ստանում է այդ գերատեսչություների դրական  արձագանքը, արձանագրվում է բոլոր կողմերից, որ կա խնդիր, այսօր վարձով ապրող զինծառայողները  վարձով ապրելու  համար շարունակում են խարդախության հոդվածով դատապարտվել, ձեր առաջարկով  այդ գործընթացը կշարունակվի, զինծառայողները կշարունակեն դատապարտվել, իսկ  լուծում դուք այդպես էլ չառաջարկեցիք»,- հայտարարեց Թ.Թովմասյանը։

Նախագծով առաջարկվում է՝ «ծառայության վայրում ծառայողական բնակարանով չապահովվելու դեպքում պայմանագրային զինծառայողներին հաշվարկվում է ամսական դրամական փոխհատուցում` Հայաստանի Հանրապետության կառավարության սահմանած կարգով և չափերով»: Մասնավորապես, առաջարկվում է զինվորականներին միայն կադաստրի եզրակացությամբ տալ վարձավճարի փոխհատուցում։

Ազգային ժողովն առաջին ընթերցմամբ ընդունեց կառավարության կողմից ներկայացված Հայաստանի Հանրապետության հարկային օրենսգրքում փոփոխություններ և լրացումներ կատարելու մասին օրենքի նախագիծը։ Ընդդիմադիր պատգամավորները ձեռնպահ քվեարկեցին այս նախագծին։

Առաջին ընթերցմամբ ընդունվեց ԱԺ ՔՊ-ական պատգամավորներ Բաբկեն Թունյանի, Նարեկ Զեյնալյանի, Լուսինե Բադալյան կողմից ներկայացված  ՀՀ Քաղաքացիական օրենսգրքում փոփոխություններ և լրացումներ կատարելու մասին և  Գույքի նկատմամբ իրավունքների պետական գրանցման մասին օրենքում լրացումներ և փոփոխություն կատարելու մասին նախագծերը. կողմ՝ 68,  ձեռնպահ՝ 17։

ՔՊ-ականներ Գևորգ Պապոյանի, Միքայել Թումասյանի, Արուսյակ Մանավազյանի կողմից ներկայացված «Հայաստանի Հանրապետության հարկային օրենսգրքում» փոփոխություններ կատարելու մասին օրենքի նախագիծն ընդունվեց առաջին ընթերցմամբ. կողմ 69, դեմ 0, ձեռնպահ 21։

Կառավարության կողմից ներկայացված «Անկախ պետությունների համագործակցության մասնակից պետությունների բնակչության զբաղվածությանն աջակցելու ոլորտում համագործակցության մասին» համաձայնագիրը վավերացնելու մասին օրենքի նախագիծն ընդունվեց 89 կողմ, 0 դեմ, 1 ձեռնպահ ձայների հարաբերակցությամբ։

«Ահաբեկչության կանխարգելման մասին» Եվրոպայի խորհրդի կոնվենցիայի լրացուցիչ արձանագրությունը վավերացնելու մասին նախագիծն ընդունվեց  88 կողմ, 0 դեմ, 1 ձեռնպահ ձայների հարաբերակցությամբ։

«Անկախ պետությունների համագործակցության մասնակից պետությունների՝ թանգարանային գործի բնագավառում համագործակցության մասին» համաձայնագիրը վավերացնելու մասին օրենքի նախագիծն ընդունվեց միաձայն՝  89 կողմ։