Ձեր վստահելի աղբյուրը

Ազգային ժողովում քննարկվում է ԱԺ «Պատիվ ունեմ» խմբակցության պատգամավոր Թագուհի Թովմասյանի հեղինակած «Զինվորական ծառայության և զինծառայողի կարգավիճակի մասին» օրենքում փոփոխություններ կատարելու մասին նախագիծն առաջին ընթերցմամբ ընդունելու մասին հարցը։ Նախագծով առաջարկվում է՝ «ծառայության վայրում ծառայողական բնակարանով չապահովվելու դեպքում պայմանագրային զինծառայողներին հաշվարկվում է ամսական դրամական փոխհատուցում` Հայաստանի Հանրապետության կառավարության սահմանած կարգով և չափերով»:

Թ.Թովմասյանը մանրամասնեց, որ այսօր պայմանագրային զիծառայողներին սոցիալական երաշխիքների անվան տակ վարձավճարի համար տրվող գումարները  դառնում են պատուհաս զինծառայողների համար. «Զինծառայողներն  ապրում են վարձով, նաև դատապարատվում խարդախության համար, քանի որ  այն բնակարանում, որտեղ ապրում են, քաղաքացին չի համաձայնում  կամ անկախ իր կամքից չունի տան վկայական, չի կարողանում կնքել պայմանագիր, զինծառայողը ստիպված է լինում գնալ ուրիշ տան հետ կնքել պայմանագիր, բերել այդ վարձակալության պայմանագիրը՝  նոտարով հաստատված կարգով, ու ստանալ վարձավճարի փոխհատուցում»։

Նախագծի հեղինակն ասաց, որ այս ավանդույթը տարիներ շարունակ գործել է, հազարավոր զինծառայողներ օգտվել են այս իրավունքից։ Նա ասաց, որ ի պատասխան իր գրության, դատախազությունից ասել են, որ  81 քաղաքացու նկատմամբ հարուցվել է քրեական գործ խարդախության հոդվածով, այսինքն զինծառայողը վարձով ապրելու համար խարդախության հոդվածով դատվում է։

«Որպեսզի այս իրավիճակը կանխենք և հնարավոր այս 81 հոգին չդառնան 800 կամ  8000, առաջարկում է այսուհետև ոչ թե պահանջել վարձակալության անհրաժեշտ վկայականը՝  նոտարական վավերացմամբ, այլ միայն  կադաստրի  կողմից տրված տեղեկանքը, որ զինծառայողն իր  բնակության վայրից 30 կմ շառավիղով որևէ սեփականություն չունի, դա համարվի բավարար»,- ասաց Թ.Թովմասյանը։

Նա նշեց, որ այս նախագիծը զինծառայողներին տրվող սոցիալական երաշխիքների տրման եղանակի հեշտացման պայմանների մասին է, որ զինծառայողը ստանա բնակարանի փոխհատուցման  վարձավճարն ավելի հեշտ պայմաններում։

Կառավարությունը բացասական եզրակացություն է տվել այս նախագծին։

Հարակից զեկուցող պաշտպանության նախարարի տեղակալ Արման Սարգսյանն ասաց, որ կառավարությունը գտնում է այս առաջարկով փոփոխությունները չեն բխում սույն օրենքի 65-րդ հոդվածի կարգավորման էությանից, գտնում է, որ օրենքի նախագծի ընդունումը զինծառայողների  բնակարանային ապահովության հարցում որևէ դրական առաջընթացի չի հանգեցնելու։ 

Կառավարությունն առաջարկել է ձեռնպահ մնալ օրենքի նախագծով առաջարկվող փոփոխությունների կատարումից։