Ձեր վստահելի աղբյուրը

ԱԺ «Քաղաքացիական պայմանագիր» խմբակցության պատգամավոր Հայկ Սարգսյանը ԱԺ նիստում ներկայացրեց իր հեղինակած «Զինվորական ծառայության և զինծառայողի կարգավիճակի մասին» օրենքում փոփոխություններ և լրացում կատարելու մասին նախագիծն առաջին ընթերցմամբ ընդունելու մասին հարցը։

Նա նշեց, որ իր հեղինակած  օրենսդրական  նախաձեռնության իմաստը շատ պարզ է՝ պարտադիր զինվորական ծառայությանից ազատվելու հնարավորութուն տալ պատերազմի ժամանակ և Հայաստանի Հանրապետության պաշտպանության մարտական գործողությունների ժամանակ զոհված զինծառայողների եղբայրներին և որդիներին. «Այսինքն՝ այն զորակոչիկները, ովքեր ունեն պատերազմի ժամանակ զոհված հայր, մայր, քույր կամ եղբայր, հնարավորություն կունենան ազատվել պարտադիր զինվորական ծառայությունից»։

Հ. Սարգսյանն ընդգծեց, որ օրենքի ընդունումից հետո չի ընկնի զինված ուժերի մարտունակությունը, լրացուցիչ անվտանգային խնդիրներ չեն առաջանա այն պատճառով, որ օրենքի շահառուների թիվը լինելու է բավականին քիչ։ Օրինակ, առաջիկա՝ 2022 թ. ամառային զորակոչին սպասվում է օրենքից կօգտվի 10 քաղաքացի, ձմեռային զորակոչին՝ 17 քաղաքացի, 2023 թ. ամառային զորակոչին՝ 11 զորակոչիկ, ձմեռային զորակոչին՝ 14։ ՔՊ-ական պատգամավորի խոսքով, ամեն զորակոչին 10-20 զինակոչիկի ազատելուց որևէ խնդիր չի առաջացնի։ Բացի այդ, ըստ նրա,  այսօր գործող կարգավորումներով էլ  իր կողմից նշված զորակոչիկների խումբը չի իրականացնում մարտական հերթապահություն։

Նախագծի հեղինակն ասաց, որ այն զորակոչիկները, ովքեր կօգտվեն օրենքից ու կազատվեն  պարտադիր զինվորական ծառայությունից, սահմանաված կարգով կհաշվառվեն  պահեստազորում, հնարավորություն կտա նրանց անցնել պայմանագրային զինվորական ծառայության կամ աշխատել այլ ուժային կառույցներում։

ԱԺ «Պատիվ ունեմ» խմբակցության պատգամավոր  Թագուհի Թովմասյանն ասաց, որ ինքը գրավոր առաջարկությամբ է հանդես գալու, բայց ուզում է հասկանալ՝ ի՞նչ  խոչընդոտ կարող է լինել, եթե օրենքը տարածվի նաև ՊՆ ժամկետային բոլոր զինծառայողների մահվան հանգամանքների դեպքում, օրինակ՝ զինծառայողը մահացել է ծառայության ընթացքում վթարից, էլեկտրահարվելուց, զորամասում միջադեպի հետևանքով։

Հ. Սարգսյանն ասաց, որ կիսում է Թ. Թովմասյանի կարծիքը, համամիտ է, առաջարկությունը ստանալու դեպքում կքննարկեն հանձնաժողովում, կարծում է՝ կընդգրեն նաև այդ զինակոչիկների  ընտանիքի անդամներին։

Միաժամանակ նա նշեց, որ այն  քաղաքացիները, ովքեր չեն ցանկանա օգտվել այս արտոնությունից ու կցանկանան գնալ պարտադիր զինվորական ծառայության, նրանք կկարողանան հրաժարվել այդ հնարավորությունից։

«Այս առաջարկը հիմնականում ուղղված է ծնողների հոգեբանական վիճակը մեղմելուն»,- ասաց իշխող խմբակցության պատգամավորը։ 

Հայկ Սարգսյանը կիսեց աև «Հայաստան» խմբակցության ղեկավար Սեյրան Օհանյանի  կարծիք, որ այս խմբի անձինք պետք է մասնակցեն մարզական վարժանքների, իսկ կլինի  դա մեկամսյա, թե վեցամսյա, պետք է որոշի համապատասխան գերատեսչությունը՝ կախված իր հնարավորություններից, թե ինչ  ժամանակահատվածում կարող է այդ հմտությունները փոխանցել։ 

«Պատիվ ունեմ» խմբակցության պատգամավոր Տիգրան Աբրահամյանն  առաջարկեց արտոնությունները սահմանել այլ ձևով. առավել նպատակահարմար է, որ սահմանվի կոնկրետ արտոնություն այդ խմբի քաղաքացիների համար պայմանական Պաշտպանության նախարարի հրամանով կամ մեկ այլ կարգավորման ձևով ՊՆ-ում, Գլխավոր շտաբում, ԱԱԾ սահմանապահ զորքերի կենտրոնական ապարատներում կամ Երևանին կից զորմասերում ծառայեն: