Ձեր վստահելի աղբյուրը

ԱԺ «Հայաստան» խմբակցության պատգամավոր Ագնեսա Խամոյանն առաջարկել է իշխանությանը քննիչ հանձնաժողով ստեղծել և պարզել՝ արդյո՞ք ՀՀ երկրորդ նախագահ Ռոբերտ Քոչարյանը «Զանգեզուրի պղնձամոլիբդենային կոմբինատ» ՓԲԸ-ում մասնաբաժին ունի, թե ոչ։

Panorama.am-ի հետ զրույցում  նա ասաց, որ ընդդիմության ձայները բավարար են նման հանձնաժողով ստեղծելու համար, բայց իր առաջարկի տրամաբանությունն այն է, որ իշխանությունը ստեղծի, քանի որ հենց իշխանության ներկայացուցիչներն են ասում՝ պետք է պարզել Ռ.Քոչարյանը փայ ունի, թե չունի «Զանգեզուրի պղնձամոլիբդենային կոմբինատ» ՓԲԸ-ում։

Միաժամանակ  ընդդիմադիր պատգամավորը համոզված է, որ իշխանությունը նման հանձնաժողով ստեղծելու նախաձեռնությամբ հանդես չի գա, քանի որ «իրենք իրենց ոտքին չեն կրակի»։

«Ես նման առաջարկությամբ հանդես եկա ի պատասխան ՔՊ-ական պատգամավորներից մեկի այն հայտարարության, որ պետք է պարզել՝ Ռոբերտ Քոչարյանը կամ նրա ընտանիքի անդամներից որևէ մեկը փայ ունի՞ «Զանգեզուրի պղնձամոլիբդենային կոմբինատ»-ում։ Ես նախ արձագանքեցի, որ 4 տարի այս թիմն իշխանության է, դեռևս, փաստորեն, չի պարզել՝ Քոչարյանը կամ նրա ընտանիքի անդամներից որևէ մեկը փայ ունի՞ կոմբինատում, թե՞ ոչ։ Տարիներ շարունակ այդ կեղծիքը տիրաժավորվել է  ինչպես մամուլի կողմից, այնպես էլ այսպես կոչված ընդդիմադիր որոշ պատգամավորների կողմից։ Հավատարիմ մնալով այդ ոճին՝ այսօրվա իշխանությունները, ովքեր նախկինում ընդդիմություն էին, շարունակում են նույն կեղծիքները տիրաժավորել։

Իմ առաջարկությունը շատ հստակ էր ձևակերպված՝ եթե 4 տարի իշխանության են ու դեռ չեն պարզել Ռոբերտ Քոչարյանը փայ ունի, թե ոչ պղնձամոլիբդենային կոմբինատում, ստեղծեն  քննիչ հանձնաժողով ու պարզեն»,- ասաց Ա.Խամոյանը։

Միաժամանակ նա հավելեց, որ իր երկրորդ առաջարկության պատճառով իշխանությունը չի գնա այդ քայլին. «Այդ քննիչ հանձնաժողովը նաև պետք է պատասխանի այն հարցին, թե  ինչպես ստացվեց պետական մակարդակով ռեկետը։ Խոսքը Նիկոլ Փաշինյանի աշխատակազմին կոմբինատի 15 տոկոս բաժնեմասի փոխանցման մասին է։  Պետք է պատասխանել հարցերին՝ որտե՞ղ են ձեռք բերվել այդ պայմանավորվածությունները, որտե՞ղ են տեղի ունեցել բանակցությունները, ո՞ւմ միջև է ձեռք բերվել այդ պայմանավորվածությունը, ինչո՞ւ է 15 տոկոսը փոխանցվել Նիկոլ Փաշինյանի աշխատակազմին և ոչ թե իրավասու նախարարությանը,  ինչո՞ւ իր հավատարիմ մարդկանցից մեկին գործուղեց կոմբինատի խորհուրդ, այնուհետև դուրս եկավ։ Իշխանությունը պնդում է, որ 15 տոկոսը Փաշինյանի  աշխատակազմին փոխանցելու մեջ որևէ հանցակազմ գոյություն չունի։

Այս բոլորը հարցեր են, որոնց քննիչ հանձնաժողովը ևս պետք է պատասխան տա։ Ինձ համար ակնհայտ է, որ իշխանություններն իրենք իրենց ոտքի վրա չեն կրակի և չեն ստեղծի հանձնաժողով՝ պատասխանելու այդ հարցերին, բայց կշարունակեն իրենց ոճին հավատարիմ ապատեղեկատվություն տարածել»։

Ա. Խամոյանն ասաց՝ ինքն առաջարկել է և եթե իշխանությունն իր հայտարարություններում արդար է, ապատեղեկատվություն չի տարածում, պետք է ստեղծեն ու քննեն, լույս սփռեն այս ողջ պատմության վրա։

«Իսկապես զավեշտալի է, երբ մարդիկ 4 տարի լինելով իշխանություն, իբր չեն պարզել՝ ով որտեղ փայ ունի։ Ստույգ տեղեկատվության եմ տիրապետում, որ վարչապետ նշանակվելուց հետո Նիկոլ Փաշինյանի առաջին գործն է եղել խոշորացույցով ստուգել որ ընկերությունում փայ ունի պարոն Քոչարյանը, քանի տոկոս ու ամեն անգամ բախվել է հիասթափության։

Տարիներ շարունակ  այս իշխանության ներկայացուցիչները հայտարարում էին «Սպայկա»-ում էլ փայ ունի։ Հետաքրքիր է՝ պարզեցի՞ն, թե՞ ոչ, թե գուցե,  ըստ օդում կախված լուրերի, արդեն «Սպայկա»-ի տնօրինության հետ հարաբերությունները կարգավորել են ու էլ հետաքրքիր չէ՝ ով փայ ուներ, ով չուներ»,- ասաց Ա. Խամոյանը։

Ըստ նրա, ակնհայտ է՝ իշխանություններն ու անձամբ Նիկոլ Փաշինյանը շատ լավ էլ պարզել են, որ տարիներ շարունակ իրենց կողմից տիրաժավորվող մտքերն ընդամենը հերյուրանքներ են եղել։