Ձեր վստահելի աղբյուրը

«Իրական և արմատական լուծումը մեր զինավանների ընդլայնում է, բայց պետք է հասկանալ առկա կարգավորումներն ինչ խնդիրներ են ստեղծում»,- ԱԺ-ում «Պատիվ ունեմ» խմբակցության պատգամավոր Թագուհի Թովմասյանի  կողմից ներկայացված «Զինվորական ծառայության ու զինծառայողի կարգավիճակի մասին» օրենքում փոփոխություն կատարելու մասին օրենքի նախագծի քննարկմանն ասաց նույն խմբակցության պատգամավոր Տիգրան Աբրահամյանը։

Հիշեցնենք, որ նախագծով առաջարկվում է՝ «ծառայության վայրում ծառայողական բնակարանով չապահովվելու դեպքում պայմանագրային զինծառայողներին հաշվարկվում է ամսական դրամական փոխհատուցում` Հայաստանի Հանրապետության կառավարության սահմանած կարգով և չափերով»: Մասնավորապես, առաջարկվում է զինվորականներին միայն կադաստրի եզրակացությամբ տալ վարձավճարի փոխհատուցում։

Տ. Աբրահամյանն ասաց, որ հարցի քննարկման ժամանակ հնչած որոշակի հարցադրումներ իրենց մեջ ունեին ռացիոնալություն, բայց իրականության  մեջ համեմատելով՝  եղած կարգավորումները շատ ավելի մեծ ճահճացման են բերել, քան Թագուհի Թովմասյանի առաջարկած  փոփոխության դեպքում կարող է լինել։

«Հեռու եմ այն մտքից, որ մենք այս դեպքում բերել ենք լավագույն լուծումը, բայց սա ավելի  օպտիմալ լուծում է, քան ունենք նշյալ կարգավորումներով։

Եթե չենք գնում այս լուծմանը, ապա այս տեսանկյունից  շատ ավելի մեծ խնդիր ստեղծում ենք  զինծառայողների համար։ Կրկնում եմ՝  ստվերի ռիսկը ես գնահատում եմ,  կա նման բան, բայց երբ բերվում է ստվերի ռիսկն ու զինծառայողի՝ սեփական գրպանից բնակարանի համար վճարելու խնդիրը, այս տեսանկյունից, բնականաբար, կողմ եմ ու լուծումը տեսնում եմ  Թագուհի Թովմասյանի ներկայացրած նախաձեռնության մեջ»,- ասաց պատգամավորը։

Տիգրան Աբրահամյանը շեշտեց, եթե նման նախաձեռնությամբ հանդես գար իշխանությունը, իր մոտ առանձնապես բան չէր փոխվելու, քանի որ այստեղ զինծառայողների շահերն ամրագրելու ու պաշտպանելու խնդիր կա, և, կարծում է, այս տեսանկյունից որոշակի լուծում տալիս է հենց իր գործընկերոջ նախաձեռնությունը։

«Հայաստան» խմբակցության ղեկավար Սեյրան Օհանյանն ասաց, որ խնդիրն առկա է եղել հենց իր՝ պաշտպանության նախարար եղած ժամանակահատվածից, այլ մոտեցումներով են այդ հարցը լուծել, որոշ դեպքերում բարերարների միջոցներ օգտագործելով։

«Դա լուծում չէ։ Կարծում եմ՝ այս կարգավորումն այս ժամանակահատվածի համար միակ մոտեցումն է, քանի որ այս խնդրին կարգավորումների տարբերակված մոտեցում պետք է ցուցաբերել»,-ասաց նա՝ առաջարկելով այս նախագիծն ընդունել որպես հիմք, բայց ամենահեռանկարային լուծումը համարեց հեվալավճարները։