Ձեր վստահելի աղբյուրը

Հասարակական կազմակերպություններն առաջիկայում հանդես կգան հայտարարությամբ՝ կապված Իրավական ակտերի նախագծերի միասնական կայքում (e-draft.am) «Շրջակա միջավայրի վրա ազդեցության գնահատման և փորձաքննության մասին» օրենքում փոփոխություն կատարելու նախագծի վերաբերյալ։

Այն ներկայացրել է ՀՀ Շրջակա միջավայրի նախարարությունը, որը չի քննարկվել հասարակական հատվածի հետ։

Panorama.am-ի հետ զրույցում իրավապաշտպան Օլեգ Դուլգարյանը նշեց, որ իրենց ակնկալիքները ՇՄԱԳ օրենքի փոփոխությունների մասով չի արդարացվել և ավելին՝ նոր փոփոխությունները որևէ էական բան չեն փոխում։

«Մի երկու աննշան կետերով փոփոխություն է նախատեսվում, որոնք ավելի վատն են, քան՝ գործողը։ Այսինքն՝ համայնքի շահերի տեսանկյունից որևէ փոփոխություն չի նախատեսվում։ Ավելին՝ նախագծով հանքարդյունահանող ընկերությունը կարող է գալ համայնք՝ առանց համայնքի  համաձայնությունը  ստանալու»,- ասաց Դուլգարյանը։

Նրա խոսքով՝ վերջին տարիներին մարդիկ նախընտրում են տապալել հանրային լսումները, քան մասնակցել դրանց։ Պատճառն, ըստ Դուլգարյանի այն է, որ համայնքներում նախաձեռնվող ՇՄԱԳ լսումներին տեղացիների ձայնը լսելի չէ։

«Եթե համայնքի բնակիչները նույնիսկ դեմ արտահայտվեն որևէ նախագծի մասին, ՇՄԱԳ օրենքը չի երաշխավորում, որ նրանց ձայնը լսելի կլինի և գործընթացը կկասեցվի, քանի որ օրենքով կարևորը լսումների անցկացումն է, այլ ոչ այն, թե համայնքն ինչ կասի։ Եվ նոր նախագծով այս առումով որևէ փոփոխություն չկա»,- ընդգծեց իրավապաշտպանը։

Ավելին, նախնական գնահատման փուլում հանրային լսումների անցկացման քանակը ևս կրճատվել է, ինչը նույնպես չի բխում համայնքների շահերից։

Դուլգարյանի դիտարկմամբ՝ օրենքը փոխում են առանց հանրային քննարկման և փորձագիտական առաջարկները հաշվի առնելու: Նորանշանակ նախարարը դեռևս այս հարցով քննարկում չի կազմակերպել և չի լսել մասնագետների մտահոգությունները։

«Մենք ուզում ենք, որ համայնքի բնակչի կարծիքը լինի որոշիչ։ Եթե նա ասում է՝ «ոչ», ապա գործընթացը պետք է դադարեցնել, այլապես նորից կշարունակվի հանրային լսումները տապալելու միտումը։ Տեսնում եմ միտում, որ ցանկություն կա նախկին օրենքը մնա նույնը և, եթե կարիք լինի օրերից մի օր հանք բացելու և համայնքի բնակիչները կողմ չլինեն դրան, իսկ Կառավարությունը դեմ չլինի, ապա կգնան այդ քայլին և հանքը կբացվի»,- ասաց Դուլգարյանը։

Նրա խոսքով՝ նոր փոփոխություններում նույնիսկ ներառված չեն հանրային առողջությանը վերաբերող ռիսկերը, թե հանքը բացվելուց հետո այդ գործունեությունը ինչ վնասներ կարող է տալ մարդու առողջությանն ու շրջակա միջավայրին։

Հարցին, թե արդյոք բոլոր մատնանշված խնդիրների մասին տեղյակ են պաշտոնատար անձինք, իրավապաշտպանը նշեց, որ թե′ մտահոգությունները, թե′ առաջարկությունները գրավոր ձևով ներկայացրել են պատկան մարմիններին, սակայն դեռևս հանդիպում կամ քննարկման հնարավություն չի ընձեռնվել։

Հավելենք, որ  ՇՄԱԳ օրենքում փոփոխություններ կատարելու այս նախագծին դեմ են մի շարք հասարակական կազմակերպություններ, ավելին, ՇՄՆ Հասարակական խորհրդի անդամությունից արդեն դուրս են եկել 7 հոգի։