Ձեր վստահելի աղբյուրը

«Հենակետ» վերլուծական կենտրոնն ամփոփել ու հրապարակել է համառոտ տեղեկություններ  անցած շաբաթվա ընթացքում Ադրբեջանի հետ կապված կարևոր իրադարձությունների մասին.

«Ադրբեջանի ռազմական ոլորտին վերաբերող իրադարձություններ

Շաբաթվա ընթացքում Ադրբեջանի ցամաքային զորքերի ականանետային ստորաբաժանումները անցկացրել են հրաձգության վարժանքներ։ Իսկ ադրբեջանական զորամասերից մեկում մարտավարական վարժանքներ են անցկացվել։

Ադրբեջանի ՊՆ-ից հայտնել են, որ Նախիջևանի կայազորի զորքերի 2022 թ․-ի ուսումնական տարվա համակարգման պլանի համաձայն՝ անցկացվել է հատուկ տակտիկական զորավարժություն «Մարտական գործողությունների վարումը սաստիկ ցրտի պայմաններում» թեմայով։

Վարժանքներում ներգրավվել են նաև ԱԻՆ փրկարարական ջոկատները։ Նախիջևանի կայազորի զորքերում անցկացվել են նաև գումարտակների, դիվիզիոնների հրամանատարների և նրանց տեղակալների  պատրաստության վարժանքներ:

Ադրբեջանի վարչապետ Ալի Ասադովը և Ալիևի աշխատակազմի ղեկավար Սամիր Նուրիևը Սանասարի (Ղուբաթլի) շրջանում ծանոթացել են Պետական սահմանապահ ծառայության առանձին սահմանապահ դիվիզիայում անձնակազմի ծառայության պայմաններին և զննել ռազմական տեխնիկան։

Ադրբեջանական լրատվամիջոցները գրել են, թե ուկրաինացիները ռազմական գործողությունների ընթացքում օգտագործում են «Скиф» ուկրաինա-բելառուսական հակատանկային հրթիռային համակարգերը։ Ադրբեջանը նույնպես գնել է այդ համակարգերից, որոնք տեղադրվել են թուրքական «Cobra» զրահամեքենայի վրա։

Ադրբեջանի մարդու իրավունքների հանձնակատարի 2021թ. զեկույցում առաջարկվել է կանանց հնարավորություն տալ սովորելու բարձրագույն ռազմական ուսումնարաններում։

Արցախից գրավված տարածքներում ադրբեջանական նախագծերի մասին

Թուրքական «Haber Global» հեռուստաալիքը ռեպորտաժ է պատրաստել Արցախից գրավված տարածքներում իրականացվող վերականգնման աշխատանքների մասին։ Ղարաբաղում Ադրբեջանի նախագահի հատուկ ներկայացուցիչ Էմին Հուսեյնովը  Twitter-ի իր էջում գրել է, թե սկսվել են Բարդա- Ակնա (Աղդամ) ճանապարհի ասֆալտապատման աշխատանքները։

Ադրբեջանում Մեծ Բրիտանիայի դեսպան Ջեյմս Շարպը Ջրական (Ջաբրայիլ) կատարած այցի ընթացքում ծանոթացել է այնտեղ իրականացվող վերակառուցման աշխատանքներին։ Նա իր թվիթերյան էջում գրել է, թե բրիտանական ընկերությունները պատրաստ են մասնակցել Ղարաբաղի վերականգնմանը։

«Ազերիշըգ» ընկերությունը հայտարարել է, որ զբաղվում է Կովսականի (Զանգելանի) միջազգային օդանավակայանը էլեկտրական հոսանքով ապահովելու հարցով։ «Ադրբեջանական ավիաուղիներ»-ի (AZAL) նախագահ Ջահանգիր Ասկերովը հայտարարել է, թե Կովսականի օդանավակայանի շինարարական աշխատանքները նախատեսվում է ավարտել այս տարի։ Նրա խոսքով՝ օդանավակայանը կկարողանա ընդունել բոլոր տեսակի օդանավեր, այդ թվում՝ բեռնատար ինքնաթիռներ։

«Ազերսու» ընկերությունը տեղեկացրել է, որ շարունակում է Արցախից գրավված տարածքներում ջրամատակարարման համակարգերի վերականգնման, վերակառուցման աշխատանքները և ընդհանուր առմամբ խմելու ջրով ապահովվել է շուրջ 400 օբյեկտ։

Արցախում ադրբեջանցիները մարտի 4-ին  կրակել են Նոր Շեն գյուղի ուղղությամբ, այնուհետև բարձրախոսով հայտարարել են, որ գյուղացիները լքեն տարածքը, հակառակ պարագայում  բռնի ուժով իրենք  դա կանեն:

Հայաստանի Գեղամասար խոշորացված համայնքի ղեկավար Հակոբ Ավետյանը պատմել է, որ Գեղամասարի մի քանի գյուղեր զրկվել են ջրից, քանի որ ջրի աղբյուրներն անցել են ադրբեջանցիների հսկողության տակ։

Տարածաշրջանային նախագծերի մասին

Թուրքիայի արտգործնախարար Չավուշօղլուն Ալիևի հանդիպման ժամանակ հայտարարել է, թե Անկարան ու Բաքուն ձեռնարկում են բոլոր անհրաժեշտ քայլերը Շուշիի հռչակագիրը կյանքի կոչելու համար։

Ադրբեջանական լրատվամիջոցները նշել են, թե Իտալիային բաժին է ընկնում Ադրբեջանի նավթի արտահանման գրեթե կեսը։ Իսկ Հունգարիան գազի ներկրման շուրջ բանակցություններ է վարում Ադրբեջանի հետ։

Գերիների և ականապատման մասին

Մարտի 5-ին Բաքվում ընթացող շինծու քրեական գործի շրջանակներում երկու հայ գերիներ ազատազրկման են դատապարտվել։ Ադրբեջանի ականազերծման գործակալությունը (ANAMA) տեղեկացրել է, որ մեկ ամսում Ղարաբաղում ականներից և չպայթած զինամթերքից մաքրել է 379,6 հեկտար տարածք։

Ադրբեջանում Մեծ Բրիտանիայի դեսպան Ջեյմս Շարփն այցելել է Վարանդայի (Ֆիզուլիի) շրջանի Հորադիզ ավան։ Նա նշել է, որ իրենք շարունակելու են  համագործակցել ադրբեջանական կողմի հետ ականազերծման հարցում։

Ուկրաինայի հակամարտության մասին

Ջեյհուն Բայրամովը Ռուսաստանին եւ Ուկրաինային երկխոսության կոչ է արել։  Հարավային Կովկասի և Վրաստանի ճգնաժամի հարցերով ԵՄ հատուկ ներկայացուցիչ Տոյվո Կլաարը շնորհակալություն է հայտնել Ադրբեջանին` Ուկրաինային ցուցաբերվող մարդասիրական աջակցության համար։

Ֆրանսիայի նախագահ Էմանուել Մակրոնը մարտի 1-ին զանգահարել է Իլհամ Ալիևին։ Նրանք քննարկել են Ուկրաինայում տիրող ճգնաժամային իրավիճակը և մտքեր փոխանակվել էներգետիկ հարցերի շուրջ։

Բաքվում մարտի 4-ին հակառուսական ակցիա է տեղի ունեցել։ Ադրբեջանական ԶԼՄ-ների հաղորդմամբ՝ ոստիկանությունը թույլ չի տվել ակցիայի մասնակիցներին մոտենալ դեսպանատան շենքին։ Ցուցարարները պահանջել են դուրս բերել ռուսական զորքերը Ուկրաինայից։

Ուկրաինայում Ադրբեջանի դեսպանատունը հայտնել է, որ Օդեսայից Մոլդովա տարհանման ժամանակ գնդակոծվել է ադրբեջանցիների ութ ավտոմեքենայից բաղկացած շարասյունը։  Գնդակոծության արդյունքում զոհվել են 3, վիրավորվել՝ 5 մարդ։

Այլ թեմաներ

ԱՄՆ կոնգրեսական Բրեդ Շերմանը նշել է, թե Սումգայիթում և Բաքվում հայերի դեմ իրականացված բռնություններն ու կոտորածները չպետք է չճանաչված մնան: