Ձեր վստահելի աղբյուրը

««Քաղաքացիական պայմանագիր» խմբակցությունը նման հարց չի քննարկում, օրակարգում էլ նման հարց չկա»,- խորհրդարանական ճեպազրույցների ժամանակ ասաց ԱԺ «Քաղաքացիական պայմանագիր» խմբակցության պատգամավոր Էդուարդ Աղաջանյանը՝ պատասխանելով հարցին, որ Արցախի խորհրդարանն ընդունել է «Բռնազավթված տարածքների մասին» օրենքի նախագիծը, ի՞նչ կարծիք ունեք այդ նախագծի մասին, հնարավո՞ր է ՀՀ խորհրդարանը ևս նման հայտարարությամբ հանդես գա։

Ինչ վերաբերում է Արցախի խորհրդարանի ընդունած նախագծին, նա նշեց, որ որևէ մեկնաբանություն չունեն։

Հարցին՝ ՔՊ-ն համարո՞ւմ է, որ Արցախի այդ տարածքները, որոնք  հիմա գտնվում են թշնամու ձեռքում, օկուպացվել է Ադրբեջանի կողմից, Է. Աղաջանյանը պատասխանեց. ««Քաղաքացիական պայմանագրի» դիրքորոշումը հետևյալն է՝ այն ստատուս քվոն, որը կա այս պահին, արդյունք է  Ադրբեջանի կողմից սանձազերծած պատերազմի, որը սկսվել և ուղեկցվել է միջազգային բոլոր օրենքների և հումանիտար օրենքների կոպիտ խախտումներով։ Սա է մեր արձանագրումը, որը միջազգային հարթակներում պետք է գնահատականի արժանանա»։