Ձեր վստահելի աղբյուրը

«Տարվա սկզբից առաջիկա մասհանումների հետ կապված մենք վճարում ենք պարտավորության վճար, այնուհետև, երբ Արժույթի միջազգային հիմնադրամը տրամադրի վարկը, մենք այդ պարտավորության վճարը հետ ենք ստանալու»,-ԱԺ ֆինանսավարկային և բյուջետային հարցերի մշտական հանձնաժողովի նիստում ասաց  ֆինանսների նախարարի տեղակալ Վահե Հովհաննիսյանը՝ ներկայացնելով «Հայաստանի Հանրապետության ու Արժույթի միջազգային հիմնադրամի միջև 2022թ. հունվարի 11-ին և հունվարի 18-ին ստորագրված Պահուստային ծրագրի միջոցների օգտագործման մասին» նամակ-համաձայնագիրը վավերացնելու մասին նախագիծը:

Նրա խոսքով՝ Արժույթի միջազգային հիմնադրամը դեռևս 2019թ. մայիսին Հայաստանի Հանրապետության համար հաստատել էր 180 մլն ՀՓԻ (248.2 մլն ԱՄն դոլար) արժողությամբ եռամյա Պահուստային ծրագիրը, որը հետագա բանակցությունների և վերանայումների ընթացքում աճել է և այն ուղղված է տնտեսական հիմնարար և կառուցվածքային բարեփոխումների իրականացմանը:

Վահե Հովհաննիսյանը պատգամավորներին հայտնեց, որ  ԱՄՀ ներկայացուցիչների հետ բանակցությունների արդյունքում համաձայնություն է ձեռք բերվել Պահուստային ծրագրի ներքո հասանելի միջոցները օգտագործելու նոր կորոնավիրուսային համավարակի հետևանքների մեղմմանն ուղղված սոցիալ-տնտեսական միջոցառումների ֆինանսավորման նպատակով, իսկ ներկայացված նախագծով քննարկվում է նախատեսված 7-ից 5-րդ և 6-րդ վերանայումները՝  և յուրաքանչյուր վերանայման դեպքում տրամադրվել է 25 մլն ՀՓԻ:

Նա պարզաբանեց, որ այս փուլում ստացվելիք 160 մլն դոլար վարկը հաշվարկվելու է 2 % վճարով, բայց քանի որ նրա ժամկետայնությունը 5 տարի է և գումարն առաջիկա 1-2 տարում է նախատեսվում մարել, ապա այդ տոկոսադրույքը չի վճարվի:

Պատգամավոր Իշխան Զաքարյանի մի քանի պազաբանող հարցերից հետո Վահե Հովհաննիսյանը հայտնեց, որ ամբողջ վարկի համար տոկոսադրույքը դառնում է մոտավորապես 3.2 %, բայց այն հստակ չէ, քանի որ տոկոսները լողացող են:

«Սա բյուջեի դեֆիցիտը ֆինանսավորելու նպատակով ներգրավվող վարկ է և, ինչպես գիտեք, «2022թ. բյուջեի մասին» օրենքով նախատեսված է 99 մլրդ դրամ բյուջեի դեֆիցիտը ֆինանսավորելու նպատակով ներգրավվելիք վարկեր, սա դրա մի մասն է կազմում»,-ասաց Ֆինանսների փոխնախարարը և հավելեց, որ այն անմիջականորեն կապված չէ բյուջետային որևէ ծախսի հետ:

Նրա խոսքով՝ ստացվելիք վարկն ամբողջությամբ չի փակում բյուջեի դեֆիցիտը և կառավարությունը բանակցություներ է վարում միջազգային այլ կազմակերպությունների հետ այն ֆինանսավորելու համար:

Նախագծի հիմնավորման մեջ ասվում է. «2020թ. մայիսի 23-ին և հունիսի 1-ին Հայաստանի Հանրապետության և ԱՄՀ-ի միջև ստորագրվել է «Պահուստային ծրագրի միջոցների օգտագործման և լրացուցիչ փոխառու միջոցների ներգրավման մասին» նամակ-համաձայնագիրը, որով հասանելի են դարձել ընդհանուր առմամբ շուրջ 231.656 մլն ՀՓԻ (315 մլն ԱՄՆ դոլար) ծավալով բյուջետային միջոցներ:

2021թ. հոկտեմբեր-նոյեմբերին տեղի են ունեցել Պահուստային ծրագրի չորրորդ և հինգերորդ համատեղ վերանայումները, որոնց արդյունքներով հասանելի են դարձել 51.428 մլն ՀՓԻ բյուջետային միջոցներ: Պետական բյուջեի պակասուրդի ֆինանսավորման անհրաժեշտությամբ պայմանավորված՝ ՀՀ կառավարությունը 2021թ. նոյեմբերի 19-ին «Մտադրությունների նամակ»-ով դիմել է ԱՄՀ-ին՝ հասանելի միջոցները որպես բյուջետային աջակցություն ներգրավելու նպատակով:

Վերոնշյալ միջոցների մասհանման համար Հայաստանի Հանրապետության և ԱՄՀ-ի միջև 2022 թվականի հունվարի 11-ին և հունվարի 18-ին ստորագրվել է «Պահուստային ծրագրի միջոցների օգտագործման մասին» նամակ-համաձայնագիրը, ինչպես դա իրականացվել է 2020 թվականին»: