Ձեր վստահելի աղբյուրը

Ադրբեջանական կողմը շարունակում է պահպանել լարված մթնոլորտ Արցախի Հանրապետության Ասկերանի շրջանի Խրամորթ համայնքի հարակից դիրքերում։ Մարտունու շրջանի Նորշեն համայնքում նույնպես լարված իրավիճակ է, դեռ մարտի 4-ին ադրբեջանցիները կրակոցներ էին արձակել գյուղի ուղղությամբ, բարձրախոսով հորդորել էին բնակիչներին լքել տարածքը։ Այսօր Արցախի պաշտպանության նախարարությունը հայտնեց, որ վերջին օրերի ընթացքում արևելյան ուղղությամբ Ադրբեջանը հրադադարի պահպանման ռեժիմը պարբերաբար խախտում է։

Panorama.am-ը զրուցել է Արցախի Հանրապետության Ազգային ժողովի «Արդարություն» խմբակցության պատգամավոր Մետաքսե Հակոբյանի հետ Ադրբեջանի սադրիչ գործողությունների, թշնակու կողմից վարվող քաղաքականության վերաբերյալ։

Panorama.am - Տիկին Հակոբյան, Ադրբեջանն ինչի՞ է ուզում հասնել նման սադրանքներով, բնակիչներին ահաբեկելով։

Մետաքսե Հակոբյան - 2020 թվականի նոյեմբերի 9-ի եռակողմ հայտարարությունից հետո ամեն անգամ ասում ենք, որ Արցախում պատերազմը չի ավարտվել,  ուղղակի լռություն է, դա էլ հարաբերական է, ժամանակ առ ժամանակ նույնիսկ մայրաքաղաք Ստեփանակերտում մենք լսում ենք կրակոցի ձայներ։ Հատկապես աշնանն ու գարնանն իրենք ավելի ակտիվանում են, քանի որ ավելի շատ մարդիկ ենք տեսնում։ Մեր վերահսկողության տակ գտնվող այգիները, վարելահողերը շատ մոտ են գտնվում շփման գծին։ Կոնկրետ Խրամորթից, Նորշենից թշնամին ընդամենը մի քանի մետր հեռավորության վրա է թշնամին։

Գարնանային աշխատանքների ժամանակ ընդամենը մի քանի մետրի վրա տեսնելով մեր գյուղացիներին՝ զենք են թափահարում, վայրենի ձայներ հանում, բարձրախոսերով հայերեն ասում են, որ պետք է լքեն տարածքը, հակառակ դեպքում այս կանեն, այն կանեն։ Իհարկե, սա իրենց քաղաքականությունն է, որը երբևէ չի փոխվել, ուղղակի հիմա իրենք ավելի ինքնավստահ են դարձել, ի վերջո իրենց հաղթանակ է նվիրվել, որին իրենք 30 տարի շանս չունեին հասնելու ու մեկ էլ դա իրենց նվիրվեց։ Բնականաբար, իրենք այդ պահվածքն են դրսևորում, ու իրենց նպատակն է խուճապ, վախ առաջացնել, որպեսզի ուղղակի արցախցիները լքեն իրենց հայրենիքը։ 

Երկու օր առաջ, երբ կրակոցներ էին եղել, Նորշենի բնակիչների հետ էի խոսում։ Իհարկե, ուրախ, զվարթ չէին, ոգևորված չէին, բայց փաստում էին` ոչ վախ կա, ոչ խուճապ, որովհետև արցախցին ամենալավն է ճանաչում ադրբեջանցուն։ Չեն ենթարկվել թշնամու սադրանքներին, շատ արագ ինքնակազմակերպվել են, եկել է վարչական շրջանի ղեկավարը, այնուհետև ռուս խաղաղապահները, կարողացել են հանդարտեցնել թշնամուն։

Իհարկե, այդ օրը գյուղատնտեսական  աշխատանքներ չեն կատարվել, բայց խաղաղապահները խոստացել են, որ մեկ ամիս հետո այնպիսի իրավիճակ ստեղծած կլինեն, որ մեր գյուղացիները կկարողանան միայնակ դաշտերում աշխատել։

Մյուս կողմից իրենք, օգտվելով ռուս-ուկրաինական հարաբերություններից, ուզում են ցույց տալ, որ ընդհանրապես ռուսը չի տիրապետում իրավիճակին, թուլացել է, չի կարողանում իրականացնել խաղաղապահի գործառույթները, բայց դա իրականություն չէ։ Խաղաղապահները ինչպես իրականացրել են իրենց գործառույթները, այնպես էլ շարունակում են, որևէ խնդիր չկա այդ առումով։  Արցախում էլ բնակիչը ռուս զինվորի կողքին է, սատարում է, քանի որ այսօր հայ և ռուս զինվորը կողք-կողքի Արցախի անվտանգության երաշխավորն են։

Panorama.am – Արցախցիներն ամուր կառչած են իրենց հողին, չեն պատրաստվում հեռանալ՝ չնայած թշնամու սադրանքներին։

Մետաքսե Հակոբյան – Միանշանակ, այլապես այսօր ուղղակի չէինք ունենա Կարմիր Շուկան, Թաղավարդի կես մասը, որը մեր վերահսկողության տակ է, քանի որ այն, ինչ կատարվում է արդեն մեկ տարուց ավելի այդ գյուղերի շուրջ, երևի թե ամենավտանգավորն է, որովհետև իրենք ամեն վայրկյան թշնամու թիրախի տակ են, երեխաներն այդպես գնում են դպրոց, մանկապարտեզ, բնակիչներն այդ պայմաններում իրենց կենցաղն են վարում։ Հավատացեք, բացառիկ մարդիկ են։ Իրենց հետ հաճախակի եմ շփվում, այն կամքը, միտքը, որ հիմա իրենք ավելի են կառչած իրենց հողին, քան մինչ պատերազմը, երևի ամեն մեկին տրված չէ։ Երևի հենց լեռնեցուն է տրված։

Panorama.am – Ի՞նչը կստիպի թշնամուն, որ նման լկտի պահվածքը չդրսևորի և ի՞նչ արձագանք պետք է լինի այդ ամենին Հայաստանի ու Արցախի իշխանություններից կողմից։

Մետաքսե Հակոբյան – Կստիպի ուժը։ Բայց ինչի մասին է խոսքը. պարտված մարդիկ են իշխանության, ովքեր գլուխները կախ ուղղակի տվեցին մեր հայրենիքը, մեր երեխաների կյանքերը նվիրեցին թշնամուն։ Այդ դեպքում ինչպե՞ս կարող են որևէ բան պարտադրել։ Այս իշխանության օրոք չի կարող լինել, միանշանակ, բայց ամենաքիչը գոնե պետք է մեծ աղմուկ-աղաղակ բարձրացնեն։ Թշնամին չեղած բանից կարողանում է  այնպիսի սուտ տեղեկատվություն տարածել, որ միջազգային հանրությունը հավատում է, իսկ մեր մոտից որևէ հայտարարություն, գոնե ԱԳՆ մակարդակով որևէ կոշտ հայտարարություն երբևէ չի եղել։ Բնականաբար, իրենց զսպող ոչինչ չունենք։ Ի՞նչ է արվում իրենց զսպելու համար։ Բնականաբար, ոչինչ։ Իրենց քաղաքականությունն այդպես կշարունակվի մինչև մենք ուժեղ լինենք, մեզանից ինչ-որ բան ներկայացնենք։

Չնայած ասեմ՝ այնպես չէ, որ իրենք շատ ուժեղ են. երբ դեմ դիմաց հանդիպում են բնակչին, արցախցու ու զինվորի դիմադրությանը, այնպես չէ որ շատ ուժեղ են կամ իրենց լկտի են պահում։ Իրենք լկտիանում են, երբ դա պետական մակարդակի է հասնում, քանի որ իրականում իրենք ոչ ուժեղ են, ոչ էլ առյուծի սիրտ են կերել։

Panorama.am – Շնորհակալ եմ հարցերին պատասխանելու համար։