Ձեր վստահելի աղբյուրը

«Այն այսօրվա իրաղությունն է, եթե մենք չունենք պետություն, ղեկավարություն, բանակ, ապա նման միջադեպերը մեր համար դառնալու են առօրյա կենսակերպ»,- «Հայելի» ակումբում ասաց ոստիկանության գեներալ Գագիկ Համբարձումյանը՝ անդրադառնալով Երասխի ուղղությամբ և Արցախում արձանագրված հրադադարի խախտման դեպքերին և Արցախ մտնող գազատարի խնդրին:

Բանախոսը նկատեց, որ ոչ միայն կրակոցներ են հնչել, այլև երիտասարդ զոհ է գրանցվել և  իշխանությունների կողմից արձագանք չկա, ինչը փաստում է, որ նման դեպքերը շարունակական բնույթ են կրելու:

«Մեր դժբախտությունն այն է, որ այսօր իշխանությունը քաղաքական ուժի ձեռքում չի գտնվում, այլ գտնվում է ազգային, մարդկային, բարոյական արժեքներից իսպառ զուրկ թայֆայի ձռքին»,-ասաց գեներալը և հավելեց, որ Հայաստանում այսօր առաջին պլան են մղում նրանց, ովքեր ոչ միայն մարդկային արժեքներից են հեռու, այլև՝ բարոյական, տաղամարդկային, քանի որ արժեքակիր անձնավորությունը չի կարող աշխատել Փաշինյանի հետ:

Անդրադառնալով ԱԺ-ում կառավարության հետ հարցուպատասխանի ժամանակ Նիկոլ Փաշինյանի ելույթին՝ գեներալն ասաց. «Հոգեբույժները կբացատրեն և լրիվ հիմքերն ունեն Փաշինյանի անհավասարակշիռ վիճակի մասին կոնկրետ և կատեգորիկ եզրակացություն անելու համար»:

Նրա խոսքով՝ այդ վարքը վախից բացի նաև անպատժելիության հետևանք է և հիշեց, որ իրավունքի դասագրքային ճշմարտություն է, որ ցանկացած անպատիժ հանցագործությունը ծնում է նորը:

«Ոստիկանները, թեկուզ նրանց վատագույն մասը, ինքնագլուխ նման շնաբարո գործողություններ չէին կատարի, այն արվում է ուղղակի հրահանգով»,-մեկնաբանելով նախօրեին կառավարության շենքի դիմաց երիտասարդների բողոքի ցույցի բիրտ կասեցման դեպքին, ասաց Գագիկ Համբարձումյանը և նկատեց, որ թշնամու առաջ միայն խոնարհվում ու չոքում են, իսկ Հայաստանի շահի համար պայքարող երիտասարդների նկատմամբ նման վերաբերմունք դրսևորում:

Ոստիկանության գեներալը դիտարկեց նաև Հայաստանի և Ուկրաինայի նմանությունն ու տարբերությունը:

«Ինչպես Հայաստանում, այնպես էլ Ուկրաինայում իշխանությունը գտնվում է խամաճիկ դեգեներատների ձեռքում, որոնք ոչ միայն ազգային շահ չեն հետապնդում այլև պատկերացում չունեն, թե ազգային շահն ինչ է իրենցի ներկայացնում»,- ասաց Գագիկ Համբարձումյանը և, խոսելով տարբերության մասին, նկատեց, որ եթե Ուկրաինայում Արևմուտքի կարգախոսն է՝ «Կռվել մինչև վերջին ուկրաինացին», ապա Հայստանում՝ «Ձգտել խաղաղության, մինչև հայկական վերջին տարածքը և հայը, որը կզոհվի կամ կարտագաղթի»:

Գեներալի խոսքով՝ քանի դեռ երկիրը գտնվում է օտարերկրյա կառույցների գործակալների, հանցավոր անձանց ձեռքում, նման իրավիճակներ և ավելի շատ կորուստներ անընդհատ լինելու են:

Ըստ նրա՝ այդ պատճառով էլ Հայաստանը չի կարողանում նաև իր հստակ դիրքորոշումը հայտնել Ուկրաինայի պատերազմի վերաբերյալ:

Գագիկ Համբարձումյանը համոզված է, որ ներկայիս իշխանությունները ոչ մի դեպքում կամովին չեն թողնի իշխանությունը, քանի որ գիտեն թե դրանից հետո ինչ է լինելու իրենց հետ, իսկ իշխանափոխության պետք է հասնել փողոցում՝ ժողովրդի ընդվզման միջոցով: