Ձեր վստահելի աղբյուրը

«Ադրբեջանի կողմից Արցախի ուղղությամբ իրականացվում է համակարգային գրոհ՝ ռազմականից մինչև հոգեբանական, այդ թվում նաև տնտեսական, որն արտահայտվել է  գազատարի պայթյունով»,- Ազգային ժողովում լրագրողների հետ զրույցում ասաց «Պատիվ ունեմ» խմբակցության պատգամավոր Տիգրան Աբրահամյանը։

Նրա խոսքով, Արցախի Հանրապետության Խրամորթ, Նորշեն, Թաղավարդ բնակավայրերի ուղղությամբ Ադրբեջանը դրսևորում է տարբեր բնույթի սադրանքներ,  որոնք սկսվում են հրաձգային զենքերից արձակված կրակահերթով, ականանետի կիրառմամբ, ինչպես նաև հոգեբանական գրոհի  իրականացմամբ, բարձրախոսների միջոցով հայկական բնակավայրերի ուղղությամբ մուղամների, զգուշացնող հայտարարությունների տարածմամբ։

«Ադրբեջանցիների այդ հայտարարությունների հիմքում դրված է հետևյալ միտքը՝ այս հատվածներից պետք է հեռանաք, քանի որ սրանք մեր հողերն են, այլապես վաղ թե ուշ դա անելու ենք ուժի կիրառմամբ։  Ադրբեջանի զինվորականները նաև անընդհատ գոռում են, որ վաղ թե ուշ մտնելու են ու բոլորին կոտորելու»,- ասաց պատգամավորը։

Տ.Աբրահամյանի խոսքով, ամենավտանգավորն այն է, որ այս իրավիճակի հետ կապված առ այս պահը Հայաստանի իշխանությունների կողմից որևէ արձագանք չի եղել։

Նա չի կարծում, որ ռուս խաղաղապահ առաքելության գործառույթներում կամ իրականացվող միջոցառումներում ինչ-որ արմատական փոփոխություններ են տեղի ունեցել, ինչից Ադրբեջանը կարող է դժգոհ լինել ու նման սադրանքների դիմել։ Պատգամավորի խոսքով, ադրբեջանական քարոզչամեքենան և այն լրատվամիջոցները, որոնք գործում են ադրբեջանական պաշտոնական մարմինների ներքո և հրահանգավորմամբ, արշավ են սկսել նաև ռուսական առաքելության հրամանատարի նկատմամբ, ինչը չի կարծում պայմանավորված է ռուսական առաքելության աշխատանքի կամ ծառայության ոչ էֆեկտիվությամբ։

«Սա տեղավորվում է  Ուկրաինայի շուրջ ստեղծված իրավիճակով և դրա ուղղակի և անուղղակի ազդեցությամբ, որը հատկապես սուր արձագանք է ունենում Արցախում և այս իրավիճակում պետք է նկատի ունենալ, որ  ադրբեջանական և թուրքական մամուլը, որը ներդաշնակեցված է գործում, ամբողջապես աշխատում է հակառուսական քարոզչության  տրամաբանության ներքո և այն քայլերը, որոնք այսօր տեղի են ունենում, նպատակ ունեն հեղինակազրկել նաև ռուսական դերակատությունը Արցախում, Հարավային Կովկասում, ինչը նշանակում է՝ որքան Ուկրաինայի շուրջ ստեղծված այս ճգնաժամը խորանա, այնքան այդ հարձակումները Ռուսաստանի նկատմամբ տարբեր մակարդակներով անընդհատ նկատելի են լինելու»,- ասաց Տիգրան Աբրահամյանը։

Նա չի կարծում, որ ՀՀ ԱԳՆ առաջարկները  զորքերի հայելային  հետքաշման հետ կապված՝ այս փուլում կարող է որևէ խնդիր լուծել, քանի որ ադրբեջանական  գործողությունները լրիվ այլ  տրամաբանության ներքո են ընթանում և սա նաև որոշակի ազդակ է  Հայաստանին և Արցախին առ այն, որ առաջիկայում կարող են լինել  տարբեր բնույթի նոր սրացումներ։

Ինչ վերաբերում է խաղաղություն հաստատելուն, «Պատիվ ունեմ» խմբակցության պատգամավորն ասաց, որ ոչ միշտ է, որ խաղաղության մասին խոսողներն իրականում մտածում են խաղաղության մասին, որը պետք է հիմնված լինեն միջազգային իրավունքի, դրա սկզբունքների,  կամ արդարության մոտեցումների հիման վրա։

«Ադրբեջանի ասած խաղաղության իմաստը, կարճ ասած, հետևյալն է՝ ունեմ պահանջներ,   բավարարեք այդ պահանջները, դուք կունենաք խաղաղություն։ Ավելին ասեմ՝ նույնիսկ  ադրբեջանական պահանջների, հավակնությունների բավարարման պարագայում այս տարածաշրջանում խաղաղություն չի լինելու։ Մեր գլխավոր խնդիրն է հասկանալ՝ թե տարբեր իրավիճակային զարգացումների պարագայում ինչպես ենք մենք գործելու, մեր հասարակությունը պետք է պատրաստ լինի, որ  անընդհատ  ապրելու ենք մի տարածաշրջանում, որտեղ լինելու է տարբեր ճգնաժամերի բարձր հավանականություն»,- ասաց Տ. Աբրահամյանը։

Նման պայմաններում, ըստ ընդդիմադիր պատգամավորի, պետք է ունենալ պետություն, իշխանություն, որն ունի կենսունակություն, գիտակցում է իրավիճակի խորությունը, կարողանում է  կանխատեսել հնարավոր զարգացումները, նվազագույնի հասցնել կամ չեզոքացնել այն  սպառնալիքները, որոնք  կախված են Հայաստանի և Արցախի գլխին։