Ձեր վստահելի աղբյուրը

«Ամբողջ աշխարհն այսօր անհանգիստ է, և ոչ թե պետք է քննարկենք իրենց վատ պահելը, այլ այն, թե մենք ինչ ենք անում, որպեսզի հակառակորդը չկարողանա այդպիսի դրսևորում իրականացնել»,- լրագրողների հետ զրույցում ասաց ԱԺ պաշտպանության և անվտանգության մշտական հանձնաժողովի նախագահ, «Քաղաքացիական պայմանագիր» խմբակցության պատգամավոր Անդրանիկ Քոչարյանը՝ պատասխանելով Ադրբեջանի կողմից հնչող կրակոցներին հայկական դիրքերի ուղղությամբ։ 

Նա նշեց, որ մարտի 7-ի լույս 8-ի գիշերը ականանետից երկու-երեք կրակոց է եղել, դրանից ավելի որևէ գործողություն չի եղել։ Իշխող ուժի պատգամավորի փոխանցմամբ, կրակոցներ են եղել դպրոցի ուղղությամբ, մեկ արկ ընկել է մեր դիրքերի թիկունքը, հայկական կողմից զոհեր և վիրավորներ չկան։

Ա.Քոչարյանը հիշեցրեց, որ Լիսագորի շրջանում նաև վնասված է գազատարը։

«Քանի որ  հրադադարի պահպանման ռեժիմի պատասխանատուն, երաշխավորը նաև ՌԴ-ն է, որը նաև զբացված է այլ անհանգիստ վայրում գործողությունների ակտիվ փուլում, գուցե  հակառակորդը դրանից օգտվելով որոշ դժվարություններ է փորձում առաջացնի նաև արցախյան հատվածում»,- ասաց նա։

Ըստ ՔՊ-ական պատգամավորի, ամենայն հավանականությամբ, այդ խնդիրներն իրենց լուծումները կգտնեն Ռուսաստանի և Ադրբեջանի միջև երկխոսության միջոցով, ենթադրում է՝ Արցախի Հանրապետության ղեկավարությունը ևս մասնակցություն կունենա։

Հարցին՝  հայկական կողմը խոսում է խաղաղության մասին, Ադրբեջանը կրակում են հայկական դիրքերի ուղղությամբ, հայկական կողմն ունի զոհ ու վիրավոր, միջադեպերով փորձում են ահաբեկել հայերին, համարժե՞ք է  Հայաստանի ու Ադրբեջանի պատկերացումները խաղաղության մասին. «Այո, մեր պատկերացումները համարժեք են։ Մենք գնում ենք խաղաղության»։

Ա. Քոչարյանի խոսքով, այսօրվա սահմանային իրողությունները եղել են նաև նախկինում. «Ամեն դեպք պետք է քննվի, քանի որ դա խախտում է այն տրամաբանությունը, որի շուրջ հստակ պայմանավորվածություններ կան հրադադարի ռեժիմի պահպանման վերաբերյալ։ Ամեն դեպք պետք է ուսումնասիրվի, մեղավորները պետք է պատժվեն՝ անկախ նրանից՝ մենք ունենք մեր մեղքի բաժինը, թե թշնամին։
Խաղաղություն չի նշանակում զիջել բոլոր դիրքերը, այլ նշանակում է հասնել այնպիսի խաղաղության, որը կբացառվեն նման իրողությունները»։