Ձեր վստահելի աղբյուրը

«Մեզանից յուրաքանչյուրը դեմ է ծխելուն, անհրաժեշտ է հակածխախոտային քաղաքականություն, բայց ինչպես ցանկացած միջոցառում, այն իր մեջ  պետք է պարունակի որոշակի  համաչափություն և ողջամտություն»,- Աժ արտահերթ նիստում «Ծխախոտային արտադրատեսակների և դրանց փոխարինիչների օգտագործման հետևանքով առողջությանը հասցվող վնասի նվազեցման և կանխարգելման մասին» օրենքում լրացում կատարելու մասին նախագծի քննարկման ժամանակ ասաց «Հայաստան» խմբակցության պատգամավոր Արամ Վարդևանյանը։

Նա նշեց, որ այս նախագծին «Հայաստան» խմբակցությունը ձեռնպահ է քվեարկելու, բայց մյուս կողմից առաջինից երկրորդ ընթերցման շրջանակներում մշտական հանձնաժողովում քննարկումների ժամանակ, կարծում է, լավ հնարավորություն կարող է լինել   բարձրացնելու որոշակի հարցադրումներ։

«Այն տրամաբանությունը, թե մի քանի տարի առաջ այս հարցը մանրամասն քննարկվել է, կարծքիների բախում է  եղել և այլն, կյանքը ցույց է տալիս, որ  որևէ ստատիկ երևույթ գոյություն չունի, երկու տարի առաջ եղած ճշմարտությունները կարող են 2022 թվականին այլ տեսանկյունից դիտարկել»,- ասաց ընդդիմադիր պատգամավորը։

Արամ Վարդևանյանի խոսքով, բացօթյա տարածքներում ծխախոտային արտադրատեակների և դրանց փոխարինիչների սահմանափակումը ողջամտության և  համաչափության տեսանկյունից խնդիր ունի, նաև միջազգային փորձի տեսանկյունից։

Հիշեցնենք, որ «Ծխախոտային արտադրատեսակների և դրանց փոխարինիչների օգտագործման հետևանքով առողջությանը հասցվող վնասի նվազեցման և կանխարգելման մասին» օրենքում լրացում կատարելու մասին  նախագծով առաջարկվում է վերանայել «ծխախոտային արտադրատեսակի փոխարինիչ» հասկացությունը,  հաշվի առնելով ՀՀ շուկայում նոր արտադրատեսակների առկայությունը։

Նախագիծը դրվեց քվեարկության և առաջին ընթերցմամբ ընդունվեց 67 կողմ, 2 դեմ, 29 ձեռնպահ հարաբերակցությամբ։

Այս նախագծի հիմնական զեկուցող առողջապահության նախարարի առաջին տեղակալ Լենա Նանուշյանը հայտարարեց, որ բոլոր այն արտադրատեսակները, որոնք կընկնեն օրենքով սահմանված ծխախոտային արտադրատեակների և դրանց փոխարինիչների սահմանումների տակ՝ մարտի 15-ից հանրային սննդի վայրերում դրան օգտագործումը կարգելվի։