Ձեր վստահելի աղբյուրը

Տևական ժամանակ է՝ հայաստանյան խանութներում ձուն էականորեն էժանացել է։ Երկու օր առաջ նույնիսկ մի լուսանկար էր շրջանառվում, որտեղ երևում էր՝ սուպերմարկետներից մեկում մեկ ձվի գինը 14 դրամ էր։

«Իրազեկ և պաշտպանված սպառող» ՀԿ նախագահ Բաբկեն Պիպոյանը  նախ սպառողներին կոչ է անում էժան ձու գնել, բայց Զատիկի համար չպահեստավորել, քանի որ պահպանման ժամկետի խնդիր կարող է առաջանալ։

Ապա անդրադառնալով էական գնանկման պատճառներին մի քանի գործոն է նշում։

«Կան օբյեկտիվ ու սուբյեկտիվ գործոններ։ Սուբյեկտիվ գործոններից մեկն այն է, որ ձվի շուկայում գերիշխող դիրք ունեցող տնտեսվարողները միացան գերիշխող դիրք չունեցող ընկերությանը, իրականացրեցին գների իջեցում։ Ըստ էության, պատկան կառույցները, այդ թվում նաև էկոնոմիկայի նախարարությունը դրսևորեցին անգործություն»,-Panorama.am-ի հետ զրույցում ասաց ՀԿ նախագահը։

Պետության անգործությունն արտահայտվում է այս կամ այն ոլորտի քաղաքականության բացակայությամբ, առաջարկի-պահանջարկի չգնահատմամբ ու չպլանավորմամբ։ Նույն պատճառով, գյուղատնտեսության ոլորտում մի տարի օրինակ կարտոֆիլի ավելցուկ է լինում, հաջորդ տարի՝ դեֆիցիտ։

ՀԿ նախագահի խոսքով, հիմա շուկայում առկա է ձվի էական ավելցուկը, ինչը պայմանավորված է անցած տարի թռչնաբուծական տնտեսությունների թարմացմամբ։

«Մենք անցած տարի ունեցանք ձվի դեֆիցիտ, քանի որ համավարակով պայմանավորված, տնտեսությունները չէին իրականացրել թարմացում։ Նախորդ տարի թարմացումն իրականացրեցին ավելցուկով։ Արդյունքում այսօր ունենք  այնքան առաջարկ ու սպառում, որքան լինում է Զատիկին»,-ասաց Պիպոյանը։

Հիշեցնենք, որ գնանկումը սկսեց «Պրոյեկտ ինտեր-ինվեստ» ընկերությունը՝ ապրանքանիշը «Շիրակ»։ Ըստ մամուլի, ընկերության սեփականատերը կասկածելի գործարքով  ձեռք է բերել «Գոլդեն Փելես»-ը։

«Կասկածներ կան, որ նա վայելում է պետական հովանավորություն։ Սակայն եթե մյուս տնտեսվարողները չմիանային նրան, ապա շուկայում նման ցնցումներ չէր լինի։ Մրցակցության պետական հանձնաժողովը պետք է դիտարկի ոչ միայն  «Պրոյեկտ ինտեր-ինվեստ» ընկերության գնիջեցումը, այլև մնացած ընկերությունների գնի իջեցումը, որոնք հիմնավորված չեն։  Այս դեպքում ստացվում է, որ գնիջեցում ունեն նաև  գերիշխող տնտեսվարողները։ Այդ պատճառով ես ոչ միանշանակ եմ ընդունում մրցակցային մարմնի գործունեությունը։ Մենք ունենք նաև էկոնոմիկայի նախարարություն, որը պետք է հայտարարի, թե այս սեզոնին,  ջեռուցման պայմաններում ինչքա՞ն է ձվի ինքնարժեքը։ Բացի այդ, նախարարությունը պետք է արտահանման ուղիներ մտածի, նպաստի արտահանմանը»,-ասաց Պիպոյանը։

Ինչո՞ւ է անգործություն ցուցաբերում  էկոնոմիկայի նախարարությունը. քաղաքական կամ այլ հրահանգո՞վ, պրոֆեսիոնալիզմի պակասի՞ կամ բացակայությա՞ն, թե՞ մեկ այլ պատճառով, Պիպոյանը չգիտի։

«Կամայական ոլորտ, որտեղ շոկ կա, քաղաքականություն մշակող մարմինը պետք է ներգրավվի գործընթացին։ Այս պահին էկոնոմիկայի նախարարության լռությունը խոսում է անգործության մասին։  Իսկ որ ոլորտում շոկ կա, ակնհայտ է։ Փաստն այն է, որ շուկայում կա ձվի ավելցուկ, գինն էժանացել է, սպառման ծավալները կտրուկ ավելացել են»,-նշեց նա։