Ձեր վստահելի աղբյուրը

«Ընդհանուր ժողովի ընթացքում մենք պայքարի նոր ձևերի, նոր դրսևորումների անհրաժեշտություն նկատեցինք»,-ասաց ՀՅԴ նորընտիր Բյուրոյի ներկայացուցիչ Հակոբ Տեր-Խաչատուրյանը լրագրողների հետ հանդիպմանը։

Նրա խոսքով, այդ միջոցների այժմեականացման ուղղությամբ իրենք աշխատելու են ամբողջ աշխարհում՝ առաջ տանելու Հայ Դատն ու ամրապնդելու Հայաստանի անվտանգության երաշխիքը։

«Դժբախտաբար, այսօր Հայաստանի իշխանությունները հանդես չեն գալիս որպես Արցախի  Հանրապետության ու արցախահայության երաշխավոր։ Սա շատ ցավալի երևույթ է, քանի որ անցյալում միշտ շեշտադրում էինք, որ այդ երաշխավորությունը պետք է տա Հայաստանը»,-ասաց նա՝ նկատելով, որ շատ հաճախ Հայաստանի իշխանությունները խուսափում են այդ հարցին, ինչպես նաև Հայ Դատին անդրադառնալուց։

Հիշեցնենք, որ փետրվարի 28-ից մարտի 8-ը Հայաստանում տեղի է ունեցել ՀՅԴ 34-րդ Ընդհանուր Ժողովը։ Աշխարհի շուրջ 30 երկրներից ժամանած 100 պատվիրակները քննարկել և արժևորել են համահայկական կառույցի հաշվետու ժամանակաշրջանի գործունեությունը, ուղենշել ՀՅԴ առաջիկա քառամյակի ռազմավարությունը՝ որդեգրելով քաղաքական գործունեության առաջնահերթություններն ու հիմնական ուղղությունները։

Ասուլիսի մյուս բանախոս՝ ՀՅԴ բյուրոյի անդամ Արմեն Ռուստամյանը նշեց, որ այս Ընդհանուր ժողովը պատմության մեջ կմնա որպես արտակարգ ժողով, այն գումարվում էր աննախադեպ սրված ու լարված իրավիճակում, Հայաստանին սպառնացող բազմաթիվ վտանգների առկայության պարագայում։

«Խոսքն իրականում վերաբերում  է մեր լինելության գործողություններին, Դաշնակցությունը, իր առաքելությանը համաձայն, լինելով վտանգների բաց ներվը զգացող կուսակցություն, շատ հստակ արձանագրում է, որ մենք կանգնած ենք օրհասական խնդիրների լուծման հրամայականի առջև, ունենք թե ներքին, թե արտաքին լրջագույն վտանգներ։ Խնդիր ունենք թույլ չտալու, առնվազն կասեցնելու այնպիսի զիջումներ, որոնք կենսական նշանակություն  կունենան մեր ապագայի համար։ Զիջումների կարմիր գծերը չարձանագրելու պարագայում մենք թե Արցախը, թե Հայաստանը կորցնելու վտանգի առջև ենք։ Սա չափազանցություն չէ, սա իրական վտանգի վերլուծություն է»,-ասաց Ռուստամյանը։

Դաշնակացական գործիչը նկատեց, որ աշխարհքաղաքական փոփոխութունների հորձանուտում նոր լրջագույն մարտահրավերներ են առաջացել, չափազանցություն չի լինի ասել, որ Հելսինկյան պակտից հետո ձևավորված նախկին աշխարհակարգն այլևս չի գործում կամ գործում է լուրջ խափանումներով։

«Ուժի գործադրումը սկսել է դառնալ միջպետական հարցերի լուծման միջոց։ Այս պարագայում, իսկապես, Հայաստանը պետք է կարողանա ճիշտ արտաքին քաղաքականություն իրականացնել, որ անվտանգային համակարգը ձևավորի մարտահրավերները հաղթահարելու համար։ Թուրք-ադրբեջանական տանդեմը, որ գործում է մեկ պետության նման, ամեն օր փորձում է մեր շուրջ օղակը սեղմել։ Մենք ամեն օր կանգնած ենք մեր լինելության հարցերը լուծելու պարտադրանքի առջև, և դրան համապատասխան անհրաժեշտ քայլեր պետք է ձեռնարկենք անհապաղ»,-ասաց նա՝ ներկայացնելով Ընդհանուր ժողովում շեշտադրված հարցերը։

Ռուստամյանը նկատեց՝ «Ապագա կա» կարգախոսով իշխանության եկած ուժն անում է այնպիսի զիջումներ, որոնք վտանգի տակ են դնում երկրի ու ժողովրդի ապագան։

«Այո, Հայաստանում կա ապագա, բայց առանց կենսական զիջումների։ Հայաստանում ու հայության համար չի կարող լինել ապագա կենսական զիջումներով։ Մենք հստակ մատնանշել ենք այն կարմիր գծերը, որոնցից այն կողմ զիջումներ թույլ չի տա Դաշնակցությունն իր համահայկական կառույցով։ Իսկ հայ ժողովուրդը պետք  է վերագտնի իր երբեմնի առաքելությունն ու նշանակությունը, այս տարածաշրջանում գոյատևելու իր անսակարկելի իրավունքը և դիմակայի այս փորձություններին»,-ասաց Ռուստամյանը։

Նա   հիշեցրեց՝ ՀՅԴ-ն նախաձեռնել է Դիմադրության շարժում, որն առաջին հերթին ուղղված է լինելու դրսի սպառնալիքները, Հայաստանի շուրջ սեղմվող օղակը չեզոքացնելու գործին, ինչպես նաև ներքին ներուժն ամրապնդելուն ու ներքին դիմադրողականությունը մեծացնելուն։

«Իսկ դա նշանակում է, առաջին հերթին վերացնել այն վիհն ու պառակտումը, որն այսօր այս իշխանությունների թեթև ձեռքով մտել են մեր կենցաղ։ Մենք պետք է ներազգային համերաշխության հասնենք բարձրագույն մակարդակով, որ կարողանանք դիմակայել այս բոլոր մարտահրավերներին»,-ընդգծեղ դաշնակցական գործիչը։