Ձեր վստահելի աղբյուրը

ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահ, «Պատիվ ունեմ» խմբակցության պատգամավոր Թագուհի Թովմասյանը հայտարարեց, որ միջազգային գործընկերների ուշադրությունն է հրավիրել այն առնչությամբ, որ  մարտի 6-ից սկսած ադրբեջանական զինուժը հետևողականորեն հրետակոծում է  Արցախի մի քանի բնակավայրեր, այսօր առավոտյան  խաղաղ բնակիչ է վիրավորվել իր տան բակում գյուղատնտեսական աշխատանքներ իրականացնելիս։

«Սա նշանակում է, որ խաղաղության դարաշարջանը կամ խաղաղության թեզերը որևէ կերպ չեն արժևորվում, իրականություն չեն դառնում, Ադրբեջանը շարունակում են  իր ահաբեկչական  քաղաքականությունը հայերի և հայ ժողովորդի նկատմամբ»,- ԱԺ-ում ՀՊՏՀ Եղեգնաձորի մասնաճյուղում 2022-2023թթ. ընդունելության դադարեցման հետևանքով առաջացած խնդիրների ևԲՈՒՀ-ի ընդունելությունը վերականգնելու հնարավոր տարբերակների վերաբերյալ քննարկմանն ասաց ընդդիմադիր պատգամավորը։

Նրա խոսքով, միջազգային գործընկերները պետք է  այս առնչությամբ հրատապ իրենց արձագանքը հայտնեն, քանի որ եթե այս դեպքերը սկսեն ուղղակի դիտարկել որպես  սովորական պրովակացիա, սադրանք, անցավ ու գնաց, նշանակում է՝  կրկնությունը լինելու է շատ ավելի խորը, հետևողական։

«Պատիվ ունեմ» խմբակցության պատգամավորը հայտնեց, որ մարտի 16-ից մի քանի օրով աշխատանքային այցով լինելու են Արցախում՝ փաստահավաք աշխատանքներ իրականացնելու, տեղում իրավիճակը հասկանալու համար։

«Բայց այս պահի դրությամբ  պետք է հայտարարել, որ պատերազմի նմանվող  գործողությունները խիստ դատապարտելի են, միջազգային հանրությունը պետք է իր խոսքն ասի»,- ասաց Թագուհի Թովմասյանը։