Ձեր վստահելի աղբյուրը

«Տնտեսական առումով ռուս-ուկրաինական պատերազմի արդյունքում  լրջագույն մարտահրավերներ և անկանխատեսելի երևույթներ կարող են տեղի ունենալ»,- կառավարությունում լրագրողների հետ զրույցում ասաց ՀՀ նորընտիր նախագահ Վահագն Խաչատուրյանը, ում երդմնակալության արարողությունը կկայանա մարտի 13-ին։ Այսօր նա վերջին անգամ էր կառավարությունում որպես բարձր տեխնոլոգիական արդյունաբերության նախարար։

Ըստ նրա, ոչ մի լավագույն վերլուծաբան չէր կարող կանխատեսել, որ կարճ ժամանակահատվածում մեր գործընկեր Ռուսաստանը կարող էր հայտնվել նման սահմանափակումների մեջ, և դրանից բխող հետևանքները կարելի է կանխատեսել մասամբ, ոչ ամբողջովին։

«Ուղղակի պետք է մեր համակարգը պատրաստել, հատկապես ֆինանսական համակարգը, որպեսզի կարողանանք սպասարկել և մեր քաղաքացիներին, ինչու չէ նաև այն մարդկանց, ովքեր Հայաստան են ժամանալ,  ցանկանում են այստեղ տնտեսական գործունեություն կազմակերպել»,- ասաց Վ. Խաչատուրյանը։

Խոսելով գնաճի մասին, նա նշեց, որ առկա գնաճը կառավարության կողմից կանխատեսելի էր դեռ հունվարից։ Ըստ նրա, նոր ստեղծված իրավիճակում Ուկրաինայից սպասվող հացահատիկի բերքը, որ պետք է լիներ, չի լինելու, որոշակի խոչընդոտներ են լինելու ՌԴ-ից Հայաստան ներկրվող ապրանքատեսակների հետ կապված։

«Իրավիճակը այնպես է խճճվել այսօր, որ կառավարությունը փորձում է բացել այդ կծիկը։ Թիվ մեկ հարցը սպասվող ինֆլյացիայի դեմն առնելն է։ Համաշխարհային շուկայում ցորենի գինը միանգամից 50 դոլարով աճեց, չգիտենք՝ ինչպես կլինեն նավթի գները, ամեն ինչ  փոխկապակցված է նավթի գների հետ։

Վատատեսական սցենար պետք է ունենանք, բայց մեր տրամադրությունները չպետք է այդ սցենարի շրջանակներում իրականացնենք։

Հնարավոր է այս իրավիճակում բյուջեում եկամուտների նվազում տեղի ունենա»,– ասաց  Վահագն Խաչատուրյանը։

Հարցին՝ հացի խնդիր առաջանալու դեպքում ինչպիսի՞ քայլեր է ձեռնարկելու կառավարությունը, նա պատախանեց․ «Համոզված եղեք՝ այդ խնդիրը չի լինի, մենք գնահատում ենք մեր հնարավորությունները։ Մենք շատ լավ գիտենք, որ հացահատիկի արտադրության մեր ներքին ռեսուրսները կամ հնարավորությունները պակասել են, բայց այլ ձևերով այդ պակասը կլրացվի»։