Ձեր վստահելի աղբյուրը

«Այն, ինչ անում է Թուրքիան  և նրան էլ հետևում է Ադրբեջանը,  հատվածական բնույթ չի կրում, այլ հետևողական, բավականին լավ մտածված, պլանավորված ցեղասպանական քաղաքականութուն է»,-«Հայելի» մամուլի ակումբում հայտնեց իրավապաշտպան, Հայաստանի առաջին օմբուդսմեն Լարիսա Ալավերդյանը՝ շեշտելով, որ այն 2020թ. պատերազմի շարունակությունն է:

Նրա խոսքով՝ 2020 թվականի պատերազմը եղել է այն պատճառով, որ Հայաստանում իշխանության եկած ուժը բոլոր ուղղություններով իրականացնում էր պետության թուլացումը՝ թիրախավորելով բանակը, այն անձանց, ովքեր հերոսական ազգային ազատագրական պատերազմում հաղթող էին դուրս եկել:

«Հայաստանում բոլոր ինստիտուտների քայքայումները գործառույթներ են եղել, որոնք Ադրբեջանին հնարավորություն են տվել Թուրքիային ներգրավելով ցեղասպանական գործողություններին, Արցախի դեմ իրականացնել ագրեսիա»,-նկատեց Ալավերդյանը և պնդեց, որ բործող իշխանությունները ցանկացել են ամբողջ Արցախը հանձնել, բայց նրա 25 %-ի պահպանությունը հնարավոր է եղել շնորհիվ այս տարածաշրջանում գործի  դրված ՌԴ աշխարհաքաղաքական շահերի և այսօր Ադրբեջանը ցանկանում է անել այն, ինչը չի ստացվել 44-օրյա պատերազմում:

Նրա խոսքով՝ վերջին օրերին Արցախում արձանագրված  դեպքերը թուրքական քաղաքական (ոչ էթնիկ) ձեռագիրն է, երբ որ աշխարհում տեղի է  ունենում շատ ավելի մեծ պետերազմ, բախում, նրանք էլ սեփական հարցերը լուծելու համար օգտվում են այդ պահից՝ քանի դեռ միջազգային հանրության ուշադրությունը սևեռված է այլ տեղ:

Շեշտելով, որ ՀՀ առաջին նախագահի օրոք և այսօրվա իշխանությունները ձգտել են գնալ դեպի Թուրքիա՝ Ալավերդյանն ասաց. «Իրենց հիվանդագին պատկերացումների մեջ հենց Թուրքիային միանալով Հայաստանը կարող է դառնալ Եվրոպայի մաս»:

Նա շեշտեց, որ պատահական չի ասում այդ մասին, քանի որ եղել  է տարբեր պեություններում, հանդիպել եվրոպական բարձրաստիճան չինովնիկների հետ և կրկնում է այն, ինչ  մի անգամ ասել է մի բարձրաստիճան պաշտոնյա, երբ իրեն հարցնում էր, թե ինչո՞ւ Հայստանը չի ուզում բարեկամանալ Թուրքիայի հետ, քանի որ այն ուղիղ ճանապարհ է դեպի եվրոպա:

«Հիմա ո՞ւմ մոտ կասկած կա, որ այս իշխանությունները եկել են մեկ խնդիր լուծելու համար, այն է՝ ամբողջովին փոխել մեր զարգացման ուղին՝ թեքելով մեզ դեպի Թուրքիա»,-հայտարարեց Լարիսա Ալավերդյանը և հիշեցրեց, որ դրա համար իշխանությունները համաձայնել են կատարել երեք հայտնի պայմանները՝ Արցախի բռնակցումն Ադրբեջանին, հրաժարվենլ ցեղասպանություն եզրույթից՝ հավասարեցնելով հայերի մեղքը, Թուրքիայի գրավոր գրված և հաստատված ցեղասպանության ռազմավարության հետ:

Լարիսա Ալավերդյանը կոչ արեց պայքարել նման վտանգավոր զարգացումների դեմ՝ համագործակցելով բարեկամ պետությունների և Թուրքիայում և Ադրբեջանում առկա ոչ ազգայնական հասարակությոինների ներկայացուցիչների հետ և համոզմունք հայտնեց, որ անպայման կհասնենք հաղթանակի:

«Մենք հասնելու ենք մեր նպատակին, գինն է լինելու ծանր և որպեսզի այն չլինի մի ամբողջ սերնդի կյանքի գին, մենք պետք է կարողանանք խելքներս գլուխծներս հավաքենք ու կարողանանք հստակեցնել՝ Հայաստանը եղել է, կա ու պետք է լինի, և այն չպետք է լինի ամբողջովին մարդատյաց քաղաքականության և գաղափարախոսության վրա հիմնված Թուրքիայի մաս»,-հայտարարեց ՀՀ առաջին օմբուդսմենը: