Ձեր վստահելի աղբյուրը

Ռուս-ուկրաինական հակամարտության ընթացքում՝ փետրվարի 24-ից մինչև մարտի 10-ն ընկած ժամանակահատվածում, Ուկրաինայի 8 քաղաքացի դիմել է Միգրացիոն ծառայություն՝ Հայաստանում ապաստանի իրավունք և փախստականի կարգավիճակ ստանալու համար։ Այս մասին Panorama.am-ի թղթակցին հայտնեց Միգրացիոն ծառայության հանրային կապերի պատասխանատու Նելլի Դավթյանը։

Նշենք, որ հակամարտության, ինչպես նաև Ռուսաստանի դեմ Արևմուտքից կողմից սահմանված պատժամիջոցների հետևանքով վերջին օրերին Ռուսաստանից մեր երկիր են ժամանում մեծ թվով քաղաքացիներ՝ ինչպես ազգությամբ հայեր, այնպես էլ՝ ռուսներ։

Միգրացիոն ծառայությունից հետաքրքրվեցինք՝ տվյալներ ունեն, թե վերջին շրջանում քանի ռուսաստանցի է եկել Հայաստան, Նելլի Դավթյանն ասաց, որ դեռևս չեն կարող հստակ թիվ ներկայացնել։

«Դեռ չկա վիճակագրություն, թե քանի ռուսաստանցի է եկել Հայաստան։ Ինչպես միշտ վիճակագրությունը կամփոփվի եռամսյակային կտրվածքով, ապրիլի սկզբին այդ թվերը կներկայացնի Վիճակագրական կոմիտեն»,- ասաց նա։

Նելլի Դավթյանը տեղեկացրեց, որ 2022 թվականի հունվարի 1-ից օտարերկրացիներին աշխատանքի թույլտվություն և կացության կարգավիճակ տալիս է Միգրացիոն ծառայությունը։ Սակայն ԵԱՏՄ երկրների քաղաքացիներից՝ համաձայն ԵԱՏՄ պայմանագրի, չի պահանջվում ունենալ թույլատվական բնույթի որևէ փաստաթուղթ, այդ թվում՝ աշխատանքի թույլտվություն և կացության կարգավիճակ։

Դա, ըստ նրա, նշանակում է, որ ՌԴ քաղաքացին գտնվելով Հայաստանում և ծավալելով աշխատանքային գործունեություն, եթե դա տևելու է 180 օրից ավելի, ապա ընդամենը նա պետք է workpermit.am կայքում, որը գործարկվել է այս տարվա հունվարից, լրացնի որոշակի տվյալներ և ստանա տեղեկանք այն մասին, որ օրինական հիմունքներով է աշխատում Հայաստանում։ Դրանից հետո երկու շաբաթվա ընթացքում քաղաքացուն անվճար հիմունքներով տրամադրվում է պլաստիկ քարտ, որը կոչվում է օրինական բնակությունը հաստատող տեղեկանք։

«Դա քաղաքացին կարող է անել Հայաստան մուտք գործելու օրվանից 180 օրվա ընթացքում։ Այսինքն՝ դեռ շուտ է որևէ տվյալ ներկայացնել, այդուհանդերձ, վերջին օրերին խորհրդատվական բնույթի հարցումներ շատ ենք ստանում»,- ընդգծեց Նելլի Դավթյանը։

Հարցումներն, ըստ նրա, տարբեր են՝ Հայաստանում աշխատելու, բնակվելու մասին, սակայն հարցերի մի մասը դուրս են Միգրացիոն ծառայության լիազորությունների տիրույթից։ Նրա խոսքով՝ համագործակցում են գործընկեր գերատեսչությունների՝ մասնավորապես Էկոնոմիկայի նախարարության հետ, որտեղ ստեղծվել է աշխատանքային խումբ և  խորհրդատվական բնույթի ծառայություն է մատուցում ՌԴ քաղաքացիներին, որոնք ուզում են իրենց բիզնեսը տեղափոխել Հայաստան։

«Այսինքն՝ վարձու աշխատողների մասով պատասխանատու է Միգրացիոն ծառայությունը, իսկ բիզնեսի տեղափոխման ընթացակարգով զբաղվում է էկոնոմիկայի նախարարությունը»,- ասաց նա։