Ձեր վստահելի աղբյուրը

«Էկոնոմիկայի նախարարությունն առաջարկում է բոլոր գազալցակայանների և բենզալցակայանների աշտարակներում տեղադրել սարքեր՝ կվերահսկելու համար այն պարամետրերը, որոնք թույլ կտան պարզելու, թե, մեղմ ասած, տնտեսվարողը սպառողին փորձում է գցել մոլորության մեջ, թե ոչ»,- ԱԺ-ում կազմակերպված քննարկման ժամանակ ասաց Տնտեսական հարցերի մշտական հանձնաժողովի նախագահ Վահե Հակոբյանը՝ ներկայացնելով «Առևտրի ծառայութունների մասին» օրենքում փոփոխություններ կատարելու նախաձեռնությունը:

Էկոնոմիկայի նախարարության որակի ենթակառուցվածքների զարգացման վարչության պետ Ժաննա Զաքարյանն օրենսդրական նախաձեռնությունը հիմնավորեց թերլցումների վերաբերյալ ստացած բազմաթիվ ահազանգերով: 

Շուկայի վերահսկողության տեսչական մարմնի ղեկավար Արմեն Կոտոլյանը հայտնեց, որ շատ դեպքերում տնտեսվարողները հնարավորություն են ունենում միջամտել վառելիքաբաշխիչ աշտարակի աշխատանքին, ինչի հետևանքով լինում են թերլիցքավորումներ և առաջարկվող սարքի միջոցով իր ղեկավարած մարմինը վերահսկելու է, թե արդյոք կան նման խախտում:

Ստանդարացման և չափագիտության ազգային մարմնի տնօրեն Ալբերտ Բաբայանն էլ ասաց, որ լցակայաններում չափման տարբեր պարամետրեր կան, իսկ առաջարկվող սարքը համալիր վերահսկողություն է ապահովում:

ՔՊ պատգամավոր Հովիկ Աղազարյանը հետաքրքվեց, թե տեղադրվելիք սարքին միջամտել հնարավո՞ր է, թե ոչ:

Ժաննա Զաքարյանը հայտնեց, որ սարքի ծրագրային ապահովմամբ զբաղվող ընկերությունը հայտնել է, որ որևէ միջամտություն բացառվում է:

Հանձնաժողովի նախագահ Վահե Հակոբյանը հայտարարեց, որ որպես ոլորտի մասնագետ, միանշանակ պնդում է, որ անհնար է երաշխավորել, թե այդ ծրագրային ապահովմանը միջամտություն չի լինի:

Հանձնաժողովի փոխնախագահ Բաբկեն Թունյանն էլ հիշեցրեց, որ օրենքի նախագծի քննարկումը երկու ամսով հետաձգվել էր, քանի որ պարզ չէր, թե ինչքան է արժենալու այդ սարքը և առաջին քննարկման ժամանակ Էկոնոմիկայի նախարարության ներկայացուցիչը հայտնել էր՝ այն նախնական դիտարկմամբ 600 հազար դրամ է արժենալու ամեն աշտարակի համար:

Էկոնոմիկայի նախարարության ներկայացուցիչ Ժաննա Զաքարյանն էլ հայտնեց, թե դա նախնական դիտարկում է եղել, իսկ արտադրողի հետ խոսելուց հետո պարզել են, որ սարքի արժեքը 1-1.2 մլն դրամ է լինելու:

Արմեն Կոտոլյանն էլ ասաց, որ մեկ այլ արտադրողի հետ էլ ինքն է հանդիպել և վերջինս հայտնել է 150 հազար դրամի տարբերակը և առաջարկեց երկու արտադրողին էլ տեխնիկական բնութագիր ուղարկել և հասկանալ, թե ինչու է գների տարբերությունը այդքան մեծ՝ ենթադրելով, որ այդ գնի մեջ ներառված չէ սերվեների գինը:

«Մուլտի գազ» ՍՊԸ-ի տնօրեն Աղասի Մարգարյանը հայտնեց, որ իրենց գազալցակայանների աշտարակներում այդ բոլոր պարամետրներն ունեն, բացի այդ այսօր գազը կիլոգրամով է վաճառվում, իսկ կշեռքները գերմանական են և կապարակնքված:

Նա առաջարկեց վերահսկողության մեխանիզմն ավելացնել, այլ ոչ թե՝ նոր սարքավորումներով ֆինանսական բեռը, քանի որ գազալցակայաններ կան, որոնք 10-ից ավելի աշտարակ ունեն և այդ սարքերի տեղադրումը մեծ բեռ կլինի:

Աղասի Մարգարյանը իրավասու մարմիններին առաջարկեց ուշադրության դարձնել գազալցակայանների անվտանգության վրա, որ սահմանված չափից ավելի են լիցքավորում՝ վտանգելով մարդկանց կյանքն, այլ ոչ թե նոր սարքավորումներ պարտադրեն:

Ստանդարացման և չափագիտության ազգային մարմնի տնօրեն Ալբերտ Բաբայանը հայտնեց, որ սկզբում տնտեսվարողների հետ պայմանավորվել էին՝ այդ աշտարակներում կալիբրավորման ռեժիմը համատեղ վերահսկեն, որպեսզի տնտեսվարողը չկարողանա առանց իրենց իմացության պարամետր փոխի, բայց վերջիններս ասել են՝ այն հնարավոր չէ, քանի որ տնտեսվարողն անընդհատ ստիպված է լինում միջամտել՝ թեկուզ հոսանքների անջատումներից հետո:

«Հայաստան» խմբակցության պատգամավոր Հռիփսիմե Ստամբուլյանն էլ շեշտեց, որ եթե պետությունն է ուզում վերահսկողությունն ուժեղացնի, ապա պարտավոր է ինքը վճարի սարքերի համար, այլ ոչ թե տնտեսվարողների համար լրացուցիչ ծախսեր սահմանի:

Խորհրդակցությանը ներկա տնտեսվարողները դեմ արտահայտվեցին նոր սարքերի տեղադրմանը՝ պատճառաբանելով դրանց թանկ լինելը և նաև այն, որ էլեկտրաէներգիան և գազն էլ է թանկացել:

Հանձնաժողովի նախագահ Վահե Հակոբյանն առաջարկեց Էկոնոմիկայի նախարարության, լիազոր մարմինների և տնտեսվարողների հետ աշխատանքային խումբ ստեղծել և քննարկումների արդյունքում որոշակի եզրակացության գալ, իսկ ԱԺ-ն կիրականացնի միջնորդի դերը: