Ձեր վստահելի աղբյուրը

«Համոզված եմ, որ ադրբեջանաթուրքական տանդեմը ցանկանում է օգտվել իրավիճակից և հասնել իր վաղեմի նպատակին, ինչը վավերացվեց Շուշիի հռչակագրով, այն է՝ Սյունիքի «միջանցքնը» ստանալը և թյուրքական աշխարհը միավորելը»,-ԱԺ-ում ճեպազրույցի ժամանակ ասաց «Հայաստան» խմբակցության պատգամավոր, Տնտեսական հարցերի մշտական հանձնաժողովի նախագահ Վահե Հակոբյանը:

Ստեղծված իրավիճակում կառավարության դիրքորոշումը նա  ծայրահեղ անհասկանալի  համարեց՝ նկատելով, որ վերջինս շարունակում բանակցել թուրքական կողմի հետ «խաղաղության դարաշրջանի» կամ նման այլ թեզերի շուրջ:

Անդրադառնալով լրագրողի հարցին, թե ինչ կաշկանդվածություն ունեն իշխանությունները Արցախի Հանրապետության անկախությունը ճանաչելու հարցում՝ Հակոբյանն ասաց .«Չեմ կարող ասել, թե ինչ կաշկանդվածություն կարող են ունենալ, բայց կարող եմ ենթադրել, որ խնդիր է դրվել ամեն գնով կարգավորել հարաբերությունները թուրքերի հետ՝ չգիտեմ իրե՞նք են իրենց առաջ են դրել, թե՞ մեկ ուրիշն է դրել»:

Տնտեսական հարցերի մշտական հանձնաժողովի նախագահը պատասխանեց նաև Արցախում իրավիճակի սրման վերաբերյալ գնահատական տալու ցանկության չունենալու մասին Նիկոլ Փաշինյանի հայտարարությանը վերաբերող հարցին և ասաց. «Դուք հարց եք տալի մի մարդու վարքագծի վերաբերյալ, որը պատերազմից հետո անգամ մեկ անգամ չի այցելել Արցախ, հետևություն դուք արեք»:

Նա հորդորեց Փաշինյանին գնալ Արցախ և այնտեղից ներկայացնել, թե Մինսկի խմբի բանակցությունների գործընթացից ինչ ժառանգություն էր ստացել 2018 թվականին և ինչ իրավիճակ ունենք այսօր:

«Հայաստանը և արցախը համատեղ օգտագործում էին 500-600 հազար տոննա հացահատիկ, որից 30%-ը մինչև 44-օրյա պատերազման ապահովում էր Արցախը, և քանի որ այդ հնարավորությունը չկա, մենք 99 %-ով կախվածություն ունենք ՌԴ-ից»,-ասաց ընդդիմադիր պատգամավորը՝ անդրադառնալով արտահանումները սահմանափակելու ՌԴ հայտարարությանը:

Հարց հնչեցնելով,  թե ինչ է անում կառավարությունն այդ խնդիրը լուծելու համար և նկարելով, որ Հայաստանի և Արցախի սպառած հացի քանակը Ռուսաստանի համար չնչին տոկոս է՝ Վահե Հակոբյանն ասաց. «Հիմա իրենք ինչ պետք է անեն՝ գնան ՌԴ կառավարության դռները կոտրեն, խնդրեն, հիստերիկայի մեջ ընկնեն, բայց պետք է ստանան մեզ անհրաժեշտ հացահատիկի քանակը»:

Նրա խոսքով՝ էկոնոմիկայի նախարարությունը պետք է վերահսկի, որպեսզի տնտեսվարողները իրնց մոտ եղած ալյուրն առժամանակ չպահեն՝ հետագայում թանկ վաճառելու համար, իսկ կառավարությւոնը պետք է պարզ հայտարարի, թե ինչքան հացահատիկ կա պահեստավորված, ինչքան է պետք ներկրել, որպեսզի սպեկուլյացիա չլինի:

«Ինչքան երկարում է ռուս-ուկրաինական պատերազմը, ուզենք, թե չուզենք, այդ պատժամիջոցները կպնում են Հայստանին: Եթե նա ունենում է խնդիր՝ ավտոմատ խնդիր ենք ունեում նաև մենք»,-ասաց պատգամավորը:

Նկատելով, որ Հայաստանում սկսել են ալյուրի, շաքարավազի և ձեթի հերթերը, Վահե Հակոբյանը հասարակության հորդորեց չընկնել տագնապի մեջ, քանի որ այն բերելու է չափազանց վատ հետևանքների:

«Սպասում եմ, որ ինքը ասի, թե ում նկատի ուներ թալանչի ասելով»,-Զանգեզուրի պղնձամոլիբդենային կոմբինատի տուգանքի վերաբերյալ ԱԺ-ում Փաշինյանի արտաբերած «թալանչիներ» արտահայտության հասցեատերը լինելու մասին հարցին պատասխանելիով էլ  ասաց Հակոբյանը: