Ձեր վստահելի աղբյուրը

«Հենակետ» վերլուծական կենտրոնն ամփոփել ու հրապարակել է համառոտ տեղեկություններ անցած շաբաթվա ընթացքում Արցախում և Արցախի շուրջ տեղի ունեցած իրադարձությունների վերաբերյալ.

«Ընդհանուր բնույթի տեղեկություններ

Շաբաթվա ընթացքում արցախա-ադրբեջանական շփման գծում կայուն  լարված իրավիճակ է եղել։ Շաբաթվա գրեթե բոլոր օրերին ադրբեջանական կողմը Ասկերանի շրջանի Խրամորթ և Նախիջևանիկ, Մարտունու շրջանի Խնուշինակ և Կարմիր շուկա համայնքների վարչական տարածքների, ճանապարհների ուղղությամբ՝ հրաձգային տարբեր զինատեսակով, նաև տարբեր  տրամաչափի ականանետերով ակտիվ կրակ են վարել։

Հակառակորդը նախ՝  մարտի 7֊ին 60 մմ տրամաչափի ականանետով թիրախավորել է Ասկերանի շրջանի Խրամորթ գյուղի գերեզմանոցը, իսկ մարտի 9֊ին` Մարտունու շրջանի Խնուշինակ գյուղի ուղղությամբ տեղակայված դիրքերից ադրբեջանական կողմը նորից կիրառել է  60 մմ տրամաչափի ականանետ։

ԱՀ ՆԳՆ ոստիկանության Ասկերանի շրջանային բաժնից էլ հաղորդել են, որ Խրամորթ գյուղի բնակիչ  Սուրեն Բաղդասարյանն իրենց տան բակում գյուղատնտեսական աշխատանքներ կատարելու ժամանակ, հակառակորդի կողմից ականանետի արձակված կրակոցից՝ մեջքի շրջանում վիրավորում է ստացել:

Հրադադարի ռեժիմը խախտելուն զուգահեռ, թշնամին  պայթեցրել է նաև ՀՀ ից դեպի Արցախ տանող գազատարը , ինչի արդյունքում Արցախ մատակարարվող գազի բնականոն մատակարարումը  խախտվել է։

Ադրբեջանական կողմը մինչ այս պահը խոչընդոտում է, որպեսզի հայկական կողմը վերանորոգման աշխատանքներ կատարի։ 

Թեմայի վերաբերյալ ԱՀ ՄԻՊ Գեղամ Ստեփանյանը հայտարարել է , որ գազամատակարարման վերականգնմանը խոչընդոտելն ադրբեջանական կողմի՝ Արցախում հումանիտար բնագավառում խնդիրներ հարուցելու և բնականոն կյանքը խաթարելու դիտավորության ապացույցն է։
Արցախում ստեղծված իրավիճակով պայմանավորված`  մարտի 10-ին ԱՀ  ԱԺ-ի արտահերթ նիստ է գումարվել, որից հետո ԱՀ ԱԺ-ն հայտարարություն է տարածել, հորդորելով  ԵԱՀԿ Մինսկի խմբի համանախագահությանը, ՄԱԿ-ին և նրա համապատասխան կառույցներին համարժեք գնահատականի արժանացնել Ադրբեջանի պահվածքը, ջանքեր գործադրել՝ սանձելու նրանց հանցավոր ոտնձգությունները։

Նույն օրը ԱՀ նախագահ Ա․Հարությունյանը հրավիրել է Անվտանգության խորհրդի ընդլայնված նիստ: Քննարկվել են Արցախում  ստեղծված անվտանգային ու հումանիտար խնդիրները:
Շաբաթվա ընթացքում՝ Արցախում ստեղծված բարդ իրավիճակի ֆոնին, մամուլում և համացանցվում տեղեկատվություն էր տարածվել էր, որ  Թաղավարդում և Արցախի այլ գյուղերում ինքնապաշտպանական ջոկատներ են ստեծվել։

Արցախի տեղեկատվական շտաբը թեմայի վերաբերյալ  հանդես է եկել հայտարարությամբ, որում մասնավորապես կոչ է արել  բնակչությանը տուրք չտալ ադրբեջանական սադրանքներին, և զերծ մնալ ինքնագործունեությունից ու լարվածության հավելյալ օջախներ ու առիթներ ստեղծելու փորձերից:

Ֆրանսիական Le Figaro Magazine ամսագրի փոխտնօրեն Ժան-Քրիստոֆ Բյուիսոնը ռուս-ուկրաինական ճգնաժամի ֆոնին իր թվիթերում անդրադարձել է արցախյան 44-օրյա պատերազմին։ Նրա խոսքերով 44-օրյա պատերազմի  ժամանակ լրագրողներից քչերն էին հետաքրքրվում Արցախով, իսկ ամբողջ աշխարհին ընդհանրապես թքած ուներ Արցախում տեղի ունեցածի  վրա։

ՌԴ խաղաղապահների մասին

ՌԴ ՊՆ ից տեղեկացրել են, որ Ասկերանի շրջանի Նորագյուղի միջնակարգ դպրոցում ռուսական խաղաղապահ զորախմբի զինծառայողները ինտերակտիվ «Խաղաղության դաս» են անցկացրել դպրոցականների հետ։ Դասընթացների ընթացքում ռուս խաղաղապահները երեխաներին պատմել են  խաղաղապահ ուժերի ստեղծման պատմության և խաղաղապահների հիմնական առաքելության խնդիրների մասին։ Նաև երեխաներին ցույց է տրվել, թե ինչպես պետք է ցուցաբերել առաջին բուժօգնություն և բացատրել  անվտանգության մի շարք կանոններ։

Պաշտոնական լրահոս

ԱՀ  նախագահ Արայիկ Հարությունյանը մարտի 12-ին ընդունել է Հայ հեղափոխական դաշնակցության նորընտիր Բյուրոյի անդամ Դավիթ Իշխանյանին և ՀՅԴ Արցախի Կենտրոնական կոմիտեի ներկայացուցիչ Արթուր Մոսիյանին: Զրուցակիցները քննարկել են հանրապետության ներքին ու արտաքին քաղաքականությանը, առկա մարտահրավերներին, ինչպես նաև տարածաշրջանում ու աշխարհում տեղի ունեցող գործընթացներին վերաբերող հարցեր։

Արցախի տեղեկատվական շտաբից տեղեկացրել են, որ ԱՀ  կառավարության նախաձեռնությամբ՝ Արցախում ռուսական խաղաղապահ զորակազմի միջոցով Ուկրաինայի Կիևի և Զապորոժիեի շրջանների բնակիչներին 14 տոննա մարդասիրական օգնություն է ուղարկվել՝ տեղական արտադրության առաջին անհրաժեշտության ապրանքների տեսքով:

ԱՀ ԱԱԾ-ից տեղեկացրել են, որ արցախա-ադրբեջանական շփման գծի տարբեր հատվածներում վերջին օրերին ձևավորված լարվածության շրջանում տեղեկություններ են տարածվել այն մասին, որ որոշ բարձրաստիճան պաշտոնյաներ իրենց ընտանիքները Արցախից տեղափոխել են ՀՀ։  ԱՀ  նախագահի կողմից ԱԱԾ-ին տրվել է անհապաղ ուսումնասիրություններ կատարելու և այդպիսի դեպքերի մասին շտապ զեկուցելու հանձնարարական։

ԱՀ ԱԱԽ գրասենյակը հայտարարություն է տարածել, որում նշվում է, թե  ադրբեջանական տեղեկատվական հարթակներում տարածվող տեղեկությունները, որոնց համաձայն՝ Արցախից ՌԴ խաղաղապահ զորակազմն իր ուժերի մի մասը դուրս է բերում Ուկրաինա տեղափոխելու նպատակով, չի համապատասխանում իրականությանը:

ՆԳ նախարարության ԱԻ պետական ծառայությունից տեղեկացրել են, որ 2022 թվականի փետրվարի 28-ից մարտի 6-ն ընկած ժամանակահատվածում հայտնաբերվել և վնասազերծվել է 1215 պայթուցիկ նյութ։

ԼՂ հակամարտության մասին

ՀՀ վարչապետը կառավարության նիստում հայտարարել է   որ վերջին շրջանում Արցախի շուրջ իրադրությունը լարվել է, ինչը ընդգծվել է նաև Արցախին բնական գազ մատակարարող խողովակաշարի խափանմամբ։  Նա նաև նշել է,  որ այս պահին գնահատականներ չի տալիս, պարզապես արձանագրում է , որ կա այդպիսի իրավիճակ։

Եվրախորհրդարանում  Եվրոպական ժողովրդական կուսակցության անդամ, «Լեռնային Ղարաբաղի մշակութային ժառանգության ոչնչացումը» բանաձևի  նախագծի համահեղինակ Պետեր վան Դալենը հայտարարել է, որ Ադրբեջանը անհնարին է դարձնում ԼՂ  տեղաբնիկների կյանքը։

Ըստ նրա ԼՂ ժողովրդի կյանքը վտանգի տակ է: Նիդերլանդցի պատգամավորի խոսքով՝ Ադրբեջանի նախագահ Ալիևը մտածում է միայն իր և իր ընտանիքի  բարեկեցության մասին՝ իրենց կարողությունը հասցնելով միլիարդավոր դոլարների, բայց միաժամանակ կոպտորեն ոտնահարելով մարդկանց իրավունքները Ադրբեջանում և Լեռնային Ղարաբաղում»: