Ձեր վստահելի աղբյուրը

«Նախագիծը բխում է ՀՀ սուվերեն շահերից և ես կարծում եմ, որ մենք այստեղ, որպես այդպիսին, կարծիքի շեղում կարող է և չունենանք, ազնվորեն եմ ասում»,-ԱԺ Պետական-իրավական հարցերի մշտական հանձնաժողովում ասաց «Հայաստան» խմբակցության պատգամավոր Արամ Վարդևանյանը՝ ներկայացնելով իր, Իշխան Սաղաթելյանի և Աղվան Վարդանյանի հեղինակած Քրեական օրենսգրքում լրացում կատարելու մասին նախագիծը:

Պատգամավորը ներկայացրեց, որ առաջարկվում է Քրեական օրենսգքով սահմանել քրեական պատասխանատվության նոր հանցակազմի օբյեկտը՝  Հայաստանի Հանրապետության տարածքային ամբողջականության դեմ ուղղված հրապարակային արտահայտությունները և դրանք հրապարակայնորեն արդարացնելը և քարոզելը:

Պատգամավորը բացատրեց, որ այդ հոդվածով ազդակ է տրվում, որ որևէ մեկը չի կարող ՀՀ տարածքային ամբողջականությանը կամ նրա մի մասը կասկածի տակ դնի, կամ դրանց նկատմամբ պահանջատիրություն ցուցաբերի:

«Ցավոք սրտի, մենք նման հռետորաբանություն վերջին շրջանում շատ ավելի շատ ենք տեսնում»,-ասաց Վարդևանյանը և, անդրադառնալով խաղաղության մասին հնչող կարգախոսներին, շեշտեց, որ խաղաղության ձգտող պետությոնները նման ներպետական կարգավորումներ ունենում են:

Ընդդիմադիր պատգամավորը նկատեց, որ այն օբյեկտիվ հանգամանքներով պայմանավորված նոր հանցակազմ է և բխում է քրեական քաղաքականության տրամաբանությունից:

Ընդգծելով, որ այդ հոդվածը որոշակի առումով ուղղված է խոսքի ազատության սահմանափակմանը՝  Արամ Վարդևանյանը հայտարարեց, որ այն ուղղվելու է միայն ՀՀ տարածքային ամբողջականությունը կամ նրա մի մասը կասկածի տակ դնողների դեմ:

Պատգամավորը ենթադրեց, որ կառավարության հակափաստարկը կարող է լինել այն, որ Քրեական օրենսգրքում կա 301 հոդվածը, որը վերաբերում է իշխանությունը զավթելուն, տարածքային ամբողջականությունը խախտելուն, կամ Սահմանադրական կարգը բռնի տապալելուն ուղղված հրապարակային կոչերին, և պնդեց, որ «կոչ» և «արտահայտություն» եզրույթներն էապես տարբերվում են:

«Այս իմաստով մենք ուզում ենք «արտահայտություն» եզրույթն օգտագործենք, որովհետև կան այնպիսի սրբազան արժեքներ, ինչպիսիք են ՀՀ տարածային ամբողջականությունը, ՀՀ սուվերենությունը, որը որևէ մի իրավիճակում կասկածի տակ դնելը պետք է ենթադրի հետևանք»,-ասաց պատգամավորը:

Նկատելով, որ հոդվածն ընդունվելու դեպքում դրա շահառուները լինելու են ՀՀ սահմանից դուրս և այն ազդակ կլինի, որ Հայաստանի համար կան կարմիր գծեր, որոնք սակարկման ենթակա չեն՝ Վարդևանյանը հայտնեց, որ այն անձինք, որոնք այդ գիծը կանցնեն, պետք է գիտակցեն քրեական հետապնդման ենթարկվելու մասին:

«Եթե մի այլ երկրի բարձրաստիճան պաշտոնյա, կարող է իր մտքով էլ անցկացնել, որ Սևանն էլ վերցնի Հայաստանից, պետք է գիտակցի, որ այն Հայաստանում կարող է ունենալ  իրավական հետևանք»,-հայտարարեց օրենքի նախագծի համահեղինակը:

Դիտարկելով նախագծի իրավական որոշակիության հարցը՝ պատգամավորը հայտնեց, որ իշխանության ընդունած ծանր վիրավորանքն իրավական որոշակիության տեսանկյունից անհամեմատելի է առաջարկվող նախագծի հետ:

Պատգամավորը նաև տեղեկացրե, որ օրենսդրական փաթեթում ընդգրկված «Քրեական դատավարության օրենսգրքում լրացում կատարելու մասին» օրենքի նախագծով էլ այդ հարցի քննությունը վերապահում է ԱԱԾ քննչական ծառայությանը, իսկ պահանջը խախտելը պատժվում է նվազագույն աշխատավարձի 1000-ապատիկից 3000-ապատիկի չափով կամ ազատազրկմամբ:

Հանձնաժողովի ՔՊ պատգամավորների բացասական ելույքները լսելուց հետո «Պատիվ ունեմ» խմբակցության պատգամավոր Աննա Մկրտչյանը կարծիք հայտնեց, թե հանձնաժողովում մեծամասնությունն ունի մտավախություն առ այն, որ ՀՀ քաղաքացիներից մեկը կորոշի ասել, թե ՀՀ-ում կան որոշ անկլավներ, որոնք պատկանում է մեր ինչ-որ թշնամական պետությանը:

Հանձնաժողովի նախագահ Վլադիմիր Վարդանյանն ընդհատեց Մկրտչյանի ելույթը՝ հայտարարելով ընդմիջում և բոլորին կոչ անելով գալ աշխատանքային քննարկման:

Հանձնաժողովի ՔՊ-ական պատգամավորները և կառավարության ներկայացուցիչը դեմ արտահայտվեցին նախագծին: